ދުނިޔޭގެ އެންމެ ގިނަދުވަސްވީ ފުޓްބޯޅަ މުބާރާތް، އިގިރޭސި އެފްއޭ ކަޕްގެ މިއަހަރުގެ ފައިނަލްގައި މެންޗެސްޓާގެ ދެ ކްލަބު ކަމަށްވާ ޔުނައިޓެޑާއި ސިޓީ ވާދަކުރަންޖެހިއްޖެއެވެ.

ރޭކުޅެވުނު އެފްއޭ ކަޕްގެ ސެމީފައިނަލުގެ ފުރަތަަމަ މެޗުގައި 3-0 ގެ ނަތީޖާއަކުން ޝެފީލްޑް ޔުނައިޓެޑް ބަލިކޮށް ފައިނަލްގެ ފުރަތަމަ ޖާގަ މެންޗެސްޓާ ސިޓީ ހޯދިއިރު، މިރޭ ކުޅެވުނު ސެމީފައިނަލްގެ ދެވަަނަ މެޗުގައި ބްރައިޓަން އާއި ވާދަކޮށް ޕެނަލްޓީޖަހައިގެން ފައިނަލުގައި ދެވަަނަ ޖާގަ މެންޗެސްޓާ ޔުނައިޓެޑު ވަނީ ކަށަވަރުކޮށްފައެވެ.

މިރޭގެ މެޗުގެ ފުރަތަަމަ ހާފުގައި ބްރައިޓަންގެ އާޖެންޓީނާ މިޑްފީލްޑަރު އެލެކްސިސް މެކް އެލިސްޓާ އަށާއި އެޓީމުގެ ޕެރަގުއޭ ފޯވާޑް ޖޫލިއޯ އެންސިސޯ އަށް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބި ބޭނުންނުކުރެވިފައެވެ.

ފުރަތަަމަ ހާފުގައި އެންމެ ފަހު މިނެޓްގައި މެންޗެސްޓާގެ ޕޯޗުގަލް މިޑްފީލްޑަރު ފެނާންޑޭޒް ތަނަވަސްކޮށްދިން ފުރުސަތެއްގައި އެޓީމުގެ ބްރެޒިލްގެ މިޑްފީލްޑަރު ކަސަމީރޯއަށް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބިފައެވެ. ނަމަވެސް ކަސަމީރޯ ފޮނުވާލި ބޯޅަ ގޯލާއި އަމާޒުނުވެ ދިޔައީ ދަނޑިކައިރިން ބޭރަށެވެ. އަދި ފުރަތަަމަ ހާފުގެ އިތުރު ވަގުތުގައި އެޓީމުގެ ޑެންމާކް މިޑްފީލްޑަރު ކްރިސްޓިއަން އެރިކްސަން މުޅިން ހުސްކޮށް ހުރެ ފޮނުވާލި ހަމަލާ ބްރައިޓަން ގޯލްކީޕަރު ރޮބަޓް ސަންޗޭޒް ވަނީ ދިފާއުކޮށްފައެވެ.

ދެވަަނަ ހާފްގައި ވެސް ބްރައިޓަން ގެ ޖޫލިއޯ އެންސިސޯ މުޅިން ހުސްކޮށް ހުރެ ފޮނުވާލި ހަމަލާ މެންޗެސްޓާގެ ކީއްޕަރު ދިފާއުކޮށް ކޯނަރަކަށް ބޭރުކޮށްލިއިރު، އެ ކޯނަރުން ގޯލް ކުރިމައްޗަށް ހުރަސްކޮށްދިން ބޯޅަ ވެލްބެކް ބޮލުން ފޮނުވާލުމުން ގޯލް ދަނޑި ކައިރިން ދިޔައީ ބޭރަށެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މެޗުގެ 90 މިނެޓުގެ ކުޅުން ހަމަވިއިރު، ދެޓީމުންކުރެ ޓީމަކަށް ލަނޑެއް ކާމިޔާބު ކުރެވޭގޮތެއް ނުވުމުން މެޗުގެ ނަތީޖާ ނެރުމަށްޓަކައި އިތުރު ވަގުތުގެ 15 މިނެޓުގެ ދެ ހާފު ކުޅެގެން ވެސް ނަތީއްޖައެއް ނުނެރެވުން، ނަތީއްޖާނެރުމަށް ޖެހި ޕެނަލްޓީގައި މެންޗެސްޓާ ޔުނައިޓެޑް ކުރި ހޯދީ 7-6 ގެ ނަތީޖާއަކުންނެވެ.

ޔުނައިޓެޑުން ފޮނުވާލި 7 ޕެނަލްޓީ އެޓީމުން ކާމިޔާބުކުރިއިރު ބްރައިޓަން ގެ 7 ވަނަ ޕެނަލްޓީ އެޓީމުގެ އިގިރޭސި މިޑްފީލްޑަރު މާޗު ފޮނުވާލުމުން ގޯލާ އަމާޒުނުވެ ދިޔައީ ހުރަސް ދަނޑިމަތިން ބޭރަށެވެ.

އެފްއޭ ކަޕްގެ ފައިނަލްގައި މެންޗެސްޓާ ޔުނައިޓެޑާއި މެންޗެސްޓާ ސިޓީ ވާދަކުރާ މެޗު ކުޅުމަށް ހަމަޖެހިފައިވަނީ މިއަހަރުގެ ޖޫން މަހުގެ ތިންވަނަ ދުވަހުގެ ރޭ 19:00 ގައެވެ.