ޔަމަނުގެ ވެރިރަށް ސަންޢާގައި ސަދަޤާތް ބަހަމުން ދިޔަ ތަނަކަށް އެއްވި މީހުންގިނަވެ ފިތި ބާރުވެގެން 78 މީހަކު މަރުވެއްޖެއެވެ.

މިކަން ހިނގާފައިވަނީ ބުދަ ދުވަހުގެ ވަގުތެއްގައެވެ. އަލްޖަޒީރާގައި ބުނެފައިވަނީ ޞަދަޤާތުގެ ގޮތުގައި ތަކެތި ބަހަމުން ދިޔައީ ސްކޫލެއްގައި ކަމަށާއި، ކުރިއަށް އޮތް ޢީދާއި ގުޅުވައިގެން ބެހި މި ޞަދަޤާތް ލިބިގަތުމަށް އެތައް ސަތޭކަ ބަޔަކު އެ ސްކޫލަށް ޖަމާވިކަމަށެވެ.

ޔަމަނުގެ ހޫތީންގެ އޮފިޝަލް މީޑިއާއިން އާންމު ކޮށްފައިވާ ވީޑިއޯ އިން ފެންނަ ގޮތުން އެތަނަށް ޖަމާވި މީހުންގެ ޢަދަދު ގިނަވެ ތޮއް ޖެހި ފިތި ބާރުވެގެން މީހުންތައް ހަޅޭއްލަވާ އަޑާއި ރޯ އަޑު ވަރަށް ބާރަށް އިވެއެވެ. އަދި ސެކިޔުރިޓީ ސްޓާފުން މީހުންތައް ކޮންޓްރޯލް ކޮށް އަމާން ކުރަން މަސައްކަތް ކުރާ ތަން ފެނެއެވެ.

Advertisement

މަންޒަރުދުށް ދެމީހަކަކު ނިއުސް އެޖެންސީ އަކަށް ބުނެފައިވަނީ ތަނުގެ ބާރު ބޮޑުވެ މީހުންގެ ހަޅޭކުގެ އަޑަށް ހޫތިންގެ ސިފައިންގެ މީހަކު ހަވަޔަށް ބަޑި ޖަހައިފައި ވާކަމަށެވެ. އަދި ހަވަޔަށް ދޫކޮށްލި ވަޒަން އައިސް އެތަނުގައި ހުރި ކަރަންޓު ވަޔަރެއްގައި ޖެހި ގޮވުންތަކެއް ގޮވައިފައި ވާކަމަށެވެ. އަދި އެކަމުގެ ސަބަބުން އެއްވެފައި ތިބި މީހުންގެ މެދުގައި ވަރަށް ބޮޑަށް ބިރުވެރިކަން އުފެދިގެން ދިޔަ ކަމަށް ބުނެފައިވެއެވެ.

ހޫތީންގެ ދާޚިލީ ވަޒީރު ބުނެފައިވަނީ މި ހިތާމަވެރި ހާދިސާ ހިނގައިގެން ދިޔުމުގެ އަސްލު ސަބަބަކީ ޞަދަޤާތުގެ ގޮތުގައި ތަކެތި ބެހި ފަރާތުން ކަމާއި ބެހޭ އިދާރާތަކަށް އެންގުމެއް ނެތި އިންތިޒާމެއް ނެތި އެކަން ކުރުން ކަމަށެވެ.

މިކަން އިންތިޒާމް ކުރި ދެ ފަރާތާއި މެދު ފިޔަވަޅު އެޅިފައިވާކަމަށާއި، މައްސަލަ ތަހްޤީޤް ކުރެވެމުން ދާކަމަށް އޭނާ ވަނީ ބުނެފައެވެ. އަދި ހާދިސާގައި މަރުވި ކޮންމެ މީހެއްގެ އާއިލާއަށް 2000 ޑޮލަރު ދޭނެ ކަމަށާއި، ހާދިސާގައި އަނިޔާވި ކޮންމެ މީހެއްގެ އާއިލާއަށް 400 ޑޮލަރު ދޭނެކަމަށް ބުނެފައިވެއެވެ.