އަލުން އަނބުރާ ރައްޔިތުންގެ ވެރިކަމެއް މި ޤައުމުގައި އުފެއްދުމަށް މިހާރު ވެރިކަމުގައި ހުންނެވި އެމްޑީޕީގެ ރިޔާސީ ކެންޑިޑޭޓު އިބްރާހިމް މުޙައްމަދު ޞާލިހު ކުރިއަށް އޮތް ރިޔާސީ އިންތިޚާބުގައި ބޮޑުތަނުން ބަލިކުރުމަކީ ލާޒިމުކަމެއް ކަމަށް މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަމުންނެވެ.
އޭނާ ވިދާޅުވީ ޑިމޮކްރެޓިކް ވެރިކަމަށް ޤާއިމުކުރުމަށް 2008 ވަނަ އަހަރު ކުރި މަސައްކްތަ މިހާރު އަލުން ކުރަން ޖެހިފައިވާ ކަމަށެވެ.
މި ވެރިކަމުގައި ފެނިގެން ދަނީ ރާއްޖޭގައި ހުރި ބޮޑެތި މައްސަލަތައް ސަރުކާރުން އެއްވެސް ފަރުވާލެއް ނުބަހައްޓާކަން ވަހީދު ފާހަގަކުރެއްވި އެވެ.
ފެނަކަ ކުންފުނީގެ މައްސަލައިން މިސާލު ނަންގަވަމުން އޭނާ ވިދާޅުވީ އެ ކުންފުނިން ކުދި ވިޔަފާރިތަކަށް ފައިސާ ނުދައްކާތީ އެ މައްސަލަ މަޖިލީހަށް ހުށައެޅުމުން ސަރުކާރަށް ތާއީދުކުރާ މެމްބަރުން އެ މައްސަލަ ބޭރުކޮށްލާފައިވާއިރު، ރައްޔިތުންގެ މަޖިލީހުގެ ބައެއް މެމްބަރުން ފެނަކަ ކުންފުނީގެ އިސްވެރިން ކޮންޓްރޯލު ކުރާކަމަށް އެބޭފުޅުން މޭގައި އަތްޖަހާލާފައި ފަޚުރުވެރިކަމާއެކު ބުނަމުންދާ ކަމަށެވެ.
މަސްތުވާތަކެތީގެ މައްސަލަ ޙައްލުކުރުމަށް މެނިފެސްޓޯގައި ހުރި ކަންކަންވެސް ފުއްދާދެވިފައި ނުވާއިރު ޒުވާނުން ޑަސްޓްބިން ހޮވައިގެން ކާ މަންޒަރު މަގުތަކުން ފެނަމުންދާކަމަށް އޭނާ ވިދާޅުވި އެވެ. އަދި އެ ކަންކަމަކީ ރާއްޖޭގައި ޑިމޮކްރެޓިކް ވެރިކަމެއް ޤާއިމު ނުކުރެވޭކަމުގެ ދަލީލެއްގެ ގޮތުގައި އޭނާ ވަނީ ސިފަކުރައްވާފަ އެވެ.
އެއާއެކު ވަހީދު ވިދާޅުވީ އަލުން އަނބުރާ މި ގައުމުގައި ރައްޔިތުންގެ ވެރިކަމެއް ޤާއިމުކުރުމަށް އަންނަ ރިޔާސީ އިންތިޚާބުގައި އިބްރާހިމް މުޙައްމަދު ޞާލިހު ބަލިކުރަން ޖެހޭކަމަށެވެ. އަދި ރައްޔިތުން ނިކުމެ ރައީސް ޞާލިހު އިންތިޚާބުން ބަލިކުރާތަން މުޅި ދުނިޔެއަށް ފެނިގެންދާނެކަމަށް ވަހީދު ވިދާޅުވި އެވެ.
"މިހާރު އެބަ ޖެހޭ 2008 ގައި ތައާރަފްކުރި ޑިމޮކްރެޓިކް ވެރިކަން އަލުން ސަލާމަތްކުރަން މަސައްކަތް ކުރަން. އަލުން އަނބުރާ ރައްޔިތުންގެ ވެރިކަމެއް ޤާއިމުކުރުމުގެ މަސައްކަތް ކުރަން، އެކަން ކުރުމަށްޓަކައި އަޅުގަނޑު ހަމަ އަނެއްކާވެސް ދަންނަވާލާނީ މިހާރު ވެރިކަމުގައި މިހިރަ އިބްރާހިމް މުޙައްމަދު ޞާލިހަށް އަޅުގަނޑުމެން ހަމަ ހިލާ އެއްގޮތަކަށްވެސް ނުވާނެ ދެވަނަ ފުރުސަތު ދީގެނެއް. ރާއްޖޭގައި ރައްޔިތުންގެ ވެރިކަމެއް ޤާއިމްކުރުމަށްޓަކައި ރަނގަޅު ހެޔޮ ވެރިކަމުގެ ނިޒާމެއް ދެމިއޮތުމަށްޓަކައި، ދެ ފުށްފެންނަ ކޮރަޕްޝަން ނެތް، ވެރިކަމެއް ހިންގުމަށްޓަކައި އަޅުގަނޑުމެންނަށް މިއަދު ލާޒިމުވޭ ރާއްޖޭގެ ވެރިކަމުގައި މިއަދު އެ ހުރި އިބްރާހިމް މުޙައްމަދު ޞާލިހު ކުރިއަށް އޮތް ރިޔާސީ އިންތިޚާބުގައި ބަލިކުރަން"
އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ)
ވަހީދުގެ އިތުރުން މަޖިލީހުގެ ރައީސް މުޙައްމަދު ނަޝީދަށް ތާއީދުކުރައްވާ ގިން މެމްބަރުން ގެންދަވަނީ ރައީސް ޞާލިހަށް ދެވަނަ ދައުރެއް ދޭން ނުޖެހޭކަމަށް ވިދާޅުވަމުންނެވެ.
އެމްޑީޕީގައި ތިއްބަވާ އެ ޕާޓީގެ ތެރެއިން "ފިކުރެއްގެ ދިރުން" ނަމުގައި ގޮތްޕެއް ހައްދަވައިގެން ނަޝީދާއި އޭނާގެ ވަފާތެރިން ރިޔާސީ އިންތިޚާބުގައި ޤާސިމާއެކު ކޯލިޝަން ހެދުމުގެ މަސައްކަތްތައް ދަނީ ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
