މި އަހަރުގެ ފިތުރު ޢީދުގެ މުނާސަބާއާއި ގުޅިގެން ދަ ސަދަން ސްޕޯޓްސް ކްލަބުގެ ފަރާތުން އައްޑޫ ސިޓީގައި ބާއްވާ އަންހެން ވޮލީބޯޅަ މުބާރާތް ފަށައިފި އެވެ. 

އޭޕްރިލް 21 އިން 29 އަށް ކުރިއަށްދާ މި މުބާރާތުގައި 4 ޓީމުން ވަނީ ބައިވެރި ވެފައެވެ. އެއީ އައްޑޫ ސިޓީ މަރަދޫއިން އައިލެންޑް ވޮއިސް އޮފް ޔޫތު (އައިވީ) އާއި، މީދޫ ވޮލީ ޓީމުގެ އިތުރުން މީދުގެ ދެ ޓީމެއް ކަމަށްވާ ވޯރިއާސް އާއި ޕުޝްޕާ އެވެ. 

އިއްޔަ ފެށިގެން ދިޔަ މި މުބާރާތުގައި އެންމެ ފުރަތަމަ ބައްދަލުކޮށްފައި ވަނީ މީދޫ ވޮލީ ޓީމާއި، ފޭދޫ ޓީމު ޕުޝްޕާ އެވެ. އެ މެޗު 3 ސެޓު 2 ސެޓުން ކާމިޔާބު ކޮށްފައިވަނީ މީދޫ ޓީމެވެ.

އެ މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ މީދޫ ޓީމުގެ ޖާޒީ ނަންބަރު 10 އެއް އާމިނަތު ނަވާއިމް އެވެ. 

ސަދަން ސްޕޯޓްސް ކްލަބުގެ މި މުބާރާތުގެ ޗެމްޕިއަން ޓީމަށް ވަނީ 7000 ރުފިޔާގެ ފައިސާގެ އިނާމެއް ހުށައަޅާފަ އެވެ. އަދި ދެވަނައަށް ދާ ޓީމަށް 3000 ރުފިޔާގެ ފައިސާގެ އިނާމެއް ވަނީ ހުށައަޅާފަ އެވެ. 

ސަދަން ސްޕޯޓްސް ކްލަބުން އިންތިޒާމުކޮށްގެން ކުރިއަށް ގެންދާ މި މުބާރާތުގެ މެއިން ސްޕޮންސަރަކީ އިކުއިޓީރިއަލް ޑައިވާސް ލޮޖް އެވެ. 

މި މުބާރާތުގެ މެޗެއް މިރޭ ކުޅުމަށް ވެސް ވަނީ ހަމަޖެހިފައެވެ. އެގޮތުން މިރޭގެ މެޗުގައި ބައްދަލުކުރާނީ މަރަދޫ ފޭދޫ އައިލެންޑް ވޮއިސް އޮފް ޔޫތު ޓީމާއި ވޯރިއާސް އެވެ. މިރޭގެ މެޗަކީވެސް ފޯރިގަދަ މެޗަކަށް ވާނެކަމަށް ބެލެވެއެވެ.