އެމްޑީޕީގެ ޗެއާޕާސަން ފައްޔާޒު ޢިސްމާއީލް އެޕާޓީގެ ރައީސް މުހައްމަދު ނަޝީދާއި ފިކުރެއްގެ ދިރުން ފެކްޝަނުގެ މެންބަރުންނަށް ބަހުގެ ހަމަލާތަކެއް ރައްދު ކުރައްވައިފި އެވެ. 

އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފައްޔާޒު ފޮނުވި މެސެޖެއްގައި ވަނީ، ޕާޓީގެ "އިސް ސަފުގައި" ތިބި ބޭފުޅުން އެމްޑީޕީއަށް ގުރައިދޫ ދާއިރާގެ ގޮނޑި ގެއްލުވާލުމަށް ދާއިރާއަށް ނިސްބަތްވާ އެމްޑީޕީގެ މެންބަރުންނަށް ގުޅައި ޕާޓީގެ ޓިކެޓަށް ވޯޓު ނުދިނުމަށް އަންގަމުންދާ ކަމަށް ތުހުމަތު ކުރައްވާފަ އެވެ. 

"ޕާޓީގެ އިސް ސަފުގައި ތިބި ބޭފުޅުން އެމްޑީޕީއަށް ގުރައިދޫ ދާއިރާގެ ގޮނޑި ގެއްލުވާލުމަށް ދާއިރާއަށް ނިސްބަތްވާ އެމްޑީޕީގެ މެންބަރުންނަށް ގުޅައި ޕާޓީގެ ޓިކެޓަށް ވޯޓު ނުދިނުމަށް ކުރާ މަސައްކަތް އެންމެ ހަރުކަށި ބަހުން ކުށްވެރިކުރަން،" ފައްޔާޒު ފޮނުވި މެސެޖެއްގައިވެ އެވެ.

Advertisement

މިއާއެކު ފައްޔާޒު ވިދާޅުވީ، ޕާޓީ ފުނފުނޑުކޮށްލަން ކުރާ މަސައްކަތް މިހާރު އޮތީ "އެހެން ހިސާބެއްގައި" ކަމަށާ، އެ ފަރާތްތަކާއި މެދު ފިޔަވަޅު އަޅަން ފަސްނުޖެހޭނެކަމަށެވެ. 

"ރިޔާސީ ޓިކެޓާ ގުޅިގެން އުފެދިފައިވާ ތުންފިއްތުން މިހާރު މުޅިން އެހެން ހިސާބަކަށް ގޮސް، ޕާޓީ ފުނޑުފުނޑު ކޮށްލަން ކުރާ މަސައްކަތް އިރާދަކުރެއްވިއްޔާ ކާމިޔާބުވިޔަ ނުދޭނަން. އިޙްތިރާމުު ކުރުމުގެ ގޮތުން ބެލޭނީ ވަކި ހިސާބަކަށް،" އޭނާ ވިދާޅުވިއެވެ.

މާދަމާ އޮންނަ ގުރައިދޫ ދާިއރާގެ ބައި އިލްކްޝަންގެ ކެމްޕެއިން މިއަދު ނިންމާލިއިރު އެދާއިރާގައި އެމްޑީޕީން ބާއްވަން ނިންމި ބައެއް އިވެންޓުތައްވެސް ވަނީ ކެންސަލް ކޮށްފަ އެވެ.

އެމްޑީޕީގެ ޗެއާޕާސަން އިންތިޚާބުގެ ކުރިން އެ ޕާޓީ ތެރެއިން އުފެދުނު ބައިބައިވުންތައް އިތުރުވެ، ރިޔާސީ ޕްރައިމަރީއަށްފަހު ރައީސް ނަޝީދުގެ ފެކްޝަނުން ވަނީ "ފިކުރެއްގެ ދިރުން" ނަމުގައި ވަކި ގޮތްޕެއް ވެސް އުފައްދަވާފައެވެ. އެ ގޮފިން ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ހޯދައި ދިނުމުގެ ބަދަލުގައި މަސައްކަތް ކުރަމުންދަނީ، ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް އާއި އެކުގައެވެ.