މިއިސްލާމީ ދީބުގެ އަންހެނުންގެ ޙާލަތަށް ބަލައިލުމުން މިއަދު މިފެންނަނީ ވަރަށް ތަފާތު ހައިރާން ކުރުވަނިވި މަންޒަރެކެވެ. ގިނަ އަންހެނުން މިވަނީ ޢައުރަ ނިވާކުރުމުގެ މާތް މަތިވެރިން އަޅުކަމުން އެއްކިބާވެ ދުރުވެފައެވެ. އެނގިގެން ނުވަތަ ނޭންގިވިޔަސް އިސްލާމީ ޖިލްބާބަށް ނުވަތަ ހިޖާބަށް މަލާމަތްކުރާ ޙާލު ހެދުން އަޅާ އަންހެނުން މަދެއްނޫނެވެ. އެންމެ ފުރަތަމަ ކަޝްފުކުރީ އެބައިމީޙުންގެ ފައިތިލަތަކެވެ. އޭގެ ފަހުގައި އެޅި ބުރުގާތައް ކުދިވެ މޭމަތިވެސް ނުފޮރުވޭވަރަށް ބޮލުގެ ވަށައިގެން އެބުރުގާ ފޮތިކޮޅު އޮޅަންފެށިއެވެ. އެއަށްފަހު ބޮޑެތި ދިގު ދޫ ހެދުންތައް ކުރުވެ ގަޔަށް ބާރުކުރަންފެށިއެވެ. ބާރު ޖިންސާއި ޓީޝާރޓުތަކުން އަޅާ ހެދުން އެޅުން ޢާއްމުވެގެންދިޔައެވެ. ބައެއްފަހަރު ތުނިވެގެން ގޮސް އެތެރޭން ލާފައި ހުންނަ ފޭރާން ކަޝްފުވެ ބޮލުގެ އިސްތަށިގަނޑުވެސް ހާމަވާގޮތަށް ހެދުން އަޅައެވެ. އަނެއްބަޔަކު ބުރުގަލުގެ ދަށުން ކަރުގައި އަޅާފައި އޮންނަ ފަށް ދައްކަންފެށިއެވެ. ބުރުގަލުގެ އަޞްލު މަޤްޞަދު ގެއްލި އެންމެ ފަހުން ކަންފަތްވެސް ދައްކާ ކަންފަތުގައި ލާފައިވާ މުދިވެސް ހާމަކުރަންފެށިއެވެ. ކަރާއި ދެއަތްދަނޑިއަކީވެސް ނިވާކުރަން ނުޖެހޭ ހިސާބުކަމަށް ދެކި އެތަންތަންވެސް ހާމަކުރަންފެށިއެވެ. ބޮލުގައި އަޅާ ރަމްޒީ ފޮތިކޮޅަކަށް އެންމެފަހުން ބުރުގާ ވެގެންދިޔައެވެ. ޝަރުޢީ އެއްވެސް މަޤްޞަދެއް އެއިން ހާސިލުނުވާ ތަޤްވާވެރިކަމުގެ އެއްވެސް އަސަރެއްނެތް ފޭރާމަކަށް އެފޭރާންވެގެންދިޔައެވެ. ޝަރުޢީ ހިޖާބުން ހިޖާބުވެގެން ތިބި މީހުންގެ އަންހެން ދަރީންވެސް ހެދުން އަޅައިގެން އޮރިޔާމުން އުޅޭ ފަދައިން އުޅޭތަންވެސް ފެންނަންފެށިއެވެ.
މިއީ މިދުވަސްވަރުގެ ވާހަކައެވެ. އިސްލާމީ ދިވެހި މިދީބުގެ މަގުތަކުން ކޮންމެ ދުވަހަކު ހަމަ ކޮންމެ މީހަކަށްވެސް ފެންނަ މަންޒަރުގެ ވާހަކައެވެ. ދެން މިއޮތީ ޖާހިލިއްޔަ ޒަމާނުގެ ވާހަކައެވެ. އެއީ މީގެ 1400 އަހަރު ކުރިއެވެ. ޢަރަބި ޖަޒީރާގެ މަގުތަކުގައި ޢަރަބީންގެ އަންހެނުން ތަފާތު ބޭނުންތަކުގައި ހިނގާބިނގާވެ އުޅުނެވެ. ލާފައި ހުންނަ ހެދުމުން ކަރުގައި އަޅާފައިވާ ގަހަނާތަކާއި ކަންފަތުގައި ލެވިފައިވާ މުދިތަކާއި ފައިގައި އަޅާފައި އޮންނަ ތަކަހޮޅިތައްވެސް ހާމަވާން ހުރެއެވެ. ނުވިތާކަށް ހެދުން ފަހާފައިވާލެއް ބާރުކަމުގެ ސަބަބުން ހަށިގަނޑުގެ ވަނާތައްވެސް ހާމަވާން ހުރެއެވެ. ބައެއްފަހަރު ފޭރާން ތުނިވެގެން ގޮސް ހަމުގެ ކުލަ ކަޝްފުވެއެވެ. ބޮލުގެ އިސްތަށިގަނޑު ދެއްކުމާއި މޫނުގެ ޒީނަތްތެރިކަން ހިލޭ ފިރިހެނުންތެރޭ ފާޅު ކުރުމަކީ ޖާހިލިއްޔަ އަންހެނުންގެ އާދަކާދައެކެވެ.
