ކުނި މެނޭޖް ކުރުމުގެ ގާނޫނުގައި ހިމެނުނު ޕްލާސްޓިކް ކޮތަޅު ބޮނޑިން ފީ ނެގުން އިސްތިސްނާ ކުރާ މާއްދާ އުނި ކުރުމާއިމެދު މީގެ ކުރިން ސަރުކާރުން ދެކޮޅު ހަދާފައި ނުވާ ކަމަށް މަޖިލީހުގެ ކޮމިޓީން ދެކޭ ކަމަށާ، އެކަން ކޮމިޓީގެ ޔައުމިއްޔާއިންވެސް އެނގޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް ލަތީފް ވަނީ ކޮތަޅު މައްސަލާގައި ރައްޔިތުންނަށް ތަކްލީފްތައް ޖެހި، ކޮތަޅު ބޮނޑީގެ އަގު އިންތިހާއަށް މަތިވީ، ކޮތަޅު ބޮނޑިން ފީ ނެގުން އިސްތިސްނާ ކުރާ މާއްދާ މަޖިލީހުން އުނި ކުރުމުން ކަމަށް އެންވަޔަރަމެންޓް މިނިސްޓްރީން ބުނެފައިވާކަން ފާހަގަކުރައްވައި، އެކަން އިތުރަށް ތަފްސީލް ކޮށްދެއްވުމަށް އެންވަޔަރަމެންޓް މިނިސްޓަރު އާމިނަތު ޝައުނާގެ އަރިހުން އެދިލައްވާފައެވެ. 

ޔާސިރުގެ ސުވާލަށް ޖަވާބު ދެއްވަމުން ޝައުނާ ވިދާޅުވީ، ކުނި މެނޭޖް ކުރުމުގެ ގާނޫނުގެ އިސްލާހު، ސަރުކާރުގެ ފަރާތުން މަޖިލީހަށް ހުށަހެޅި އިރު، ޕްލާސްޓިކް ކޮތަޅުން ނެގޭ ފީ، އިސްތިސްނާވާ ހާލަތްތަކެއް ހިމަނާފައިވާ ކަމަށެވެ. 

Advertisement

ޝައުނާގެ ވާހަކަ އާއި ގުޅިގެން، ރައީސް ނަޝީދު ވަނީ މެންބަރުގެ ސުވާލަށް ސީދާ ޖަވާބު ދެއްވައި، އިސްތިސްނާ މާއްދާ އުނި ކުރީ ހަމައެކަނި މަޖިލީހުންތޯ ސާފު ކޮށްދެއްވުމަށް އެދިލައްވާފައެވެ. 

ރައީސް ނަޝީދަށް ރައްދު ދެއްވައި ޝައުނާ ވަނީ، ކޮމިޓީގެ ޔައުމިއްޔާ އާއި ކޮމިޓީ ރިޕޯޓް ވެސް އޭނާ ކިޔާފައިވާކަން ފާހަގަ ކުރައްވާފައެވެ. އަދި، އެ ކިޔުމުންވެސް، އިސްތިސްނާވާ މާއްދާ، މަޖިލީހުން އުނިކުރަން ނިންމި ނިންމުން ދިފާއު ކުރަން ދެއްކޭނެ ބަހަނާއެއް ނުފެންނަ ކަމަށް އޭނާ ވިދާޅުވި އެވެ. 

ޝައުނާގެ ވާހަކަ ތަކާއި ގުޅިގެން ރައީސް ނަޝީދު ވަނީ ކޮމިޓީގެ ޔައުމިއްޔާ އިއްޔެގެ މަޖިލީހުގައި ވެސް އިއްވާފައިވާ ކަމަށާ، އަދި އެ މާއްދާ އުނި ކުރި ސަބަބު ވަރަށް ދިގުކޮށް، އެ ކޮމިޓީން ކިޔައި ދީފައިވާކަމަށް ވިދާޅުވެފައެވެ.