ސީރިޔާގެ މައްސަލައިގައި އޮތް ހަމައެކަނި ހައްލަކީ ސިޔާސީ ހައްލެއް ހޯދުން ކަމަށް ޢަރަބި އަދި ގަލްފް ޤައުމު ތަކުގެ މިނިސްޓަރުން ބުނެފިއެވެ.

ސަޢޫދީޢަރަބިއްޔާގެ ޖިއްދާ ގައި ބޭއްވި މަޝްވަރާ ބައްދަލުވުމެއްގައި ޢަރަބި ޤައުމުތަކުގެ އިސްބޭފުޅުންނަށް އެއްބަސްވެވުނު ގޮތަކީ އެއީ ކަމަށް ސަޢުދީ ގެޒެޓްގައި ރިޕޯޓް ކޮށްފައިވެއެވެ.

ޖިއްދާގައި ބޭއްވުނު މި ބައްދަލުވުމަކީ ސަޢުދީގެ ފޮރިން މިނިސްޓަރީއިން އިސްނަގައިގެން ބޭއްވި ބައްދަލުވުމެކެވެ. މިބައްދަލުވުމުގައި ސަޢުދީގެ ފޮރިންމިނިސްޓަރ ވަލީއަހުދު ފައިސަލް ބިން ފަރްހާން، ބަހްރެއިންގެ ފޮރިންމިނިސްޓަރ ޢަބްދުالله އާތިފް އަލް ޒަޔާނީ،  ޔޫއޭއީގެ ރައީސްގެ ޑިޕްލޮމެޓިކް އެޑްވައިޒަރ ޑރ އަންވަރް ގަރްގަޝް، ޤަޠަރުގެ ފޮރިން މިނިސްޓަރ ޝައިޙް މުޙައްމަދު ބިން ޢަބްދުއްރަޙްމާން، އޮމާންގެ ފޮރިންމިނިސްޓަރ ސައްޔިދް ބަދްރް އަލް ބުސައިދީ، މިޞްރުގެ ފޮރިންމިނިސްޓަރ ސަމާހް ޝުކްރީ، އުރްދުންގެ ފޮރިންމިނިސްޓަރ އައިމަން އަލްސަފާދީ ގެ އިތުރުން އިރާޤް ގެ ފޮރިންމިނިސްޓަރ ފުއާދް ހަސަން ވަނި ބައިވެރިވެފައެވެ.

ސަޢުދީގެ ފޮރިން މިނިސްޓްރީ އިންވަނީ މި ބައްދަލުވުމުގައި މަޝްވަރާ ކުރެވުނު ކަންކަމާއި ބެހޭގޮތުން ބަޔާނެއް ނެރެފައެވެ. އެގޮތުން ބައްދަލުމުގައި މައިގަނދު ގޮތެއްގައި މަޝްވަރާ ކުރެވުނީ ސީރިޔާގެ މައްސަލައަށް ހައްލެއް ގެނެވޭނެ ގޮތަކާއި މެދުގައެވެ. ސީރިޔާގައި އަމާންކަމާއި ރައްކާތެރިކަން ކަށަވަރު ކުރެވޭނެ ގޮތަކާއި މެދުގައެވެ. އަދި ސީރީޔާ އަށް ކުރިމަރިވެފައިވާ މި ހާލަތުން އަރައިގަތުމަށް ޢަރަބި ޤައުމުތަކާއި ގަލްފްގެ އެހެން ޤައުމުތަކުން އެހީތެރިކަން ފޯރުކޮށްދިނުމާއި މެދު މަޝްވަރާ ކުރެވިފައި ވާކަމަށް އެބަޔާނުގައި ބުނެފައިވެއެވެ.

މިމަޝްވަރާ ކުރުންތަކުގައި ގަލްފް ޤައުމުތަކުގެ ފޮރިން މިނިސްޓަރުން ވަނީ ސީރިޔާއަށް ކުރިމަތިވެފައިވާ އިންސާނީ ކާރިސާތަކުގެ ޝިކާރައަކަށް ވެފައިވާ މީހުންނަށް ބޭނުންވާނެ އެހީ ފޯރުކޮށްދިނުމަށް އަމާން މަގިތަކެއް ހޯދައި ދިނުމާއި މެދުގައި ވެސް މަޝްވަރާކުރެވިފައެވެ.

މީގެ އިތުރުން އެކި ޤައުމުތަކަށް ބެހިގެން ގޮސްފައިވާ ސީރިޔާގެ ރެފިޔުޖީން އެޤައުމަށް، ރައްކާތެރިކަމާއި އެކު އަނބުރާ ގެންދެވޭނެ ގޮތް ގޮތާއި މެދުވެސް ވަނީ މަޝޤވަރާކުރެވިފައެވެ. މީގެ އިތުރުން ސީރިޔާގެ ތެރޭގައި ހަރަކާތްތެރިވާ ހަތިޔާރު އެޅި ޖަމާޢަތްތައް ޤައުމުން ބޭރުކޮށް ނުވަތަ އެމީހުންގެ ފަރާތުން ޤައުމު ސަލާމަތް ކުރުމަށް ކުރެވިދާނެ ކަންކަމާއި މެދު މަޝްވަރާ ކުރެވިފައިވެއެވެ.

މީގެ އިތުރުން މެދުއިރުމަތީގެ ޤައުމުތަކަށް ދިމާވެފައިވާ ކަންކަމާއި މެދު މަޝްވަރާ ކުރެވިފައި ވާކަމަށްވެސް ސަޢުދީގެ ފޮރިންމިނިސްޓްރީގެ ބަޔާނުގައި ބުނެފައިވެއެވެ. މީގެ ތެރޭގައި ފަލަސްޠީނުގެ ބިމަށް ވެރިވެގަތުމަށް އިޒްރާއިލުން ކުރަމުންދާ މަސައްކަތާއި އެކަމަށް ހައްލެއް ގެނައުމަށް ކުރެވޭނެ ކަންކަމާއި މެދުގައި މަޝްވަރާ ކުރެވިފައިވެއެވެ.

އަދި ދާދި ފަހަކުން ފަލަސްޠީނުގެ ރައްޔިތުންތަކެއް އަލް އަޤްޞާގައި އަޅުކަން ކުރަން ތިއްބައި އިޒްރާއިލްގެ ސިފައިން ވަދެ ފަލަސްޠީނުގެ ރައްޔިތުނަށް ކުރި އަނިޔާއާއި މިސްކިތުގެ ހުރުމަތް ކަނޑާލުން ކުށްވެރިކޮށްފައިވާ ކަމަށް ސަޢުދީ ފޮރިން މިނިސްޓްރީ އިން ބުނެފައިވެއެވެ.