ފީފާއިން ފިޔަފާރި ކުންފުންޏެއް ހަދައިގެން މުބާރާތްތަކުގެ ހިއްސާ ވިއްކުމަށް ކުރަން އުޅުނު މަސައްކަތުގައި ބައިވެރިވުމެއް ނޯންނާނޭކަމަށް އާސެނަލްގެ ކުރީގެ ކޯޗް އަދި ފީފާގެ މުހިންމު މަގާމެއް ފުރަމުން އަންނަ އާސެން ވެންގާ ވިދާޅުވެއްޖެއެވެ.

ވެންގާއަކީ ފީފާގެ ޗީފް އޮފް ގްލޯބަލް ފުޓްބޯލް ޑިވެލޮޕްމަންޓްގެ އެންމެ އިސް ވެރިޔާއެވެ. އޭނާ އެ މަގާމަށް އައްޔަނުކޮށްފައިވަނީ އިންފަންޓީނޯގެ ލަފާގެ މަތިންނެވެ. މިހާރު ޖެހިގެން އުޅޭ މައްސަލައާ ގުޅިގެން ޔޫއެފާގެ ވަކީލުން ފޮނުއްވި ސިޓީގައި، މައްސަލައިގެ ހެކީގެ ގޮތުގައި މުއާމަލާތްތަކާއި މައުލޫމާތުތައް ރައްކާތެރިކޮށް ބަލަހައްޓަންޖެހޭ 18 މަސްއޫލުވެރިންގެ ތެރޭގައި ފްރާންސަށް ނިސްބަތްވާ ވެންގާގެ ނަން ހިމެނެއެވެ.

މި މައްސަލާގައި ވެންގާ ނެރެފައިވާ ބަޔާނުގައި ވިދާޅުވެފައި ވަނީ، ކުރިއަށްހުރި ވަރލްޑްކަޕް ކަޕްތަކުގެ ފައިދާއިން ބައެއް އަމިއްލަ އިންވެސްޓަރުންނަށް ވިއްކާލުމަށް ފީފާގެ ރައީސް ޖިއާނީ އިންފަންޓީނޯ ގެންގުޅުއްވި ނާކާމިޔާބު މަޝްރޫއާ އޭނާއާ އެއްވެސް ގުޅުމެއް ނެތްކަމަށެވެ. ވެންގާގެ ބަޔާނުގައި އިންފަންޓީނޯގެ ނަން ގެނެސްފައެއް ނުވެއެވެ. ވެންގާ ވިދާޅުވެފައިވަނީ މިކަމުގެ މައުލޫމާތު އެންމެ ފުރަތަމަ ލިބުނީ މީޑިއާ ރިޕޯޓްތަކުން ކަމަށެވެ. ވެންގާ ވިދާޅުވީ މި މަޝްރޫއު ހުއްޓާލުމަށް ނިންމި ނިންމުމަކީ ކޮންމެހެން ކުރަންޖެހޭ އަދި ސުވާލެއް އުފެދޭ ކަމެއްވެސް ނޫން ކަމަށެވެ. ސަބަބަކީ ފީފާއަކީ މިނިވަންކަމާއެކު، ދެފުށް ފެންނަ ގޮތަށް އަދި ނަޒާހަތްތެރިކަމާއެކު ފުޓްބޯޅައަށް ހިދުމަތްކުރާ އިދާރާއަކަށް ވާންޖެހޭނެ ކަމަށެވެ.

ފީފާގެ މުބާރާތްތަކުގެ ހިއްސާ ވިއްކާލުމަށް ނިންމި މައްސަލާގައި ވިލާތުގެ ޤައުމުތަކުގެ އިތުރުން އެނޫންވެސް ސަރަހައްދީ ފުޓްބޯޅަ އެސޯސިއޭޝަންތަކުން ވަނީ އިންފަންޓީނޯއާ ދެކޮޅަށް ނިކުމެފައެވެ. ފުޓްބޯޅަ އިދާރާތަކާއި އޮފިޝަލުންގެ ފަރާތުން ކުރިމަތިވި ފާޑުކިޔުންތަކާ ގުޅިގެން، އިންފަންޓީނޯ ވަނީ 20 ބިލިއަން ޑޮލަރުގެ މި ހުށަހެޅުން ހޮނިހިރު ދުވަހު އަނބުރާ ގެންގޮސްފައެވެ. ޔޫއެފާއިން ވަނީ މިކަން ކުރިއަށް ގެންގޮސްފިނަމަ ފީފާގެ ހުރިހާ މުބާރާތްތަކެއް ބޮއިކޮޓް ކުރާނެ ކަމުގެ އިންޒާރުވެސް ދީފައެވެ. އަދި އެ ޖަމާއަތުން ދަނީ މި މައްސަލާގައި ޤާނޫނީ ފިޔަވަޅު އެޅުމަށް ތައްޔާރުވަމުންނެވެ.

އިންފަންޓީނޯ އިސްވެ ހުރެ ކުރިއަށްގެންދިއުމަށް ނިންމި މި ރޭވުމުގެ ދަށުން "ފީފާ ފޯވާޑް އެންޓަޕްރައިޒް" (އެފްއެފްއީ) ގެ ނަމުގައި ސަބްސިޑިއަރީ ކުންފުންޏެއް އުފައްދައި، ވޯލްޑް ކަޕް ފަދަ މުބާރާތްތައް އިންތިޒާމުކުރުމާއި، ބްރޯޑްކާސްޓިން އަދި ސްޕޮންސާޝިޕް ރައިޓްސް ވިއްކުން ފަދަ އާމްދަނީ ލިބޭ ކަންކަން އެ ކުންފުނީގެ ދަށަށް ބަދަލުކުރުމަށް އޮތީ ހަމަޖެހިފައެވެ.

އެ ކުންފުނީގެ 20 އިންސައްތަ ހިއްސާ އަމިއްލަ އިންވެސްޓަރުންނަށް ވިއްކައިގެން 4.2 ބިލިއަން ޑޮލަރު ހޯދުމަށް އޮތީ ހުށަހަޅާފައެވެ. މިކަމުގައި އެންމެ އިސްކޮށް ބައިވެރިވާ އިންވެސްޓަރަކީ އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރިފުޅު ޖެރެޑް ކުޝްނާގެ ކޮއްކޮ ޖޯޝުއާ ކުޝްނާގެ "ތްރައިވް އިޓާނަލް" ކުންފުންޏެވެ.