ޔުއެފާ ޗެމްޕިއަންސްލީގުގެ ކުއާޓަރ ފައިނަލްގެ ފުރަތަމަ ލެގުގައި މިރޭ އަމިއްލަ ދަނޑުގައި ވަރުގަދަ ބަޔާން މިއުނިކް 3-0 ގެ ނަތީޖާއަކުން ބަލިކޮށް މެންޗެސްޓާ ސިޓީ އިން މުބާރާތުގެ ސެމީ ފައިނަލުގެ ފުރުސަތު ބޮޑުކޮށްފި އެވެ.

މެންޗެސްޓަރ ސިޓީގެ އިއްތިހާދު ސްޓޭޑިއަމްގައި މިރޭ ކުޅެވުނު މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި މެންޗެސްޓަރ ސިޓީއަށް ލީޑު ނަގައިދިނީ އެޓީމުގެ ސްޕެނިޝް މިޑްފީލްޑަރު ރޮޑްރީއެވެ. މިއީ އެޓީމުގެ ޕޯޗުގަލް މިޑްފިލްޑަރު ބެނާޑޯ ސިލްވާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބެނާޑޯ ސިލްވާ ސިޓީގެ ދެވަަނަ ލަނޑު ކާމިޔާބުކޮށްދެނީ 

ފުރަތަަމަ ހާފުގައި ބަޔާންގެ ޒުވާން މިޑްފިލްޑަރު ޖަމާލު މުސިއާލާ އަށް ލިބުނު ހުސް ފުރުސަތުގައި އޭނާ ފޮނުވާލި ހަމަލާއެއް ސިޓީގެ ޑިފެންޑަރުން ބުލޮކުކުރިއިރު ފަހުވަގުތު ސާނޭ ފޮނުވާލި ބޯޅަ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ.

ދެވަަނަ ހާފު ފެށިގެން ފުރަތަަމަ 10 މިނެޓު ތެރޭގައި މެޗުގެ ނަތީޖާ އެއްވަރުކުރުމަށް ބަޔާންގެ ފޯވާޑް ސާނޭއަށް ލިބުނު ފުރުސަތުތަކުގައި ބޭނުން ނުހިފުމުގެ ނަތީޖާއަކަށްވީ ދެވަަނަ ހާފުގެ 70 ވަނަ މިނެޓުގައި މެންޗެސްޓާ ސިޓީ އިން އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކުރުމެވެ.

މި ލަނޑު އެޓީމަށް ކާމިޔާބުކޮށްދިނީ ޕޯޗުގަލްގެ މިޑްފީލްޑަރު ބެނާޑޯ ސިލްވާއެވެ. މިއީ އެޓީމުގެ ނޯވޭ ފޯވާޑް ހާލަންޑް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ސިޓީގެ ތިންވަނަ ލަނޑު 76 ވަނަ މިނެޓުގައި ކާމިޔާބުކޮށްދިނީ ހާލަންޑް އެވެ. މިއީ އެޓީމުގެ އިގިރޭސި ޑިފެންޑަރު ސްޓޯން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ މިއަހަރުގެ މުބާރާތުގައި ހާލަންޑް ކާމިޔާބު ކުރި 11 ވަނަ ލަނޑެވެ.

މި ދެޓީމުގެ މެދުގައި ކުޅެވޭ ކުއާޓާ ފައިނަލުގެ ދެވަނަ ލެގު އޮންނާނީ މިމަހުގެ 20 ވަނަ ދުވަހުގެ ރޭ ބަޔާން މިއުނިކްގެ ދަނޑުގައެވެ. އެމެޗު އެއްވަރު ކޮށްލައިގެން ސެމީގެ ޖާގައެއް ހޯދުމުގެ ފުރުސަތު މެންޗެސްޓަރ ސިޓީއަށް އޮތް އިރު، ބަޔާން މިއުނިކް ސެމީގެ ޖާގައެއް ލިބެން އޮތީ އެ މެޗު ހަތަރު ލަނޑުގެ ތަފާތަކުން މޮޅުވެގެންނެވެ.

މިދެޓީމު ވާދަވެރި މެޗެއްގައި އެންމެ ފަހުން ބައްދަލުކޮށްފައި ވަނީ 2014 ވަނަ އަހަރުގެ ޗެމްޕިއަންލީގުގެ ގްރޫޕް ސްޓޭޖުގައެވެ. އެފަހަރު ބަޔާންގެ ދަނޑުގައި ކުޅުނު މެޗު 1-0 ގެ ނަތީޖާއަކުން އެޓީމު މޮޅުވިއިރު ސިޓީގެ ދަނޑުގައި ކުޅުނު ދެވަނަ މެޗު 3-2 ގެ ނަތީޖާއަކުން ކާމިޔާބުކުރީ މެންޗެސްޓަރ ސިޓީއެވެ.