އެއީ އެމީހުން މަނާވުމަށް އެދިތިބި ކަމެއްނޫނެވެ. ވަކިވެގެން ދިޔުމަށް އެދުނުކަމެއްވެސް ނޫނެވެ. އެބައިމީޙުންގެ ގެތަކުގައި އެބައިމީޙުންގެ ދަނޑުތަކުން ލިބުނު ކަދުރާއި މޭބިސްކަދުރުން ހަދާފައިވާ ބަނގުރާ ބޮޑެތި ކަންވާރުތަކުގައި ރައްކާކުރެވިފައި ހުއްޓެވެ. ޢަރަބީން އަބަދުވެސް ކިޔަމުން އައި ޅެންތަކުގައި އެތައް ނަމަކުން ބަނގުރަލުގެ ވާހަކަތައް ތަރުތީބުކޮށް ކިޔައިއުޅުނެވެ. އެގަނެ އެބުއިމަށްޓަކައި ދިރުހަމާއި ދީނާރު އެއްކުރެއްވައި އެކަމަށް ހޭދަކުރެއްވި ކަމެކެވެ. ގެއަށް އަންނަ މެހެމާނުންނަށްވެސް މެހެމާންދާރީ އަދާކުރަނީ ބަނގުރަލުގެ ތަށިތަކުންނެވެ. އެބަނގުރާވަނީ އެބައިމީހުންގެ ދިރިއުޅުމާއި ދުރުނުކުރެވޭ ވަރަށް އެކުވެފައެވެ.

އިސްލާމީ ރިސާލަތުގެ ހުކުމްތައް ބާވައިލައްވަމުން ދިޔަ ދުވަސްވަރު ހުދު ޢަރަބީންނަށްވެސް ބަނގުރަލުގެ ދެކޮޅު ފެންނަމުންދިޔައެވެ. އެއްބަޔަކު އެވިއްކާ، އެބޮއި އެއިން ލައްޒަތު ހޯދަމުން އޭގެ ފައިދާ ލިބިގަންނަމުންދިޔައެވެ. އަނެއް ބަޔަކަށް އެބަނގުރަލުން ގެއްލުންތަކާއި ނުރައްކާތައް ފެނި އެކަންވެސް އިހްސާސްވަމުންދިޔައެވެ. އެބޮއިގެން އެއްބަޔަކު އަނެއްބަޔަކަށް ޢުދުވާން ހިންގަމުންދިޔައެވެ. ބައެއްފަހަރު މާރާ މާރީވެސް ހިންގައެވެ. މަސްތުވެގެން ތިބޭ ހާލު ވާނުވާ ނޭނގި މީހުން މަރާ ހިސާބަށްވެސް ކަންކަން ދިޔައެވެ.

އެގޮތުން ރަސޫލާގެ އަރިހުގައި ޞަޙާބީ ބޭކަލުން ބަނގުރަލާއި ބެހޭގޮތުން ސުވާލު ކުރަމުންދިޔައެވެ. އެހެންކަމުން الله ތައާލާ އެންމެ ފުރަތަމަ ޤުރުއާނުގައި އިޝާރާތެއް ދެއްވީ އެބަނގުރަލުގައި ގެއްލުމާއި ފައިދާ ވާކަމުގައެވެ. އަދި އޭގެ ފައިދާއަށްވުރެއް ގެއްލުން ބޮޑު ކަމުގައެވެ. މިއިޝާރާތާއިއެކު ޞަޙާބީންގެ ތެރެއިން ބައެއް ބޭކަލުން ބަނގުރާލާ ދުރުވެގެންދިޔައެވެ. މީސްތަކުންގެ ނަފްސުތައް ލެނބިފައިވާ މިނުބައި އާދައިން ސަލާމަތް ކުރުމަށް ދެވަނަ އަށް އެޅިގެން ދިޔަ ފިޔަވަޅަކީ އެބަނގުރާ ބޮއެގެން މަސްތުވެގެންތިބެ ނަމާދާއި ގާތް ނުވުމަށް ޤުރުއާނުގައި ކުރެވުނު އަމުރުފުޅެވެ. މިހާލަތުގައި މަދީނާގައި އޭރުވެސް ބަނގުރާ ބުއިން ހުއްޓާނުލާ ބައިވަރު ޞަޙާބީ ބޭކަލުން ތިއްބެވިއެވެ. ސަބަބަކީ އެކީއެކަށް ބަނގުރާ ހަރާމް ކުރައްވާފަދަ އިލާހީ އަމުރުފުޅެއް އައިސްފައިނުވާތީއެވެ.

