މިއަހަރުގެ ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ޓީސީ ސްޕޯޓްސް ކުލަބާއި ދެކޮޅަށް ކުޅުނު މެޗު 2-0 ގެ ނަތީޖާއަކުން މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ކާމިޔާބުކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ޓީސީގެ ފަރާތުން ރަގަޅު ޑިފެންސިވް ކުޅުމެއް ފެނިގެންދިޔަ އިރު، މި މެޗުގައި މާޒިޔާއަށް ލީޑު ނަގައިދިނީ ފުރަތަަމަ ހާފުގެ 44 ވަނަ މިނެޓުގައި އިބްރާހީމް އައިސަމް އެވެ. މިއީ އެޓީމުގެ ތަޖުރިބާކާރު ފޯވާޑް ހަމްޒާ މުހައްމަދު ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މާޒިޔާގެ ދެވަނަ ލަނޑު ފުރަތަަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ވެސް އައިސަމް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ.

ދެވަަނަ ހާފު ފަށައިގެން 51 ވަނަ މިނެޓުގައި ޓީސީގެ އަހުމަދު މާއިޝް ރަޝީދު ވަނީ އެޓީމަށް ލަނޑެއް ކާމިޔާބުކޮށްދީފައެވެ. ނަމަވެސް މާއިޝް ބޯޅަ ގޯލުގެ ތެރެއަށް ފޮނުވާލުމުގެ ކުރިން ލައިންސްމަން ހުރީ އޮފްސައިޑް ކަމަށް ދިދަ ނަގާފައެވެ. މިއާއެކު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މިހާފުގައި މާޒިޔާ ޓީމުން އެންމެ ހުސް ފުރުސަތެއް ލިބުނީ ހަމްޒާ އަށެވެ. ދެވަަނަ ހާފުގެ 66 ވަނަ މިނެޓުގައި ޓީސީގެ ޕެނަލްޓީ އޭރިއާ ރޮނގުމަތިން ކަހަލަގޮތަކަށް ހަމްޒާ ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. މީގެއިތުރުންވެސް މެޗުގެ ފަހުވަގުތު މާޒިޔާގެ ލީޑު ފުޅާކުރުމަށް ރަގަޅު ހުސް ފުރުސަތެއް ލިބި ހަމްޒާއަށް ވަނީ ބޭނުންކުރެވޭ ގޮތްނުވެފައެވެ.

މިރޭގެ މެޗުން ލިބުނު ތިން ޕޮއިންޓާއެކު ތިން ޓީމު ހިމެނޭ ގްރޫޕް އެކެއްގެ އެއްވަނައިގައި މިވަގުތު އޮތީ މާޒިޔާއެވެ. މި ގުރޫޕްގައި މާޒިޔާގެ އިތުރުން ދެން ހިމެނެނީ ޓީސީ ސްޕޯޓްސް ކުލަބާއި ބުރު ސްޕޯޓްސް ކުލަބެވެ. ގުރޫޕް ދޭއްގައި ހިމެނެނީ ކުލަބު ވެލެންސިއާ، ކުލަބު އީގަލްސް އަދި ސުޕަރ ޔުނައިޓެޑް ސްޕޯޓްސް އެވެ.

މި އަހަރުގެ ޕްރެސިޑެންޓްސް ކަޕްގައި ބައިވެރިވި 6 ޓީމު ދެ ގުރޫޕަކަށް ބަހާލައިގެން ކުޅޭ އިރު މުބާރާތުގެ ސެމީ ފައިނަލަށް ހޮވޭނީ ކޮންމެ ގުރޫޕަކުން އެއްވަނަ އަދި ދެވަނައަށް ދާ ދެ ޓީމެވެ.

މުބާރާތުގައި ފަސްކުރަން ޖެހުނު އީގަލްސް އާއި ވެލެންސިއާގެ މެޗު މާދަމާރޭ ކުޅޭ ގޮތަށް ކުރިން ނިންމި ނަމަވެސް މިހާރު އެ މެޗު ފަހުގެ ތާރީހަކަށް ރީ ޝެޑިއުލްކޮށްފައިވާއިރު، މުބާރާތުގެ މެޗެއް ދެން އޮންނަނީ އަންނަ ހުކުރު ދުވަހުގެ ރޭ އެވެ. އެމެޗުގައި ބައްދަލުކުރާނީ ކުލަބް ވެލެންސިއާ އާއި ސުޕަރ ޔުނައިޓެޑް ސްޕޯޓްސް އެވެ.