ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބައި-އިލެކްޝަންގެ ވޯޓު ކަރުދާސް ޗާޕްކޮށްފި ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އީސީއިން ކުރި އިއުލާނެއްގައި ބުނީ، ވޯޓު ކަރުދާސް ޗާޕު ކޮށްފައި ވަނީ ނޮވެލްޓީ ޕްރިންޓަރސް އެންޑް ޕަބްލިޝަރސް ޕްރައިވެޓް ލިމިޓެޑުން ކަމަށާއި، ޖުމުލަ 3423 ވޯޓު ކަރުދާސް ޗާޕު ކޮށްފައިވާ ކަމަށެވެ.

ގުރައިިދޫ ދާއިރާގެ ބައި-އިލެކްޝަން ބޭއްވުމަށް ހަމަޖެހިފައި ވަނީ އަންނަ ހޮނިހިރު ދުވަހުއެވެ.

Advertisement

ގުރައިދޫ ދާއިރާ އަށް ވާދަކުރުމުގެ މުއްދަތު ހަމަވެފައިވާއިރު، އެ ދާއިރާއަށް ވެރިކަން ކުރާ މައި ޕާޓީ، އެމްޑީޕީންނާއި، އިދިކޮޅު ޕީޕީއެމްގެ އިތުރުން އެމްއެންޕީން ވެސް ވާދަކުރެއެވެ. 

އެމްޑީޕީ - އިބްރާހީމް ޝާޒް

ޕީޕީއެމް - ހުސައިން ރިޒާ

އެމްއެންޕީ - އަލީ އާރިފް

ގުރައިދޫ ދާއިރާގެ ގޮނޑި ހުސްވެފައިވަނީ ކުރިން އެ މަގާމު ފުރުއްވަމުންދިޔަ ޕީޕީއެމްގެ މެންބަރު އިބްރާހީމް ރިޒާ އަވަހާރާވުމާއި ގުޅިގެންނެވެ.

މެންބަރު ރިޒާ އަވަހާރަވީ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވަނިކޮށް ފެބްރުއަރީ 22 ވަނަ ދުވަހުގެ ރޭ މެލޭޝިއާގައެވެ.

އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުން ގެންދެވި ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ.

އެދާއިރާއަށް ޕީޕީއެމްގެ ފަރާތުން ވާދަކުރައްވާ ހުސައިން ރިޒާ އަކީ އިބްރާހިމް ރިޒާގެ ކޮއްކޮ އެކެވެ.