މި ރަމަޟާން މަހު މާލެ ސަރަޙައްދުގެ ގެތަކުން ކުނި އުކާލި މިންވަރު %31 އިތުރުވެފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.

ވޭސްޓް މެނޭޖްމަންޓް ކޯޕަރޭޝަން ވެމްކޯއިން ބުނީ އެހެން އަަހަރުތަކުގެ ރަމަޟާންމަހާ އެއްގޮތަށް މިއަހަރުގެ ރަމަޟާންމަހު ވެސް ކުނި ނަގާ މިންވަރު އިތުރުކަމަށެވެ.

އެގޮތުން އެހެން މަސްތަކާ ޚިލާފަށް މި ރޯދަމަހު ކުނި ނެގި މިންވަރު 31 އިންސައްތަ އިތުރުވެފައިވާކަމަށެވެ. މި ރަމަޟާންމަހުގެ ފުރަތަމަ ހަފްތާގައި 919 ޓަނުގެ ކުނި ނެގިނަމަވެސް އެއަދަދު 32 އިންސައްތައަށް އިތުރުވެ ގޭބިސީތަކުން ނަގާ ކުނީގެ ޢަދަދު ފަހުން 1215 ޓަނަށް އިތުރުވިކަމަށް ވެމްކޯއިން ބުނެއެވެ.

Advertisement

މި ރަމަޟާން މަހަކީ ކުނި ވަކިކޮށްގެން އުކާލަން ފެށިފަހުން އައިފުރަތަމަ ރަމަޟާން މަހެވެ.

ވެމްކޯއިން ހާމަކުރި ގޮތުގައި ކުނި ވަކިކޮށްގެން އުކާލާ މީހުންގެ އަދަދު އިތުރުވެފައިވަނީ %10 އިން %20 އަށެވެ. ކޮންމެ ރޯދަމަހަކީ ވެސް އާއްމުގޮތެއްގައި ބަދިގޭގައި އުފައްދާ ކުނި އިތުރު މަހެކެވެ.

އެހެންކަމުން ކޮންމެ ދުވަހަކު އުފައްދާ ކުނި މަދުކުރުމަށް ސަމާލުވުމަށާއި އެއްފަހަރު ބޭނުންކޮށްފައި އުކާލާ ތަކެތިން ދުރުހެލިވުމަކީ މުހިއްމުކަމެކެވެ.

ވެމްކޯއިން ކުނި އުކާލުމުގެ ޚިދުމަތްތައް 3 ގޮތަކަށް އަންނަނީ ދެމުންއެވެ. އެއީ ގޭގެއަށް ގޮސްގެން ކުނި އުކާލުމުގެ ޚިދުމަތާއި، ވެމްކޯގެ ވޭސްޓް ޓްރާންސްފަރ ސެންޓަރުން ކުނި ކަލެކްޓްކުރުމުގެ ޚިދުމަތުގެ އިތުރުން ގޭގެއިން ގަނޑުކޮށް ކުނި އުކާލަދިނުމުގެ (ކެޕްސް) ޚިދުމަތެވެ.