މިދިޔަ މަހު އަންހެން މީހަކަށް އަނިޔާކޮށްގެން ހައްޔަރު ކުރި ގދ. މަޑަވެލި ފިރިހެން މީހާ ގޭ ބަންދުން ވީއްލައި ދޫކޮށްލައިފިއެވެ.
މާރިޗް މަހު 21 ވަނަ ދުވަހު މަޑަވެލީގައި އަންހެން މީހަކަށް އަނިޔާ ކުރުމުގެ ސަބަބުން ހައްޔަރު ކުރި ފިރިހެން މީހާއަށް ކޯޓުން ވަނީ ޝަރީއަތް ނިމެންދެން ބަންދުގެ މުއްދަތު ޖަހާފައެވެ.
އިއްޔެ ބަންދުގެ މުއްދަތު ރިވިއު ކުރަން ކޯޓަށް ގެންދިޔުމުން ދޫކޮށްލި ނަމަވެސް އޭނާ ދޫކޮށްލި ސަބަބެއް ސާފެއް ނޫނެވެ.
މިދިޔަ މަހު ސޯސަލް މީޑިއާގައި އާންމު ވި ވީޑިއޯތަކެއްގައި އެ ފިރިހެން މީހާގެ ލޯބިވެރިޔާ ކަމަށްވާ އަންހެން މީހަކު މަޑަވެލީގައި މަގުމަތީ ދަމާފައި ގެންދާތަން ފެނިގެން ދެއެވެ. އަދި ދަމާފައި ގެންދިޔައިރު ފިރިހެން މީހާ އަންހެން މީހާއަށް އަނިޔާކޮށް ފަޔާއި އަތުން ޖަހާތަން ވެސް ވީޑިއޯއިން ފެނިގެން ދިޔައެވެ. އަންހެން މީހާ އެދުވަހު ސަލާމަތް ކޮށްފައިވަނީ އެ ސަރަހައްދަށް ދިޔަ ފިރިހެން މީހެކެވެ.
ވީޑިއޯއިން ފެނިގެން ދިޔަ މަޑަވެލި ފިރިހެން މީހާއަށް އުމުރުން 34 އަހަރު ވެފައިވާއިރު އަންހެން މީހާއަކީ ރ. އަތޮޅަށް ނިސްބަތްވާ އުމުރުން 30 އަހަރުގެ މީހެކެވެ.
Advertisement
This content is created and paid for by advertisers and does not involve Voice Journalists
