ޒަމާނުއްސުރެ ޕީޕީއެމުން ތަމްސީލު ކުރަމުން އައި ގޮނޑިއެއް ސަރުކާރު ހިންގާ މައި ޕާޓީ އެމްޑީޕީއަށް ލިބުނީ މި ސަރުކާރަށް ރައްޔިތުން އިތުބާރު ކުރާތީކަމަށް އެމްޑީޕީގެ ކުރީގެ ސެކެޓްރީ ޖެނެރަލް އަދި ފިނޭންސް މިނިސްޓްރީގެ ސްޓޭޓު މިނިސްޓަރު އަނަސް އަބްދުއް ސައްތާރު ވިދާޅުވެއްޖެ އެވެ. 

އަނަސް މިފަދައިން ވިދާޅުވެފައިވަނީ ގުރައިދޫ ދާއިރާގެ ބައި-އިލެކްޝަން އެމްޑީޕީގެ ކެންޑިޑޭޓު މުޙައްމަދު ޝާޒު ކާމިޔާބު ކުރެއްވުމާއި ގުޅިގެން ޝާޒަށް މަރުހަބާ ދެންނެވުމަށް ކުރެއްވި ޓްވީޓެއްގަ އެވެ. 

އަނަސް ވިދާޅުވީ ޒަމާންތަކެއް ވަންދެން ޕީޕީއެމުން ތަމްސީލު ކުރަމުން ދިޔަ ގޮނޑިއެއް އެމްޑީޕީއަށް ލިބުނީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހާއި މި ސަރުކާރުގެ ސިޔާސަތުތަކަށް ރައްޔިތުން ތާއީދުކުރާތީ ކަމަށެވެ. އަދި ސަރުކާރަށް އިތުބާރު ކުރާތީ ކަމަށެވެ. 

Advertisement

އެއާއެކު އޭނާ ވިދާޅުވީ މިހާރު އެމްޑީޕީ މިދާ މިސްރާބަށްވެސް ޕާޓީ މެމްބަރުންގެ އިތުބާރާއި ތާއީދު އޮތްކަން މި އިންތިޚާބުގެ ނަތީޖާއިން ފެނިގެން ގޮސްފައިވާ ކަމަށެވެ.  

ގުރައިދޫ ދާއިރާގެ ބައި-އިލެކްޝަން އެމްޑީޕީން ކާމިޔާބުކޮށްފައިވަނީ ޕާޓީގެ ރައީސް މުޙައްމަދު ނަޝީދާއި އޭނާގެ ފެކްޝަނުން ރައީސް ޞާލިހާއި ސަރުކާރަށް ބޮޑެތި ފާޑުކިޔުންތަކެއް އަމާޒުކުރަމުންދާ ދަނޑިވަޅެއްގަ އެވެ. އަދި ސަރުކާރުން ވައްކަމާއި ކޮރަޕްޝަން ހިންގަމުންދާކަމުގެ ބޮޑެތި ތުހުމަތުތަކެއް ކުރަމުން ދަނިކޮށެވެ. 

އެއާއެކު އެމްޑީޕީގެ ޞާލިހު ފެކްޝަނުގެ މެމްބަރުން ގެންދަނީ މި ކާމިޔާބީ އަކީ ރައީސް ޞާލިހަށް ނިސްބަތްވާ ކާމިޔާބީއެއްކަމަށް ސިފަކުރައްވަމުންނެވެ. އަދި އިންތިޚާބު ކާމިޔާބު ކުރެވުނީ ރައީސް ޞާލިހުގެ ހުކުމަތްތެރިކަމުން ކަމަށް އެ ފަރާތްތައް ދަނީ ވިދާޅުވަމުންނެވެ.