ސަރުކާރުގެ ފެން ކުންފުނި ފެނަކަ ކޯޕަރޭޝަނުން ޚިދުމަތް ހޯދުމަށްފަހު އެކި ވިޔަފާރިތަކަށް ނުދައްކާ އޮތް 11.8 މިލިއަން ރުފިޔާ އެއް މަސްތެރޭ ދައްކާ ޚަލާސް ކުރުމަށް ސިވިލް ކޯޓުން އަމަުރުކޮށްފި އެވެ. 

ސިވިލް ކޯޓުން އެފަދައިން ހުކުމްކޮށްފައިވަނީ މިދިޔަ އަހަރުގެ ޑިސެމްބަރު މަހު އިކުއިވީ އިންވެސްޓްމަންޓު މަނަކަށް ކިޔާ ކުންފުންޏަކުން ފެނަކައިގެ މައްޗަށް ކުރި ދައުވާއާއި ގުޅިގެން ހިންގި ޝަރީއަތުގައެވެ. 

އެ ކުންފުނިން ދައުވާކުރީ އެ ދެ ކުންފުނީގެ ދެމެދުގައި ކުރެވިފައިވާ ވިޔަފާރީގެ މުއާމަލާތްތަކުގެ ފަސް ބިލަކަށްވާ ފައިސާއާއި ޖޫރިމަނާގެ ގޮތުގައި ޖުމްލަ 18.3 މިލިއަން ރުފިޔާ ހޯދާށެވެ.

އެއީ ފުރަތަމަ ބިލަށްވާ 4،829،376ރ. އާއި ދެވަނަ ބިލަށްވާ 58،300ރ. އާއި އިތުރު ތިން ބިލަށް، ކޮންމެ ބިލަކަށްވާ 2،738،573ރ. އާއެކު، ފަސް ބިލުގެ ޖުމްލަ 13،103،397ރ. އާއި އެ ފައިސާ ދައްކަން ދީފައިވާ މުއްދަތުގައި ފައިސާ ނުދެއްކުމުން ޖޫރިމަނާގެ ގޮތުގައި ދައުވާކުރި މުއްދަތާ ހަމައަށް އަރާފައިވާ 5،291،614ރ. އާއެކު ޖުމްލަ 18،395،012 ރުފިޔާ އެވެ.

އެ ދައުވާއަށް ރައްދު ދިނުމުގެ މުއްދަތު ހަމަވިފަހުން ފެނަކައިން ވަނީ އެ ކުންފުންޏަށް އިކުއިވީއިން ހޯދަން އެދިފައިވާ ފަސް ބިލަށްވާ 11،853،397ރ ނުދައްކާ އޮތްކަމަށް އިއުތިރާފު ވެފައެވެ.

އޭގެ އިތުރުން ފެނަކައިން ވަނީ ފައިސާ ނުދައްކާ ގިނަ ދުވަސްތަކެއް ވުމާއި ގުޅިގެން އަރާފައިވާ ޖޫރިމަނާ ފައިސާ ދެއްކުމަށް އިންކާރުކޮށްފަ އެވެ.

ފެނަކައިން އެދުނީ ފަސް ބިލަށް ވާ ފައިސާ ފަސް މަހަށް ބަހާލައިގެން ދެއްކޭނެ ގޮތަށް ނިންމައި ދިނުމަށެވެ. 

ފެނަކައިގެ އެ ފޯމާ ގުޅިގެން އިކުއިވީގެ ފަރާތުންވެސް ވަނީ ފެނަކައިން އެ ބިލުތަކަށް ނުދައްކާ އޮތީ 11،853،397ރ. ކަމަށް ބުނެފަ އެވެ. އެ ފައިސާ ނުލިބި ގިނަ ދުވަސްތަކެއް ވުމުން ބޮޑު ގެއްލުމެއް ވެފައިވާތީ އިކުއިވީގެ ފަރާތުން ކޯޓުގައި އެދުނީ 30 ދުވަހުގެ ތެރޭގައި އެ ފައިސާ ނަގައިދިނުމަށެވެ. އަދި ޖޫރިމަނާގެ ގޮތުގައި އިންސާފުވެރި އަދަދެއް ނަގައިދިނުމަށް ވެސް އެ ކުންފުނިން އެދުނެވެ. 

ދެ ފަރާތުގެ ވާހަކަތަކަށް ފަހު ކޯޓުން ނިންމީ މަދަނީ އިޖުރާތުގެ ގާނޫނަށް ރިއާޔަތްކޮށް ޝަރީއަތުން ނިންމީ އިކުއިވީގެ ފަރާތުން އެދިފައިވާ ގޮތަށް ޖޫރިމަނާ ފައިސާ ނަގައިދެވެން ނެތް ކަމަށެވެ.

އެހެން ނަމަވެސް ފެނަކައިން އިކުއިވީ އިންވެސްޓްމަންޓަށް ދައްކަންޖެހޭ 11،853،397 ރުފިޔާ އަކީ ނުދައްކާ އޮތް ފައިސާ ކަމަށް ފެނަކައިގެ އިއުތިރާފުން ސާބިތުވާކަމަށް ކަނޑައަޅައި، އެ ފައިސާ 30 ދުވަހުގެ ތެރޭގައި ދައްކައި ހަލާސްކުރުމަށް ސިވިލް ކޯޓުން ވަނީ ހުކުމްކޮށްފަ އެވެ. 

ކޯޓުން އެފަދައިން ހުކުމްކޮށްފައިވަނީ މިދިޔަ ބުރާސްފަތި ދުވަހުގައެވެ.