ސަޢުދީޢަރަބިއްޔާގެ ފޮރިން މިނިސްޓަރ ވަލީއަހުދު ފައިސަލް ބިން ފަރްހާން ސީރިޔާގެ ދިމިޝްޤަށް ޒިޔާރަތްކޮށްފިއެވެ.
ސަޢުދީ ފޮރިން މިނިސްޓަރ ދިމިޝްޤަށް މިކުރާ ޒިޔާރަތަކީ ދެޤައުމުގެ ދެމެދުގައި ސުލްހައިގެ ވާހަކަތައް ކުރިއަށް ގެންދިޔުމަށް ކުރާ ޒިޔާރާތެކެވެ. މި ދަތުރުގައި ވަލީއަހުދު ފައިސަލް ބިން ފަރްހާން ވަނީ ސީރިޔާގެ ރައީސް ބައްޝާރުލް އަސަދާއި ބައްދަލުކޮށްފައެވެ.
ވަލީއަހުދު ފައިސަލް އަކީ 2011 ވަނަ އަހަރު ފެށުނު ސީރިޔާގެ ދާޚިލީ ހަނގުރާމަ އަށްފަހު ސީރިޔާ އަށް ޒިޔާރަތްކުރާ ސަޢުދީގެ އެންމެ އިސް އޮފިޝަލެވެ.
ސަޢުދީގެ ފޮރިން މިނިސްޓަރާއި ސީރިޔާގެ ރައީސް އާއި މެދު ދެކެވުނު ވާހަކަތަކުގެ ތެރޭގައި ދާޚިލީ ހަމަނުޖެހުން ތަކަށް ނިމުމެއް ގެނައުމަށްޓަކައި ސިޔާސީ އެއްބަސްވުމެއް ހާސިލްކުރުމާއި، ޢަރަބި ލީގާއި ސީރިޔާ އަލުން ގުޅުމަށް އެކަމަކީ ބާރަކަށް ވެގެންދާނެ ކަމަށް ވަލީއަހުދު ހާމަކޮށްފައިވެއެވެ.
ވަލީއަހުދު ފައިސަލް ސީރިޔާގެ ރައީސް ބައްޝާރުލް އަސަދާއި ދެއްކިވާހަކައިގައި ސީރިޔާގައި ހާލުގައި ޖެހިފައިތިބި މީހުންނަށް ބޭނުންވަ އެހީ ފޯރުކޮށްދެވޭނެ ފަދަ ވެއްޓެއް ގާއިމް ކޮށްދިނުމަށް އެދިފައިވެއެވެ. އަދި ސީރިޔާ މިހާރު އޮތް ހާލަތައްވުރެ ރަނގަޅު ހާލަތަކަށް ވީހާވެސް އަވަސް ފުރުސަތެއްގައި ގެންގޮސް ސަރަހައްދުގެ އެހެން ޤައުމުތަކުގައި ނިކަމެތި ހާލުގައި އުޅެމުންދާ ސީރިޔާގެ ރެފިޔުޖީންނަށް ޤައުމަށް އެނބުރި ދެވޭނެ މަގެއް ފަހިކޮށްދިނުމަށް ގޮވައިލައިފައިވެއެވެ.
ސީރިޔާގެ ރައީސް ބައްޝާރުލް އަސަދު ބުނެފައިވަނީ ސަޢުދީޢަރަބިއްޔާ އާއި ސީރިޔާ އާއި ދެމެދު އޮންނަ ގުޅުން އަމާންކޮށް ބާއްވަން ޖެހޭ ކަމަށެވެ. އެއީ އެކަމަކުން ހަމައެކަނި ދެޤައުމަށް އެކަނި ފައިދާ ކުރާނެ ކަމެއް ނޫން ކަމަށާއި، ޢަރަބި ދުނިޔެއަށްވެސް މިކަމުގެ ފައިދާތައް ލިބިގެން ދާނެ ކަމަށެވެ.
ވަލީއަހުދު ފައިސަލް ބިން ފަރްހާން ދިމިޝްޤަށް ކުރި މިދަތުރަކީ ސީރީޔާގެ ފޮރިން މިނިސްޓަރ ފައިސަލް މިޤްދާދް ސަޢުދީޢަރަބިއްޔާގެ ފޮރިން މިނިސްޓަރ ވަލީއަހުދު ފައިސަލް ބިން ފަރްހާން އާއި ބައްދަލުކުރުމަށް ޖިއްދާ އަށް ކުރި ދަތުރަށް ހަފްތާއެއްހާ ދުވަސްފަހުން ކުރި ދަތުރެކެވެ.
މިބައްދަލުވުމުގައި ސީރިޔާއިން އެޤައުމުގެ އެއްބައިވަންތަ ކަން ދެމެހެއްޓުމާއި، އަމާންކަމާއި، އަމިއްލަވަންތަކަން އަދި އެޤަމުގެ ބިމުގެ ކަންކަމުގައި އަމިއްލަ ގޮތް ނިންމުމުގެ ބާރު ދެމެހެއްޓޭނެ ގޮތާއި މެދު މަޝްވަރާކޮށްފައިވެއެވެ.
އަދި ހަމަ އެބައްދަލުވުމުގައި ސީރިޔާގެ މައްސަލައަށް ހައްލެއް ގެނައުމަށް ސިޔާސީ ހައްލެއް ހޯދުމަށް ކުރެވިދާނެ ކަންކަމާއި މެދުގައި މަޝްވަރާކުރެވިފައިވެއެވެ. މިއާއި އެކު ދެ ޤައުމުގެ ދެމެދުގައި ކަނޑާލައިފައި އޮތް ފްލައިޓްގެ ޚިދްމަތް އަލުން ދިނުމަށްވެސް މަޝްވަރާކޮށްފައިވެއެވެ.
ހަމަ އެހަފްތާތެރޭގައި ގަލްފް ޤައުމުތަކުގެ ފޮރިން މިނިސްޓަރުން ވަނީ ސީރީޔާގެ އެއްބައިވަންތަކަމާއި، އަމާންކަމާއި އަމިއްލަވަންތަކަން ދެމެހެއްޓުމާއި މެދު މަޝްވަރާކުރުމަށް ބައްދަލުވުމެއް ބާއްވައިފައެވެ. މި ބައްދަލުވުމުގައި ގަލްފް ޤައުމުތަކުގެ ފޮރިން މިނިސްޓަރުންނަށް އެއްބަސްވުމަކަށް އާދެވުނީ ސީރިޔާގެ މައްސަލަގައި އޮތް ހަމައެކަނި ހައްލަކީ ސިޔާސީ ހައްލެއް ހޯދުން ކަމަށެވެ.
Advertisement
This content is created and paid for by advertisers and does not involve Voice Journalists
