ކުލަގަދަ ރަސްމިއްޔާތަކާއި އެކު އާރުޑީސީ ރާބަދި ޗެލެންޖް 2023 ގެ ގުރުނެގުމުގެ ބާއްވައިފި އެވެ.

މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖުގައި މިއަހަރު 14 ޓީމެއް ބައިވެރިވެފައިވެއެވެ.

ޖަމްޢިއްޔަތުއް ޞަލާޙުގެ އިޖްތިމާޢީ މަރުކަޒުގެ ހޯލުގައި ރޭ ބޭއްވި ރަސްމިއްޔާތުގައި ހާއްސަ މެހެމާނުންގެ ގޮތުގައި އަރުޑީސީގެ ޗީފް ފައިނޭންޝަލް އޮފިސަރު ޔާސިރު ހަސަން ބައިވެރިވެވަޑައިގެންނެވި އެވެ. އަދި މިރަސްމިއްޔާތުގައި ވާހަކަފުޅު ދައްކަމުން އާރުޑީސީގެ ޗީފް ފައިނޭންޝަލް އޮފިސަރ ވަނީ ޖަމްޢިއްޔަތުއް ޞަލާޙް ފަރާތުން ހިންގަމުންދާ އިޖްތިމާއި ހަރަކާތްތައް ފާހަގަކުރައްވާ އެ ޖަމްއިއްޔާގެ ހިންގުންތެރިކަމަށް ތައުރީފު ކުރައްވާފަ އެވެ. އަދި އަންނަ އަހަރުގެ މުބާރާތް ވެސް އެކުންފުނީގެ ފަރާތުން ސްޕޮންސަރ ކޮށްދެއްވާނެކަމަށް ވަނީ ވިދާޅުވެފަ އެވެ.

މިއަހަރުގެ ރާބަދި ޗެލެންޖް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 14 ޓީމު ހަތަރު ގުރޫޕަކަށް ބަހާލައިގެންނެވެ. ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ.

ގުރޫޕް އެކެއް އަދި ދޭއްގެ އެއްވަނަ އަދި ދެވަނަ ޓީމު މުބާރާތުގެ ކުއާޓާ ފައިނަލަށް ހޮވޭއިރު ގްރޫޕް ތިނެއް އަދި ހަތަރަކުން ކުއާޓާގެ ފުރުސަތު ލިބޭނީ ގްރޫޕްގެ އެއްވަނަ ޓީމަށެވެ. އަދި ކުއާޓާ ފައިނަލުގެ ފަހު ދެޖާގަ ލިބޭނީ ގްރޫޕް ތިނެއް އަދި ހަތަރެއްގެ ތިންވަނަ ޓީމާއި ހަތަރުވަނަ ޓީމުގެ މެދުގައި ޕްލޭއޮފް ދެމެޗު ކުޅުމަށްފަހު އެ ދެމެޗުން މޮޅުވާ ދެޓީމަށެވެ.

2023 މެއި 07-16 އަށް މުބާރާތުގެ ގުރޫޕް ސްޓޭޖް މެޗުތައް ކުރިއަށްދާއިރު، ކޮންމެ ރެއަކުވެސް ދެ މެޗު ކުޅުމަށް ވަނީ ހަމަޖެހިފައެވެ. މެއި 17 ވަނަ ދުވަހު ގްރޫޕް ތިނެއް އަދި ހަތަރެއްގެ ޕްލޭއޮފް ދެމެޗު ކުޅޭއިރު، މެއި 18 އަދި 19 ވަނަ ދުވަހު މުބާރާތުގެ ކުއާޓާ ފައިނަލުގެ ހަތަރު މެޗު ކުޅުމަށް ވަނީ ހަމަޖެހިފައެވެ. މުބާރާތުގެ ސެމީ ފައިނަލްގެ ދެމެޗް މެއި 20 ވަނަ ދުވަހުގެ ރޭ ކުޅުމަށް ހަމަޖެހިފައިވާ އިރު ފައިނަލް މެޗު އޮންނާނީ މެއި 22 ވަނަ ދުވަހުގެރޭ އެވެ.  

ރާބަދި ޗެލެންޖް އެންމެ ފުރަތަަމަ ބާއްވާފައިވަނީ 2019 ވަނަ އަހަރު އެވެ. އަދި އެ މުބާރާތުގެ ފައިނަލުގައި މީދުއްޕަރު 4-3 ގެ ނަތީޖާއަކުން ބަލިކޮށް ޗެމްޕިއަންކަން ހޯދީ ދިގަލި މޯލްޑިވްސް އެވެ. އަދި އެކި ސަބަބުތަކާ ހުރެ 2020 އަދި 2021 ވަނަ އަހަރު މުބާރާތް ނުބޭއްވި ދިއުމަށް ފަހު މިދިޔައަހަރު ވަނީ އަލުން ރާބަދި ޗެލެންޖް ބާއްވަން ފައްޓަފައެވެ. އަދި މިއަހަރުގެ މުބާރުގެ މީޑިއާ ޕާޓްނަރަކީ ވޮއިސް އެވެ.