އަނަސް ރަޟިޔަالله ޢަންހު ވިދާޅުވިއެވެ. ތިމަންމެންގެ ގޭގައި ތިމަންކަލޭގެފާނު އަބޫ ތަލްހާގެފާނަށާއި އަބޫ އައްޔޫބުގެ ފާނަށާއި އަދިވެސް ރަސޫލުالله ޞައްލަالله ޢަލައިހި ވަސައްލަމަގެ ޞަހާބީންގެ ތެރެއިން ބޭކަލުންތަކަކަށް ބަނގުރާ ބުއިމަށްޓަކައި ދެމުންދިޔައީމެވެ. އެހިނދު މީހަކު އައިސް ވިދާޅުވިއެވެ. ތިޔަބައިމީހުންނާ ހަމަޔަށް ޚަބަރު އަތުވެއްޖެހެއްޔެވެ؟ ދެން ތިމަންމެން ދެންނީވެމެވެ. ނޫނެކެވެ. އެހިނދު އެމީހަކު ވިދާޅުވިއެވެ. ރާ حرام ކުރައްވާފައިވެއެވެ. ފަހެ، އެމީހަކު ވިދާޅުވިއެވެ. އޭ އަނަސްގެފާނެވެ! ކަލޭގެފާނު ރަލުގެ ކަންވާރުތައް އުކާލައްވާށެވެ.

ބުޚާރީގެ ރިވާޔަތެއްގައި ވެއެވެ: "ފަހެ، ތިމަންކަލޭގެފާނު ނުކުމެވަޑައިގަތް އެތަކެތި އުކާލެއްވީމެވެ. ފަހެ، އެކަމުގެ ސަބަބުން މަދީނާގެ މަގުތަކުގައި ރަލުގެ ކޯރުތައް ދެމިގެންދިޔައެވެ."

އެންމެ މީހެއްގެ ފަރާތުން ލިބިގެން ދިޔަ ބަނގުރާ ހަރާމް ކުރެއްވުމުގެ ހަބަރު ޔަޤީން ކުރައްވަން ބޭނުންވާކަމުގެ ބަހަނާއެއް އެބޭކަލުން ނުދައްކަވައެވެ. އިތުރަށް އެކަމަކާއި ބެހޭގޮތުން ސުވާލެއްވެސް ނުކުރައްވައެވެ. އުޒުރު ދައްކާ ގޭގައިހުރި ބަނގުރާތައް ބޭނުންކުރުމަށް އެހެން ގޮތެއް ހޯދަކަށްވެސް މަސައްކަތެއް ނުކުރައްވައެވެ. ބަނގުރަލާ މަސްތުވުމާ އެބޭކަލުން ދުރުކުރާކަށް ޚުތުބާދީ ދަރުސްދޭނެ ބަޔަކު ބޭނުމެއްނުވިއެވެ. ފުލުހުންނާއި ސިފައިންނަކަށް ވެސް ބޭނުމެއްނުވިއެވެ. ކޯޓުތަކުން ހުކުމް އިއްވާ ޤާޒިންގެ ހުކުމްތަކަކަށްވެސް ބޭނުމެއްނުވިއެވެ. އެކަމަކު އެބައިމީހުންނަށް އެމަސްތުން ސަލާމާތްވާން ފުދިގެން ދިޔައީ ޤުރުއާނުގެ ހަމަ އެންމެ އާޔަތެކެވެ.

އެޚަބަރަށް ތުނބުގައި ހުރި ރާތަށިތަކާއިއެކު ގޭގައި ހުރި ބަނގުރަލުގެ ކަންވާރުތައް ވެސް އުކާލެއްވިއެވެ. ތިމަންމެން އަޑުއަހައިފީމުއޭ އަދި ތިމަންމެން ކިޔަމަންވެއްޖައީމުއޭ ބުނެ ހަޤީޤީ މުސްލިމުންގެ ޝިއާރު ފާޅުކުރިއެވެ. ތިމަންމެން ތިޔަކަން ހުއްޓާލައިފީމުއޭބުނެ ވަގުތުން ނަމޫނާ ދެއްކެވިއެވެ. ކިޔަމަންތެރިވުމުގެ އެންމެ ފުރިހަމަ މިސާލު އަމަލީ ގޮތުން ފާޅުކުރެއްވިއެވެ. ކާއިނާތުގެ ރައްބުގެ އަމުރުފުޅަށް ފުރިހަމައަށް ބޯލެންބެއްވިއެވެ. މަސްތުގައިޖެހިފައިތިބި މުސްލިމު ޒުވާނުންނަށް ލާމަސީލު ނަމޫނާއެއް އަބަދުގެ އަބަދަށް ދޫކުރެއްވިއެވެ.