ގދ. ހޯނޑެއްދޫ ބޯފެނަށްޖެހި ސަރުކާރަށް އެހީއަށް އެދުމުންވެސް ބީރު ކަންފަތެއް ދިނުމުން އާންމުންގެ ފަރާތުން ބޯފެން ހަދިޔާކޮށް އެހީ ދެއްވުމަށް ރައްޔިތުން މަޖްލީހުގެ މަޑަވެލި ދާއިރާގެ މެމްބަރު ހުސައިން ފިރުޝާން އެދިއްޖެއެވެ.

ހޯޑެއްދޫގައި ވާރޭނުވެހި ގިނަދުވަސް ވުމުގެ ސަބަބުން ފެނުގެ ދަތިކަމާއި ކުރިމަތިލާން ޖެހުމުގެ ސަބަބުން އެރަށުގެ ކައުންސިލުން ވަނީ އާންމުންގެ އެހީއަށް އެދި މިއަދު އިއުލާނެއް ނެރެފައެވެ.

އެގޮތުން އިއުލާނުގައި ބުނެފައިވަނީ ވާރޭނުވެހި ގިނަ ދުވަސްވުމާއި ގުޅިގެން އެރަށުގެ އާންމު ތާނގީތަކުންނާއި ބައެއް ގެތަކުން ވާރޭފެން ވަނީ ހުސްވެފައި ކަމަށެވެ. އަދި މިހާރު ވާރޭފެން ހުސްވެފައިވާ ގެތަކުގެ ރައްޔިތުން، ވާރޭފެން ހުރި ގެތަކުން ފެން ނަގަމުން ދާތީ އެގެތަކުގައި ރައްކާކުރެވިފައިވާ ވާރޭ ފެން ހުސްވުމާއި ގާތަށް ގޮސްފައިވާ ކަމަށެވެ.

Advertisement

އެހެންކަމުން ހޯނޑެއްދޫގެ އާންމު ރައްޔިތުންނަށް ބޯފެން ހަދިޔާ ކުރައްވަން ޝައުގުވެރިވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ.

މިކަމާއި ގުޅިގެން މަޑަވެލި ދާއިރާގެ މެމްބަރު ފިރުޝާން ވަނީ ކަންބޮޑުވުން ފާޅުކޮށް ޓްވީޓްކުރައްވާފައެވެ.

އެގޮތުން ފިރުޝާން ވިދާޅުވީ މާރިޗް މަހުން ފެށީގެން ސަރުކާރާއި ފެނަކަ ކޯޕަރޭޝަނަށް ބޯފެނަށް އެދި އެރަށުގެ ކައުންސިލުން ދެންނެވުމުން ފެނަކައިގެ މެނޭޖިންގ ޑިރެކްޓަރ އަހްމަދު ސައީދު މުހައްމަދު ދީފައިވަނީ ބީރު ކަންފަތެއް ކަމަށެވެ.

ވީމާ ހޯނޑެއްދޫގެ އާންމު ރައްޔިތުންނަށް ބޯފެން ހަދިޔާ ކުރައްވަން ޝައުގުވެރިވާ ފަރާތްތަކުން، ކައުންސިލް އިދާރާގެ މުވައްޒަފުންނާ ގުޅުއްވައިގެން ކުރިއަށް ގެންދިޔުމަށް ފިރުޝާން ވަނީ އެދިފައެވެ.

ހޯޑެއްދޫ ރައްޔިތުންނަށް ފެން ހަދިޔާ ކުުރުމަށް ގުޅޭނެ ނަންބަރުތައް:

-މުޢާދް މުޙައްމަދު، ސެކްރެޓަރީ ޖެނެރަލް - 9192818

-ޢިނާޔަތުالله ޢަބްދުއްސައްތާރު، ކައުންސިލް އެގްޒެކެޓިވް - 7915501

މި މައްސަލާގައި ސަރުކާރުގެ ބަހެއް ލިބޭތޯ ކުރި މަސައްކަތުން މިހާތަނަށް އެއްވެސް މައުލޫމާތެއް ލިބިފައެއް ނުވެއެވެ.