ކުނި މެނޭޖް ކުރުމުގެ ގާނޫނުގައި ހިމެނުނު ޕްލާސްޓިކް ކޮތަޅު ބޮނޑިން ފީ ނެގުން އިސްތިސްނާ ކުރާ މާއްދާ އުނި ކުރުމާއިމެދު މީގެ ކުރިން ސަރުކާރުން ދެކޮޅު ހަދާފައި ނުވާ ކަމަށް މަޖިލީހުގެ ކޮމިޓީން ދެކޭ ކަމަށާ، އެކަން ކޮމިޓީގެ ޔައުމިއްޔާއިންވެސް އެނގޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް ލަތީފް ވަނީ ކޮތަޅު މައްސަލާގައި ރައްޔިތުންނަށް ތަކްލީފްތައް ޖެހި، ކޮތަޅު ބޮނޑީގެ އަގު އިންތިހާއަށް މަތިވީ، ކޮތަޅު ބޮނޑިން ފީ ނެގުން އިސްތިސްނާ ކުރާ މާއްދާ މަޖިލީހުން އުނި ކުރުމުން ކަމަށް އެންވަޔަރަމެންޓް މިނިސްޓްރީން ބުނެފައިވާކަން ފާހަގަކުރައްވައި، އެކަން އިތުރަށް ތަފްސީލް ކޮށްދެއްވުމަށް އެންވަޔަރަމެންޓް މިނިސްޓަރު އާމިނަތު ޝައުނާގެ އަރިހުން އެދިލައްވާފައެވެ.
ޔާސިރުގެ ސުވާލަށް ޖަވާބު ދެއްވަމުން ޝައުނާ ވިދާޅުވީ، ކުނި މެނޭޖް ކުރުމުގެ ގާނޫނުގެ އިސްލާހު، ސަރުކާރުގެ ފަރާތުން މަޖިލީހަށް ހުށަހެޅި އިރު، ޕްލާސްޓިކް ކޮތަޅުން ނެގޭ ފީ، އިސްތިސްނާވާ ހާލަތްތަކެއް ހިމަނާފައިވާ ކަމަށެވެ.
އެ ހާލަތް ތަކުގެ ތެރޭގައި, 50 ކޮތަޅު، އަދި 50 ކޮތަޅަށްވުރެ ގިނައިން ހޯލްސޭލްކޮށް ވިއްކާ ފަރާތްތަކުން، މި ފީ ވާނީ އިސްތިސްނާވާ ހާލަތްތަކުގެ ތެރޭގައި ހިމަނާފައި. އެއާއި އެކީގައި، ހަނޑޫ، ހަކުރު، ފުށް ގަންނަ ފަރާތްތަކުން، އެ ގަންނަ ކޮތަޅުތަކަށްވެސް އިސްތިސްނާ ހާލަތްތައް ވާނީ ހިމަނާފައި.
މިނިސްޓަރު އާމިނަތު ޝައުނާ
ޝައުނާގެ ވާހަކަ އާއި ގުޅިގެން، ރައީސް ނަޝީދު ވަނީ މެންބަރުގެ ސުވާލަށް ސީދާ ޖަވާބު ދެއްވައި، އިސްތިސްނާ މާއްދާ އުނި ކުރީ ހަމައެކަނި މަޖިލީހުންތޯ ސާފު ކޮށްދެއްވުމަށް އެދިލައްވާފައެވެ.
އެ އިސްތިސްނާ އުނިކުރީ ހަމައެކަނި މަޖިލީހުންތޯ؟ މި މަޖިލީހަށް ފެންނަ ފެނުމުގައި، އޭގައި ސަރުކާރުން އެއްވެސް، އެއްވެސް އިރެއްގައި، އެ އިސްތިސްނާ އުނި ކުރުމާއި ގުޅޭގޮތުން އިންކާރު ކޮށްފައެއް ނުވޭ. އަދި ވާގި ދީފައި، ހިތްވަރު ދީފައި ވާކަމަށް، މި މަޖިލީހުގެ ކޮމިޓީއަށް ފެންނަ ކަމަށް ކޮމިޓީގެ ޔައުމިއްޔާއިން ފެންނަނީ.
މަޖިލީހުގެ ރައީސް މުހައްމަދު ނަޝީދު
ރައީސް ނަޝީދަށް ރައްދު ދެއްވައި ޝައުނާ ވަނީ، ކޮމިޓީގެ ޔައުމިއްޔާ އާއި ކޮމިޓީ ރިޕޯޓް ވެސް އޭނާ ކިޔާފައިވާކަން ފާހަގަ ކުރައްވާފައެވެ. އަދި، އެ ކިޔުމުންވެސް، އިސްތިސްނާވާ މާއްދާ، މަޖިލީހުން އުނިކުރަން ނިންމި ނިންމުން ދިފާއު ކުރަން ދެއްކޭނެ ބަހަނާއެއް ނުފެންނަ ކަމަށް އޭނާ ވިދާޅުވި އެވެ.
ޝައުނާގެ ވާހަކަ ތަކާއި ގުޅިގެން ރައީސް ނަޝީދު ވަނީ ކޮމިޓީގެ ޔައުމިއްޔާ އިއްޔެގެ މަޖިލީހުގައި ވެސް އިއްވާފައިވާ ކަމަށާ، އަދި އެ މާއްދާ އުނި ކުރި ސަބަބު ވަރަށް ދިގުކޮށް، އެ ކޮމިޓީން ކިޔައި ދީފައިވާކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
