އަވައްޓެރި ސްރީލަންކާހގައި އެކްސްޕްރެސްވޭތަކުގައި ދުއްވާ އުޅަނދުތަކުގައި ސީޓް ބެލްޓް ހަރުކުރުމަށް އުޅަނދު އުފައްދާ ފަރާތްތަކަށް ދީފައި އޮތް މުއްދަތު ތިން މަސް ދުވަހަށް އިތުރުކޮށްދީފިއެވެ.

މޮޓޯ ވެހިކަލްސް ޤާނޫނުގެ ދަށުން ނެރެފައިވާ 2011 ވަނަ އަހަރުގެ މޮޓޯ ވެހިކަލްސް (އެކްސްޕްރެސްވޭ) އަމުރުގެ ދެ ވަނަ ނަންބަރުގައި ބަޔާންކޮށްފައިވާ ގޮތުން އެކްސްޕްރެސްވޭތަކުގައި ދަތުރުކުރާ ކޮންމެ އުޅަނދެއްގެ ހުރިހާ ފަސިންޖަރުންނަށް ސީޓް ބެލްޓް އެޅުން ލާޒިމެވެ. ސީޓް ބެލްޓް ނެތް އުޅަނދުތަކުގައި އެ ތަކެތި ހަރުކުރުމަށް ކުރިން ދީފައި އޮތް މުހުލަތު ހަމަވީ 2026 ވަނަ އަހަރުގެ ޖޫން 19 ވަނަ ދުވަހުއެވެ.

ސިނާޢީ ދާއިރާގެ ބައެއް ފަރާތްތަކުން އެ މުއްދަތު އިތުރުކޮށްދިނުމަށް އެދުމުން ސަރުކާރުން ވަނީ މިއަހަރުގެ ޖޫން 17 ވަނަ ދުވަހު ގެޒެޓްކުރި އެ އަމުރު އިޞްލާޙުކޮށް މުހުލަތު ސެޕްޓެމްބަރު 19 ވަނަ ދުވަހާ ހަމައަށް ދަންމާލާފައެވެ.

މި ބަދަލު ގެނައުމަށް ޓްރާންސްޕޯޓް ހައިވޭސް އެންޑް އާބަން ޑިވެލޮޕްމެންޓް ވަޒީރު ޤާނޫނު ހަދާ މަޖިލީހުގެ ރުހުން ހޯދުމަށް ހުށަހެޅުމުން ވަޒީރުންގެ މަޖިލީހުން ވަނީ ރުހުން ދީފައެވެ.

ސްރީލަންކާގެ ހައިވޭތަކުގައި ދަތުރުކުރާއިރު، އުޅަނދުގައި ތިބޭ ޑްރައިވަރުންގެ އިތުރުން ދަތުރުވެރިންވެސް ސީޓްބެލްޓް އެޅުން މަޖުބޫރެވެ. މި ގަވާއިދު ހަރުކަށިކަމާއެކު ތަންފީޒުކުރުމަށް ފުލުހުން ހާއްސަ ސަމާލުކަމެއް ދެއެވެ. ސީޓް ބެލްޓް ނާޅާ ދަތުރުކުރާ ފަރާތްތަކާއި އުޅަނދު ދުއްވާ ފަރާތް، 1,000 އާއި 2,000 ސްރީލަންކަން ރޫޕީސް އާ ދެމެދުގެ އަދަދަކުން ޖޫރިމަނާ ކުރެވޭ ގޮތަށް ވަނީ ކަނޑައަޅާފައެވެ.