ފެނަކައިގެ ސަޕްލަޔަރުންނަށް ފައިސާ ނުދޭތީ، އެ ސަޕްލަޔަރުން ފެނަކަ އޮފީސް ކައިރީ މުޒާހަރާ ކުރަން ފަށައިފިއެވެ.

ފެނަކައިގެ އެކި މަސައްކަތްތަކަށް ބޭނުންވާ ތަކެތި ސަޕްލައިކޮށްދޭ ސަޕަލަޔަރުން މާފަންނުގައި ހުންނަ ފެނަކަ އޮފިހުގެ ގޯތިތެރޭގައި އެމީހުންގެ ޝުޢޫރުތައް ލިޔެފައިވާ ޕޯސްޓަރުތައް ހިފައިގެން ވަނީ މުޒާހަރާކުރަން ފަށައިފައެވެ.

އެއް ޕޯސްޓަރެއްގައި ބުނެފައިވަނީ އެ މީހުންކުރި މަސައްކަތުގެ އަގަށްވާ 9،450،897ރ ނުދީ ލަސްވާތާ 7 މަސް ދުވަސް ވެއްޖެ ކަމަށެވެ. 

Advertisement

ފެނަކައިން، އެކުންފުންޏަށް އެކި އެކި މަސައްކަތް ކޮށްދީ، ތަކެތި ސަޕްލައި ކޮށްދޭ ފަރާތްތަކަށް ފައިސާ ނުދީގެން އެކަމުގެ ޝަކުވާ މީގެ ކުރިންވެސް މީޑިއާގެ ސަމާލުކަމަށް ވަނީ އައިސްފައެވެ. ހަމަ މިއާއި އެކު ދާދި ފަހުން އެސްޓީއޯގެ އެމްޑީ ކަމުން ވަކިކުރެވުނު އަމްރުވެސް ވަނީ ފެނަކައިގެން ހިންގުން ވަރަށް ބޮޑަށް ދޯދިޔާވެފައި ވާކަން ފާހަގަ ކޮށްފައެވެ. 

ހަމަމިޔާއިއެކު ތެޔޮ ގަތުމަށްފަހު ފެނަކައިން އެސްޓީއޯ އަށް ދައްކަން ޖެހި ނުދައްކާ އޮތް ފައިސާގެ އަދަދު 1.8 ބިލިއަން ރުފިޔާއަށް އަރާ ކަމަށް ވެސް މީޑިއާ އަށް ވަނީ އެނގިފައެވެ.

ފެނަކައިން އެތައް ބަޔަކަށް ދޭން ޖެހޭ ފައިސާ ނުދޭ މައްސަލަ ފެންމަތިވެފައިވާއިރު، މިހާތަނަށް އެ ކުންފުނިން އެކަމާ ގުޅޭގޮތުން ވާހަކަ ދައްކާފައެއް ނުވެ އެވެ. އަދި މިއަދު ކުރަމުންދާ މުޒާހަރާ އާއި ގުޅިގެންވެސް އެއްވެސް އެއްޗެެއް ރަސްމީ ހައިސިއްޔަތަކުން ފެނަކައިން ހާމަކޮށްފައެއް ނުވެއެވެ.