ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިންތިޒާމުކޮށްގެން ބާއްވާ، މި އަހަރުގެ އިންޓަ ރިސޯޓް ވޮލީ ބޯޅަ ޗެމްޕިއަންޝިޕުގައި ބައިވެރިވުމުގެ ފުރުސަތު ހުޅުވާލައިފި އެވެ.

މިއަހަރުގެ މުބާރާތް ފެށުމަށް ހަމަޖެހިފައި ވަނީ ޖޫން މަހުގެ ފަސް ވަނަ ދުވަހުއެވެ. މިއަހަރުގެ އިންޓަ ރިސޯޓް ވޮލީބޯލް ޗެމްޕިއަންޝިޕް އެކުލެވިގެން ވަނީ ދެ މުބާރާތެއްގެ މައްޗަށެވެ. އެއީ އިންޓަ ރިސޯޓް ޒޯން ޗެމްޕިއަންޝިޕާއި، ރިސޯޓް ވޮލީ ބޯޅާ ޗެމްޕިއަންޝިޕް އެވެ.

ޒޯން ޗެމްޕިއަންޝިޕްގައި ވާާދަކުރާ ޓީމުތައް ޒޯންތަކަށް ބެހުމުގައި ބަލާނީ އެ ރިސޯޓެއް ހިމެނޭ ސަރަހައްދަކަށެވެ. މިގޮތުން ޒޯން ޗެމްޕިއަންޝިޕް މުބާރާތް ކުރިއަށް ދާނީ ކޮންމެ ޒޯނެއް ވަކިން ކުޅެ، ޗެމްޕިއަން ޓީމު ހޮވާ ގޮތަށެވެ. މުބާރާތުގައި ބައިވެރިވުމުގެ އެންމެ ފަހު ތާރީޚަކީ އަންނަ މެއި މަހުގެ 22 ވަނަ ދުވަހުގެ މެންދުރު 13:00 ގެ ކުރިންނެވެ. އަދި ބައިވެރިވާ ޓީމުތަކުން، ޓީމު ލިސްޓު ހުށަހެޅުމުގެ އެންމެ ފަހުގެ ތާރީޚަކީ މެއި މަހުގެ 27 ވަނަ ދުވަހުގެ މެންދުރު 13:00 ގައެވެ.

ވީއޭއެމް އިން މައުލޫމާތުދޭ ގޮތުގައި މިއަހަރުގެ މުބާރާތަކީ އެހެން އަހަރުތަކަށް ވުރެ ވާދަވެރި އަދި ފޯރި ގަދަ މުބާރާތަކަށް ވާނެ އެވެ. ހަމައެއާއެކު މުބާރާތަށް ޓީމުތަކުން ދުރާލައި، ފޯރީގައި ތައްޔާރުވަމުން އަންނަ ކަމަށް ވެސް އެ އެސޯސިއޭޝަނުން ބުނެ އެވެ. މިއަހަރުގެ މުބާރާތުގައި ހޮވާ މަގާމުތަކުގެ ތެރޭގައި ޗެމްޕިއަން ޓީމު، ރަނަރަޕް ޓީމު، ތިން ވަނަ ޓީމު (ފަސް ޓީމު ނުވަތަ އެއަށްވުރެ ގިނަ ޓީމު ހިމެނޭ ނަމަ)، ކޮންމެ ޒޯނެއްގެ ޑްރީމް ޓީމު، އެންމެ މޮޅު ކޯޗު އަދި މުބާރާތުގެ އެންމެ މޮޅު ކުޅުންތެރިޔާ ހިމެނެ އެވެ.

އަދި މުބާރާތް ހޯސްޓު ކުރުމަށް ޝައުޤުވެރިވާ ރިސޯޓުތަކުން އެކަމަށް އެދި ވީއޭއެމަށް ހުށަހަޅަން ޖެހޭނެ އެވެ.