މާލެ ސަރަހައްދުގެ ގޭގެއާއި ވިޔަފާރިތަކުން އުފެދޭ ކުނި މަގުމައްޗަށް ނެރެން ވެމްކޯއިން އަންގާފައި ނުވާނެ ކަމަށް ވެމްކޯގެ މެނޭޖިން ޑިރެކްޓަރު ޔޫސުފް ސިރާޖު ވިދާޅުވެއްޖެއެވެ.
ސިރާޖު މިހެން ވިދާޅުވީ، ރައްޔިތުންގެ މަޖިލީހުގެ ސަރުކާރުގެ ކުންފުނިތަކާ ބެހޭ ކޮމިޓީގައި ވާހަކަ ދައްކަވަމުންނެވެ. ސިރާޖު އެ ކޮމިޓީއަށް ހާޒިރު ކޮށްފައި ވަނީ ވެމްކޯގެ ހިދުމަތްތަކުގެ އަގު ބޮޑުކޮށްފައިވާ ކަމަށް ބުނެ ހުށަހަޅާފައިވާ މައްސަލައަކާ ގުޅިގެންނެވެ.
ކޮމިޓީގައި ވާހަކަ ދަައްކަވަމުން ސިރާޖު ވިދާޅުވީ، އެ ކުންފުނީގެ އިއުލާނުގައި ފާހަގަ ކޮށްފައި ވާނީ ކުނި ނަގަމުންދާނެ ދެގޮތެއް ކަމަށާއި އެއީ އެޕާޓްމަންޓްގެ ދޮރުމަތިންނާއި ގޭގޭގެ އެންމެ ތިރީ ފްލޯއިން ކުނި ނެގުމަށް ކަމަށެވެ.
ނަމަވެސް މަގުމައްޗަށް ކުނި ނެރެން އެއްވެސް އިރެއްގައި އަންގާފައި ނުވާނެ ކަމަށް ސިރާޖު ވިދާޅުވިއެވެ. އަދި މަގުމައްޗަށް ކުނި ނެރުމަށް ބާރު ނާޅާ ކަމަށާއި އެއީ ރައްކާތެރި ގޮތެއްވެސް ނޫންކަމަށް ސިރާޖު ވިދާޅުވިއެވެ.
ސިރާޖު މިފަދައިން ވިދާޅުވެފައި ވާއިރު، ކުނި މެނޭޖްކުރުން ގާނޫނީ އިމުގެ ތެރެއިން ކުރިއަށް ގެންދަން އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން އިލްތިމާސްކޮށްފައި ވަނީ މިދިޔަ ހޯމަ ދުވަހުއެވެ.
މާލެ ސަރަހައްދުގެ މަގުތަކަށް ކުނި އެޅުމާއި ކުނިނެރިފައި މަގުތަކުގައި ބެހެއްޓުމާ ގުޅޭގޮތުން އީޕީއޭއިން ކުރި އިއުލާނެއްގައި ބުނީ، މިހާރަކަށް އަހިސް މާލެ ސަރަހައްދުގެ މަގުތަކަށާއި ގޭދޮރުމައްޗަށާއި ކަންކަންމައްޗަށް ކުނި ނެރެފައި ބެހެއްޓުން އަދި ކުނި ޖަމާކުރުން ވަރަށް ބޮޑަށް އިތުރުވެފައި ވާކަމަށެވެ.
އޭގެ ސަބަބުން ތަފާތު އެކި އުނދަގޫތައް ކުރިމަތިވަމުން ދާކަން ފާހަގަކޮށް އީޕީއޭއިން ބުނީ މަގުތަކުގެ ސާފުތާހިރުކަން ގެއްލި މަގުތައް ގޮނޑުވަމުންދާ ކަމަށެވެ.
އީޕީއޭއިން ބުނީ، ކުނި ގެންދާނެ ކަމަށް ބަލައި ގޭގެ ދޮރުން ބޭރު، ދުވާރުގައި ނުވަތަ ކަންކަންމަތީގައި ކުނި ބަހައްޓާކަމަށާއި ކުނި ގެންދާ މީހުން އަންގައިގެން ކަމަށް ބުނެ މަގުމައްޗަށް ނު ނެރޭކަން ފާހަގަ ކުރެވިފައި ވާކަމަށެވެ. އަދި ވަކި ގަޑިއެއް ނުބަލާ ކުނި ނެރޭ ކަމަށް އީޕީއޭއިން ވަނީ ފާހަގަ ކޮށްފައެވެ.
އެފަދަ ކަންކަމަކީ ކުނި މެނޭޖް ކުުރުމުގެ ގާނޫނާއި ގަވާއިދު ހުއްދަކުރާ ކަންކަމަށް ނުވާތީ، އެކަންކަން ނުކުރުމަށް އީޕީއޭއިން ވަނީ ނަސޭހަތްތެރި ވެފައެވެ.
"އެއްވެސް ސަބަބަކާ ހުރެ ކުނިވާ ޒާތުގެ ކުނިކޮތަޅުތަކާއި އެހެނިހެން ކުނި މަގުތަކަށާއި ދުވާރުމަތީގައާއި ކަންކަންމަތީގައާއި ހުސްތަންތަނަށް ނެރެފައި ބެހެއްޓުމަކީ ގަވާއިދާ ޚިލާފު ކަމެއް" އީޕީއޭއިން ބުންޏެވެ.
ކުނި އުކާލުމުގެ ހިދުމަތްދޭ މުވައްޒަފަކު، ކުނި ނެރުމަށް ބުނެގެން ނުވާނެ ކަމަށާއި އެފަދައިން ބުނި ނަމަވެސް އެއަށް އަމަލު ކޮށްގެން ނުވާނެ ކަމަށް އީޕީއޭއިން ބުންޏެވެ.
Advertisement
This content is created and paid for by advertisers and does not involve Voice Journalists