ޤުރުއާން ބާވައިލައްވަމުން ދިޔަ ދުވަސްވަރު ރައްކާތެރިކުރެވިގެންދިޔަ އެއްބަޔަކީ މުސްލިމު އަންހެންތަކުންނެވެ. ނުބައިވެގެންވާ ބެލުންތަކާއި ފާހިޝް ބުއްދިތަކާއި ޝަހުވާނީ މުނާފިޤު އެދުމުގައި ތިބި ބައެއް މީހުންގެ ފަރާތުން އެކަނބަލުން ސަލާމަތްކުރުމަށް الله ތަޢާލާ ހިޖާބުގެ އާޔަތްތައް ބާވައިލެއްވިއެވެ. ބުރުގާތައް އަޅާ މޭމައްޗާއި ކަރުވަޅުތައް ނިވާ ކުރުމަށް އަމުރު ކުރެއްވިއެވެ. ޒީނަތްތެރިކަން ފާޅުކޮށްގެން ހިލޭ ފިރިހެނުންގެ ކުރިމައްޗަށް ނުކުތުން މަނާކުރެއްވިއެވެ. އެއީ ހެދުމުގައި ކުރެވޭ ޒީނަތް ނުވަތަ ރީތިވުމަށް ބޭނުންކުރާ ޒީނަތްތެރިވުން ކަމުގައިވިޔަސްމެއެވެ. އަތަރު ލައިގެން ވަސްދުވާ ގޮތަށް ބޭރަށް ނުކުތުންވެސް މަނާކުރެއްވިއެވެ. ބޭނުމެއް ހާޖަތެއްނެތި ހިލޭ ފިރިހެނުންނާއި ވާހަކަ ދެއްކުމާއި ތުއި އަޑުން ވާހަކަ ދެއްކުންވެސް ނަހީ ކުރެއްވެވިއެވެ. އެންމެފަހުން ބޭރަށް ނުކުންނައިރު ކާކުކަން ނޭންގޭ ގޮތަށް ޖިލްބާބު ލައިގެން ނުކުތުމަށްވެސް ޤުރުއާނުގައި އަމުރުވެވިގެން އައެވެ. އަދި ހަންގަނޑުގެ ކުލަ އެނގޭ ފަދަ ތުނި ފޮތިން ހެދުން ފަހައިގެން ލާމީހުންނާއި ގަޔަށް ބާރު އެއްޗެހި ލައިގެން ހެދުން އަޅާ މީހުންނާއި ރަނގަޅަށް އައުރަ ނުފޮރުވޭ ގޮތަށް ހެދުން އަޅާ މީޙޫންނަށް ސުވަރުގެ ނުވަދެވޭނެކަމަށް ވެސް ބަޔާންކޮށްދެއްވިއެވެ. އަދި ސުވަރުގޭގެ ވަސްވެސް އެބައިމީޙުންނަށް ނުލިބޭނެކަމުގެ ބިރުވެރި އިންޒާރި ދެއްވެވިއެވެ. ޤުރުއާނުގެ މިއިލާހީ އަމުރުފުޅާއިއެކު މަދީނާގައި އެވަގުތު ތިބި މުހާޖިރުންނާއި އަންޞާރުންގެ އަންހެންތަކުން މިއަމުރުފުޅަށް ފުރިހަމައަށް ކިޔަމަންވެލެއްވިއެވެ. ރަސޫލާ ޞައްލަالله އަލައިވި ވަސައްލަމަގެ އަނބިއަނބި ކަނބަލުންނާއި ދަރިދަރިކަނބަލުން މޫނު ބުރުގާ އަޅުއްވާ އެއްމެ ފުރިހަމަ ފޭރާމުން އައުރަ ނިވާކުރެއްވިއެވެ. ހަމަ އެގޮތަށް ޞަޙާބީންގެ އަންހެންތަކުންވެސް މޫނުތައް ނިވާކޮށް އިސްލާމީ ޖިލްބާބުން ނިވޭވެގެންދިޔައެވެ. ބައެއް ކަނބަލުން ހާޖަތެއް ޖެހިގެން އެއްލޯ ނުވަތަ ދެލޯ ކަޝްފުކުރެއްވިއެވެ. ޖާލިހިއްޔަ ޒަމާނުގެ ޒީނަންތެރިކަން އެކީއެކަށް ދޫކޮށް اللهގެ އަޒާބަށް ބިރުވެތިވެލެއްވިއެވެ. ހިލޭ ފިރިހެނުންނާ މަސްހުނިވެ އެކުވެ މަގުތަކުގެ މެދުގައި ހިނގުން ދޫކޮއްލެއްވިއެވެ. އެކަމުގެ ސަބަބަން އެކަނބަލުންގެ ތަނަވަސް ޖިލްބާބުތައް ފާރުތަކުގައި އަޅައިގަންނަކަމުގައި ރިވާވެގެން އައިސްފައިވެއެވެ. ހިޖާބުގެ އާޔަތަށްފަހު އުއްމު ސަލަމާގެފާނު އަންސާރުންގެ އަންހެންތަކުން ސިފަކޮށްފައިވަނީ ކަޅު ކުލައިގެ ކާޅުތަކެއްގެ ގޮތުގައެވެ. ޢާއިޝާގެފާނު ވިދާޅުވާ ގޮތުގައި ނިވާވުމަށް އަމުރުކުރެއްވުމުން އެކަނބަލުންގެ ހެދުމުގެ ފަސްބައިގެ ފޮތި ބޭނުންކޮށް އެކަނބަލުންގެ މޫނުތައް ފޮރުވާފައިވެއެވެ.
ކިޔަމަންތެރިކަމުގައި މިފަދަ ފުރިހަމަ ނަމޫނޭއެއް ވޭބާއެވެ! ކިޔަމަންވުމުގައި މިފަދަ ޤުރުބާނީއެއްގެ މަތިވެރިކަމަކީ ކިހާ ބޮޑު މަތިވެރިކަމެއްބާއެވެ!
Advertisement
This content is created and paid for by advertisers and does not involve Voice Journalists
