އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދުވަހަކުވެސް އިހްތިރާމް ނުކުރާނެ ކަމަށް މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ މިފަދައިން ވިދާޅުވެފައި ވަނީ، އޭނާ ރައީސް ނަޝީދަށް އަމާޒުކުރައްވައި ކުރައްވާފައިވާ ޓުވީޓަތަކަކާއި ގުޅިގެން ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ކުރެއްވި ޓުވީޓަކާއި ގުޅިގެންނެވެ.
އެގޮތުން އިންތި ކުރެއްވި ޓުވީޓުގައި ވަނީ، ދިވެހި ގައުމަށްޓަކައި ނުވަތަ އެމްޑީޕީ އަށްޓަކައި ކުރި މަސައްކަތެއްގެ ތެރެއިން ރޮޒޭނާއާއި އޭނާގެ އާއިލާގެ މީހެއްގެ ހަށިގަނޑަށް، ޖިސްމަށް ލަކުނެއްހާ ކަންފުޅެއް ވެސް އަރާފައިނުވާނެ ކަމަށް ވިދާޅުވެފައެވެ.
"މިދަރަޖައަށް ހަޔާތް ގެއްލުނީމާ އެނގެނީ މިއީ ރައީސް އިބްރާހިމް މުހައްމަދު ޞާލިހް މި ޕާޓީ ގެންގޮސް ވައްޓަލަން ބޭނުންވި ހިސާބުކަން." އިންތި ވިދާޅުވި އެވެ.
އިންތިގެ ޓުވީޓަށް ރައްދު ދެއްވައި ރޮޒައިނާ ވިދާޅުވީ، އިހްތިރާމަކީ ހޯދާ އެއްޗެއް ކަމަށެވެ. އަދި އޭނާ އަށް އިހްތިރާމް ނުކުރާ މީހަކަށް އޭނާ އިހްތިރާމް ކުރާނެ ކަމަށް އުއްމީދު ނުކުރަންވެސް ރޮޒައިނާ ވިދާޅުވި އެވެ.
މިއާއެކު ރޮޒައިނާ ވަނީ، އޭނާ އަށް ނިސްބަތްކޮށް ދޮގުތަކެއް ފަތުރާ ފައިވާ ކަމަށާ, އެ ހުރިހާ ދޮގުތަކަށް ފަހުގައި ރައީސް ނަޝީދަށް އިހްތިރާމް ކުރާނެ ކަމަށް އުއްމީދު ކުރައްވަންތޯ ސުވާލު ކުރައްވާފައެވެ.
"މަށޭ ކިޔައިގެން ތިހިރަ ފަތުރާލިހާ ދޮގުތަކަށްފަހު އޭނާ (ރައީސް ނަޝީދު) އަށް އިހްތިރާމް ކުރާނެ ކަމަށް އުއްމީދު ކުރަނީތަ ތި؟ ހަނދާން ނައްތާލާ. ދުވަހަކު ވެސް ނުވާނެ." ރޮޒައިނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
