ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ކުއްޔަށް ދޫކޮށްފައިވާ ބިންތަކުގެ މުއްދަތު ބިޑު ކުރުމަކާއި ނުލާ އިތުރުކުރެވޭ ގޮތަށް ދިރިއުޅުމުގެ ބޭނުމަށް ނޫން އެހެން ބޭނުންތަކަށް ބިން ދޫކުރުމުގެ ޤަވައިދު އިސްލާހުކޮށްފި އެވެ. 

ހައުސިލް މިނިސްޓްރީން އިއްޔެ ގެޒެޓުކޮށް އަމަލުކުރަންފެށި އިސްލާހުގައި ވާގޮތުން އެ ގަވާއިދުގެ ދަށުން ދޫކުރާ ބިމެއްގެ މުއްދަތު އިތުރުކުރުމަށް އެދި، ބިން ދޫކޮށްފައިވާ މުއްދަތު ހަމަވުމުގެ ކުރިން، ބިން ދޫކުރެވިފައިވާ ފަރާތުން ހުށަހަޅައިފިނަމަ، އެ ފަރާތުން މުއްދަތު އިތުރުކުރުމަށް ހުށަހެޅި ސަބަބުތަކަށް ރިއާޔަތްކޮށް އެސެސްމަންޓް ހެދުމަށްފަހު، އެ އެސެސްމަންޓުގެ ނަތީޖާއަށް ބަލައިގެން، ބިން ދޫކޮށްފައިވާ މުއްދަތު އިތުރުކޮށްދިނުމުގެ އިހްތިޔާރު ބިން ދޫކުރާ ފަރާތަށް ލިބިގެންވެ އެވެ.

އެގޮތަށް ބީލަމަށް ނުލައި ކުލީގެ މުއްދަތު އިތުރު ކުރެވޭނީ ފުރަތަމަ ބީލަމުގެ އުސޫލުން ބިން ކުއްޔަށް ދޫކުރުމަށް ކުރާ އިއުލާނުގައި، މުއްދަތު އިތުރުކުރެވޭނެ އެންމެ ގިނަ މިންވަރު ބަޔާންކުރުމަށްފަހު ކަމަށް ގަވާއިދަށް ގެނައި އިސްލާހުގައި ހިމަނާފައިވެ އެވެ.

Advertisement

މީގެ ކުރިން ގަވާއިދުގައި އޮންނަ ގޮތުން ނަމަ ބިމު ކުލީގެ މުއްދަތު އިތުރުކޮށްދެވޭނީ، ބިން ދޫކޮށްފައިވާ މުއްދަތުގެ %50 އަށްވުރެ އިތުރު ނުވާނެ ގޮތެއްގެ މަތިން މިނިސްޓްރީއަ ށެވެ.

ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ބިން ދޫކުރުމުގެ ގަވާއިދުގެ ދަށުން، މިނިސްޓްރީގެ ހުއްދަ ހޯދުމެއް ނެތި ދިހަ އަހަރު ދުވަހަށް ރަށްރަށުން ބިންތައް ކުއްޔަށް ދިނުމުގެ އިހްތިޔާރު ކައުންސިލަށް ލިބިގެން ވެ އެވެ. އަދި އެއަށްވުރެ ދިގު މުއްދަތައް ބިން ދޫކުރެވޭނީ މިނިސްޓްރީގެ ހުއްދައާއެކު އެވެ.

އެހެންކަމުން އިއްޔެ ގަވައިދަށް ގެނައި ބަދަލާއިއެކު ކައުންސިލްތަކާއި އަދި ސަރުކާރުން ކުއްޔަށް ދޫކޮށްފައިވާ ބިންތަކުގެ މުއްދަތު ވެސް އަލުން ބީމަކަށް ނުގޮސް، މިހާރު ކުއްޔަށް ނަގައިގެން އުޅޭ ފަރާތައް ދިނުމުގެ އިހްތިޔާރު ލިބިގެން ދާނެ އެވެ.