ގުރައިދޫ ދާއިރާގެ ބައި-އިލެކްޝަނުގައި އެމްޑީޕީން ކުރިމަތިލައްވާފައިވާ އިބްރާހިމް ޝާޒަކީ ސަރުކާރާއި ގުޅިގެން މަސައްކަތް ކުރާނެ ކެންޑިޑޭޓަށްވުމުން، ދާއިރާގެ ތަރައްގީއަށްޓަކައި ޝާޒުއަށް ވޯޓުދެއްވުމަށް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު އެދިވަޑައިގެންފި އެވެ. 

ގުރައިދޫ ދާއިރާގެ ބައި-އިލެކްޝަންގެ ކެމްޕޭނަށް ރައީސް ޞާލިހު މިއަދު ވަނީ ގުޅިއަށް ވަޑައިގެންފަ އެވެ. 

ގުޅިއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ރައީސް ޞާލިހު ވިދާޅުވީ ޤާނޫނު ހެދުމުގެ އިތުރުން ރައްޔިތުންގެ މަޖިލީސް މެމްބަރުންގެ ގިނަ މަސްއޫލިއްޔަތުތަކެއް އޮންނަ ކަމަށެވެ. 

Advertisement

އެ މެމްބަރުންނަކީ ދާއިރާގައި ރައްޔިތުންނަށް ބޭނުންޖެހިފައިވާ ވަރަށް ގިނަ ކަންތައްތަކެއް ފުއްދާދިނުމަށް މަސައްކަތްކުރަން ޖެހޭ ބައެއްކަން ރައީސް ޞާލިހުގެ ވާހަކައިގައި ފާހަގަކުރެއްވި އެވެ. 

އެއާއެކު އެމަނިކުފާނު ވިދާޅުވީ ރައްޔިތުންގެ މަޖިލީސް މެމްބަރުންނަކީ ދާއިރާއަކަށް ގެންނަންޖެހޭ ބަދަލުތައް ގެނައުމުގައި އެންމެ އިސް ސަފުގައި މަސައްކަތްކުރާ ބޭފުޅާ ކަމަށާއި، އަދި އޭރަކު އޮންނަ ސަރުކާރަކާ އެއްކޮށް މަސައްކަތްކުރުމުގެ ވިސްނުން މެމްބަރު ގެންގުޅުއްވާނަމަ އެ ދާއިރާއަކަށް ތަރައްގީ ގެނައުމުގައި ފަސޭހަތަކެއް ލިބިގެންދާނެ ކަމަށެވެ.

އެ ވާހަކައާއި ގުޅުވާ ރައީސް ޞާލިހު ވިދާޅުވީ ގުރައިދޫ ދާއިރާގެ ބައި-އިލެކްޝަނުގައި އެމްޑީޕީގެ ފަރާތުން ކުރިމަތިލައްވާފައިވަނީ ސަރުކާރާއި ގުޅޭ ކެންޑިޑޭޓެއް ކަމަށެވެ.

ގުރައިދޫ ދާއިރާގެ ރައްޔިތުންނަށް ބޭނުންޖެހިފައިވާ ގިނަ ކަންތައްތަކެއް ހުރިއިރު ދާއިރާގެ ރައްޔިތުންނަށް އެންމެ ފައިދާ ބޮޑު ގޮތަކަށް ވާނީވެސް ސަރުކާރާއި ގުޅިގެން މަސައްކަތް ކުރާނެ މެމްބަރެއް ހޮވުންކަމަށް އެމަނިކުފާނު ވިދާޅުވި އެވެ. އަދި ސާޒަށް ވޯޓުދެއްވުމަށް އެމަނިކުފާނު ވަނީ އެދިވަޑައިގެންފަ އެވެ. 

އެމްޑީޕީގެ ކެމްޕޭނަށް ރައީސް ޞާލިހު ގުޅިއަށް ވަޑައިގަތުމާއި ގުޅިގެން އެ ރަށުން ވަނީ އެމަނިކުފާނަށް ހޫނު މަރުހަބާއެއް ދަންނަވާފަ އެވެ.