ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި މެނޭޖްކުރުމަށް ބޭނުންކުރާ ކޮތަޅު ދޫކުރުމަށް ހަމަޖެހިފައިވާ ކަމަށް އެކުންފުނިން ބުނެފިއެވެ.
އެކުންފުނިން މިކަމާއި ގުޅިގެން ކޮށްފައިވާ އިއްލާނެއްގައި ބުނެފައިވަނީ ކުނި މެނޭޖްކުރުމަށް ބޭނުންކުރާ 3 ސައިޒެއްގެ ކޮތަޅެއް އެކުންފުނިން ވިއްކާނެ ކަމަށާއި، 27 އޭޕްރީލުން ފެށިގެން ވެމްކޯއިން ކަޅު ކުލަޔާއި ފެހި ކުލަ ހިމެނޭހެން ތިނަ ސައިޒެއްގެ ކޮތަޅު ވިއްކާނެއެވެ. އެގޮތުން 17.11، 27.18 އަދި 48.36 މި ތިން ސައިޒުގެ ކޮތަޅު ވިއްކުމަށް ހަމަޖެހިފައިވާކަމަށް ވެމްކޯއިން ބުނެފައިވެއެވެ.
އަދި ކުނި އުކާލުމުގައި ކުނިވާ ޒާތުގެ ކުނި ނުވަތަ އަމިއްލައަށް ފަނާވާ ޒާތުގެ ކުނި ފެހި ކޮތަޅުގައި ބަންދު ކުރުމަށާއި، އަދި އެހެނިހެން ކުނި ކަޅުކޮތަޅުގައި ބަންދުކުރުމަށް ވެމްކޯއިން ބުނެފައިވެއެވެ.
ވެމްކޯއިން އިލްތިމާސް ކޮށްފައިވަނީ ވެމްކޯއިން ވިއްކާ ކޮތަޅު ހަމައެކަނި ކުނި އުކުމަށް ޙަާއްސަކޮށް ބޭނުންކުރުމަށެވެ. ކުނި އުކުމަށް ޚާއްސަކޮށް ވިއްކާ ކޮތަޅު ވެމްކޯގެ ކަސްޓަމަރ ފްރަންޓް އޮފީސްތަކުން ލިބޭނެ ކަމަށް ވެމްކޯއިން ބުނެއެވެ.
ވެމްކޯއިން ބުނީ މިކަމަކީ 18 އޭްޕްރީލް އިން ފެށިގެން ވިޔަފާރި ހަރަކާތްތަކުން ޕޮއިންޓް އޮފް ސޭލްގައި ކަސްޓަމަރަށް ވިއްކާ ނުވަތަ ފޯރުކޮށްދޭ ކޮންމެ ޕްލާސްޓިކް ކޮތަޅަކަށް، ޕްލާސްޓިކް ކޮތަޅުގެ ފީގެ ގޮތުގައި 2ރފ ނަނގާގޮތައް ކަނޑައަޅާފައިވާއިރު، ކުނި މެނޭޖްކުރުމުގެ ޚިދްމަތްދޭ ފަރާތްތަކުން ކުނި އެޅުމަށް ޚާއްސަ ކޮށް ވިއްކާ "ބިންލައިނަރ" އަށް ފީއެއް ނެގުމަށް ހަމަޖެހިފައިނުވާ ކަމަށެވެ.
ވެމްކޯއިން ބިންލައިނަރ ނުވަތަ ކުނި އެޅުމަށް ޚާއްސަ ކޮތަޅު ވިއްކަން ނިންމީ ކަސްޓަމަރުންނަށް ފަސޭހަ ކަމާއި އެކު ކުނި އުކުމަށް ކޮތަޅު ލިބޭނެ އިންތިޒާމެއް ހަމަޖެއްސުމަށް ކަމަށެވެ.
Advertisement
This content is created and paid for by advertisers and does not involve Voice Journalists
