ޤަޠަރާއި އިއްތިހާދުގެ ޑިޕްލޮމެޓިކް ގުޅުންތައް އަލުން ގާއިމް ކުރަން ފަށައިފިކަމަށް އެދެގައުމުގެ އިސް އޮފިޝަލުން ބުނެފިއެވެ.
ދެ ޤައުމުގެ ދެމެދުގައި އުފެދިފައިހުރި މައްސަލަތައް ހައްލުކޮށް ޑިޕްލޮމެޓިކް ގުޅުންތައް ގާއިމް ކުރުމާއި އެމްބަސީތައް އަލުން ހުޅުވުން ވަރަށް އަވަހަށް ކުރިއަށްދާނެ ކަމަށް ވެސް ދެޤައުމުގެ ސަރުކާރުން މިއަދު ވަނީ ހާމަކޮށްފައެވެ.
ދެ ޤައުމުގެ މި ފިޔަވަޅަކީ ޢަރަބި ޤައުމަތަކުން ދޯހާ ބޮއިކޮޓް ކޮށްފައި އޮންނަ އޮތުން ނިންމުމަކަށް ގެނައިތާ ދެއަހަރެއްހާ ދުވަސްފަހުންނެވެ.
ދެ ޤައުމުންވެސް ބައިނަލް އަޤްވާމީ މީޑިއާތަކަށް މިކަންތައް ކަށަވަރުކޮށްދީފައިވެއެވެ. އެގޮތުން އިއްތިހާދުގެ އޮފިޝަލަކު ރޮއިޓާސް އަށް ބުނެފައިވަނީ ޑިޕްލޮމެޓިކް ގުޅުންތައް އަލުން ޤާއިމް ކުރުމާއި އެމްބަސީތައް އަލުން ހުޅުވުމުގެ މަސައްކަތްތައް ދަނީ ކުރިއަށް ކަމަށެވެ. ޤަޠަރުގެ ބައިނަލްއަޤްވާމީ މީޑިއާ އޮފީހުން ބުނެފައިވަނީ އެކަމާއި ގުޅޭ މަސައްކަތްދަނީ ކުރިއަށް ކަމަށާއި އެމްބަސީތައް އަލުން ހުޅުވުމުގެ މަސައްކަތް ވެސް ކުރިއަށް ދާކަމަށެވެ.
ގަލްފްގެ އޮފިޝަލަކު ބުނެފައިވަނީ ޖޫން މަހުގެ މެދެއްހާ ހިސާބުގައި އެމްބަސީތައް ހުޅުވިގެން ދާނެ ކަމަށާއި ޑިޕްލޮމެޓިކް ގުޅުންތައް ދެތިން ހަފްތާއެއްގެ ތެރޭގައި ގާއިމް ވެގެންދާނެކަމަށެވެ.
މިދުވަސް ވަރަކީ ޢަރަބި ޤައުމުތަކުގެ މެދުގައި އުފެދިފައިވާ ދެބަސްވުންތައް ދޫކޮށް ސުލްޙަވެ އަލުން ގުޅުންތައް ގާއިމްކުރަމުންދާ ދުވަސްކޮޅެއްކަން ފާހަގަ ކޮށްލަން ޖެހެއެވެ.
އެގޮތުން ބަލާއިރު ސަޢުދީޢަރަބިއްޔާ އާއި އިރާނުން އެތައް އަހަރެއްވަންދެން އުފެދިފައި އޮތް ދެބަސްވުންތަކާއި ނުތަނަވަސްކަން ދޫކޮށް މިދިޔަ މަހުވަނީ އަލުން ސުލްހައިގެ ވާހަކަތައް ކުރިއަށް ގެންދިޔުމަށް އެއްބަސްވެފައެވެ.
ގިނަ ޢަރަބި ޤައުމުތަކަކުން ސީރިޔާ އާއި އޮތް ގުޅުން އެތައް އަހަރެއް ވަންދެން ކަނޑައިލައިފައި ބޭއްވުމަށްފަހު އަލުން ގުޅުން ބަދަހި ކުރުމަށްވަނީ ނިންމާފައެވެ. އޭގެ ތެރޭގައި ސަޢުދީޢަރަބިއްޔާ އާއި މިޞްރުވެސް ހިމެނެއެވެ.
ޔަމަނުގައި، ޔަމަނުގެ ހޫތީ މޫވްމެންޓާއި ސަޢުދީ ސަރުކާރާއި ދެމެދު ސުލްޙައިގެ ވާހަކަތަކެއް ވަނީ ދެކެވިފައެވެ. މިވާހަކަތަކުގެ ސަބަބުން ސަޢުދީގެ ޖަލުތަކުގައި ހައްޔަރުކޮށްފައިތިބި ބައެއް ގައިދީން ބަދަލުކުރުމުގެ ޕްރޮގްރާމެއް ވަނީ ހިންގައިފައެވެ. މަޝްރަހު ދިރާސާކުރާއ ފަރާތްތަކުން ލަފާކުރަނީ ހޫތީންނާއި ސަޢުދީ އާއި ދެމެދު ސުލްހައިގެ އިތުރު ވާހަކަތައްކުރިއަށްދާނެ ކަމަށް ލަފާކުރެވޭ ކަމަށެވެ.
2017 ގައި މެދެއްހާ ހިސާބުގައި ސަޢުދީޢަރަބިއްޔާ، އިއްތިހާދު، ބަހްރެއިން އަދި މިޞްރުން ވަނީ ޤަޠަރާއި އޮންނަ ހުރިހާ ގުޅުމެއް ކަނޑާލައިފައެވެ. އޭރު ޤަޠަރާއި މެދު ކުރެވިފައިއޮތް ތުހުމަތަކީ ޓެރަރިސްޓު ޖަމާޢަތަކަށް އެއްބައިވެ އިރާނާއި ދެކެޅަށް އެޖަމާޢަތަށް އެހީވި ކަމުގެ ތުހުމަތެވެ. ނަމަވެސް އެޤައުމުން އެކަން ވަނީ ދޮގުކޮށްފައެވެ.
އޭގެ ފަހުން ޤަޠަރާއި ގުޅުން އެންމެ ފުރަތަމަ ގާއިމް ކުރީ މިޞްރާއި ސަޢުދީޢަރަބިއްޔާ އިންނެވެ. އަދި ފާއިތުވި ހަފްތާގައި ބަހްރެއިން އިން ވަނީ ޤަޠަރާއި ގުޅުން ބަދަހިކޮށްފައިވާ ކަން އިއްލާނު ކޮށްފައެވެ.
Advertisement
This content is created and paid for by advertisers and does not involve Voice Journalists
