ރާއްޖޭގެ 4 ރަށެއްގެ ކުނި މެނޭޖްކުރާ މަރުކަޒުތަކުގެ މަސައްކަތާއި ގުޅޭ އެއްބަސްވުންތަކުގައި އިއްޔެ ސޮއިކޮށްފިއެވެ.

އިއްޔެ އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތެއްގައި މި މަޝްރޫޢު ޙަވާލުކުރުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު މުހައްމަދު އަންސާރެވެ. މަސައްކަތާއި ހަވާލުވި ވެހިކަން ބިލްޑާސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އަހުމަދު ރަޝީދެވެ.

އެކުންފުންޏާއި އެންވައިރަމެންޓް މިނިސްޓްރީ އާއި ދެމެދު ސޮއި ކުރެވުނު އެއްބަސްވުންތަކަކީ ދ މާއެނބޫދޫ، ތ ތިމަރަފުށީ އަދި ތ ގުރައިދޫގައި ކުނި މެނޭޖްކުރާ މަރުކަޒު ގާއިމް ކުރުމަށާއި ފ ނިލަންދޫގައި ގާއިމް ކޮށްފައިހުރި ކުނި މެނޭޖްކުރާ މަރުކަޒު އަޕްގްރޭޑް ކުރުމަށެވެ.

އިއްޔެ ހަވާލިކުރެވުނު މި 4 ރަށުގެ ކުނި މެނޭޖްކުރާ މަރުކަޒުގެ މަސައްކަތަށް ޖުމްލަ 17.8 މިލިއަން ރުފިޔާ ޚަރަދުވާނެކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ. އެގޮތުން ދ. މާއެނބޫދޫ މަރުކަޒުގެ މަސައްކަތަށް 4.3 މިލިއަން ރުފިޔާ، ތ. ތިމަރަފުށީ މަރުކަޒުގެ މަސައްކަތަށް 5 މިލިއަން ރުފިޔާ، އަދި ތ. ގުރައިދޫގައި ޤާއިމުކުރާ ކުނި މެނޭޖްކުރާ މަރުކަޒަށް 4.4 މިލިއަން ރުފިޔާ ޚަރަދުވާނެކަމަށް އެ މިނިސްޓްރީއިން ވިދާޅުވެއެވެ.

މީގެ އިތުރުން ފ. ނިލަންދޫ ވޭސްޓް އެންޑް ރިސޯސް މެނޭޖްމަންޓް ސެންޓަރު އަޕްގްރޭޑްކުރުމުގެ މަސައްކަތަށް 4.1 މިލިއަން ރުފިޔާ ޚަރަދުވާނެކަމަށްވެސް އެމިނިސްޓްރީއިން ވިދާޅުވެއެވެ. މި 4 މަޝްރޫއު ނިންމާލެވޭނެ ކަމަށް ބެލެވެނީ މަސައްކަތް ފަށާ ތާރީޚުން ފެށިގެން ގާތްގަނޑަކަށް 180 ދުވަސް ތެރޭގައިކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ.. އެންވަޔަރުމަންޓް މިނިސްޓްރީއިން ވިދާޅުވީ، މި މަޝްރޫޢު ނިމުމުން މި 4 ރަށުގައިވެސް ރަށު ފެންވަރުގައި ކުނި މެނޭޖްކުރާ މަރުކަޒުން (ޑަބްލިއުއާރްއެމްސީ) ކުނި ވަކިކޮށް، އަލުން ބޭނުން ހިފޭ ކުނި ރައްކާކޮށް، އަދި ނައްތާ ނުލެވޭ ޒާތުގެ ކުނި ސަރަހައްދީ ކުނި މެނޭޖްކުރާ މަރުކަޒަށް ގެންދިއުމަށް މަގުފަހި ވެގެންދާނެ ކަމަށެވެ. އަދި މި 4 ރަށުގައި ގާއިމުކުރާ ނިޒާމާއެކު ރަށުގައި ކުނި އެންދުމާއި، ޖަމާވުން ހުއްޓުމަކަށް ގެނެވޭނެ ކަމަށް އެންވަޔަރުމަންޓް މިނިސްޓްރީން ވިދާޅުވެއެވެ. މި 4 މަޝްރޫޢު ކުރިއަށް ގެންދަނީ މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އިން ޒޯން 4 އަދި 5 ގައި ތަންފީޒު ކުރަމުންދާ މޯލްޑިވްސް ކްލީން އެންވަޔަރަންމަޓް ޕްރޮޖެކްޓް މެދުވެރިކޮށް ވޯލްޑް ބޭންކުގެ ހިލޭ އެހީގެ ދަށުންކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