ފަތުރުވެރިކަމަށް ދޫކޮށްފައި އޮތް ރަށްތަކުގައި ހުރި ސަރުކާރުގެ ޙިއްޞާތައް ވިއްކަވާލެއްވުމަށް ނިންމާފައިވާ ކަމަށް ޓޫރިޒަމް މިނިސްޓަރ ޑރ. ޢަބްދުالله މަޢުސޫމް ވިދާޅުވެއްޖެ އެވެ.

ފިނޭންސް މިނިސްޓްރީން ވަނީ ރިސޯޓް ހަދަން ސަރުކާރުން ދޫކުރައްވައިފައިވާ 3 ރަށެއްގައި އޮތް ސަރުކާރުގެ ޙިއްޞާ ވިއްކަވާލައްވަން އިޢުލާންކޮށްފަ އެވެ.

ޙިއްޞާ ވިއްކާލަން ނިންމައިފައިވާ 3 ރަށަކީ ވ.ބޮޑުމޮހޮރާ އިންވެސްޓްމަންޓް ޕްރައިވެޓް ލިމިޑެޓާއި، ށ.ނާއިންފަރު ހޯލްޑިންސް ޕްރައިވެޓް ލިމިޑެޓާއި، ށ.ހުރަސްފަރު ހޯލްޑިންގްސްގައިވާ ސަރުކާރުގެ ޙިއްޞާއެވެ.

Advertisement

ފިނޭންސް މިނިސްޓްރީން ވަނީ، މި 3 ރަށުގައި އޮތް ސަރުކާރުގެ ޙިއްޞާ ދޫކޮށްލާތީ، ޙިއްޞާގެ ވެލުއޭޝަނެއް ނުވަތަ އަގުމަގުކޮށްދޭނޭ ފަރާތެއް ހޯދަން އިޢުލާންކުރައްވައިފައެވެ.

މިކަމާ ގުޅޭގޮތުން ޓޫރިޒަމް މިނިސްޓަރ ޑރ. ޢަބްދުالله މަޢުސޫމް ވިދާޅުވީ، މި ރަށްތަކުގައި ހުރި ސަރުކާރުގެ ޙިއްޞާ ދޫކޮށްލައްވަން ނިންމަވައިފައިވަނީ އެ ތަންތަނަށް ފައިދާ ނުވާތީ އާއި، އެ ތަންތަން ރަނގަޅަށް ހިންގުމަށް ފުރުޞަތު ދެއްވުމުގެ ގޮތުން ކަމަށެވެ.

ކުންފުނިތަކުން ބޭނުންވެއްޖެނަމަ ސަރުކާރުގައި އޮތް ޙިއްޞާ ގަނެވޭގޮތަށް މަޖިލީހުން ވަނީ ޓޫރިޒަމް ޤާނޫނަށް ބަދަލު ގެންނަވައިފައެވެ.

އިކޮނޮމިކް ކައުންސިލުން ނިންމަވައިފައިވަނީ އެހެން ހުރި ހުރިހައި ރިސޯޓްތަކެއްގެ ޙިއްޞާވެސް ވިއްކަވާލެއްވުމަށްކަމަށް ޓޫރިޒަމް މިނިސްޓަރ ވިދާޅުވިއެވެ.

ސަރުކާރުގެ ޙިއްޞާ ބައެއް ރަށްރަށުގައި ހުރީ ބިޑްނުކުރައްވައި ރިސޯޓް ހަދަން ދެއްވައިފައި ހުރުމުންނެވެ.

ބިޑް ނުކުރައްވައި ރިސޯޓް ހަދަން ރަށްތައް ދެއްވާއިރު ޢަންމު ގޮތެއްގައި ސަރުކާރުގެ %5-10 ޙިއްޞާ އެ ރަށެއްގައި ބާއްވަވައެވެ.

ނަމަވެސް ބިޑްކުރައްވައިގެން ދޭއިރު ސަރުކާރުގެ ޙިއްޞާއެއް ނުބާއްވަވައެވެ. ޝަންގްރިއްލާ ރިސޯޓް ތަރައްޤީކުރި، އައްޑޫ އިންވެސްޓްމަންޓް ކުންފުނީގައި އޮތް ސަރުކާރުގެ %30 ޙިއްޞާވެސް ވަނީ ފައިދާ ނުވާތީ ދޫކޮށްލައްވައިފަ އެވެ.