މަޑުއްވަރީ ކައުންސިލް ފުޓްސަލް ޗެލެންޖު 2023 ގެ ފުރަތަަމަ ޑިވިޝަނުގައި 7-2 ގެ ނަތީޖާއަކުން އެފްސީ ވަން ރައުންޑް ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ނޮދަންސް މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ. 

ރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ އެފްސީ ވަން ރައުންޑް އިންނެވެ. މިލަނޑު އެޓީމަށް ކާމިޔާބުކޮށްދިނީ ފުރަތަަމަ ހާފުގެ 7 ވަނަ މިނެޓުގައި އަބްދުﷲ ރިމާހް އެވެ. ނަމަވެސް އޭގެ މިނެޓެއް ފަހުން ނޮދަންސް އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިލަނޑު އެޓީމަށް ކާމިޔާބުކޮށްދިނީ މާއިސް މުހައްމަދު އެވެ.

މިމެޗުގައި ފުރަތަަމަ ފަހަރަށް ނޮދަންސް އަށް ލީޑު ނަގައިދިނީ ސަރާއު ހަމީދެވެ. ގާތްގާތުގައި ސަރާއު ކާމިޔާބުކޮށްދިން ދެ ލަނޑާއެކު 3-1 ގެ ނަތީޖާއަކުން ނޮދަންސް ކުރީގައި އޮއްވައި އެފްސީ ވަން ރައުންޑް އަށް ފަރަގު ކުޑަކޮށްދިނީ އަބްދުﷲ ރިމާހް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-2 ގެ ނަތީޖާއަކުން ނޮދާންސް ކުރީގައި އޮވެގެންނެވެ.

މެޗުގެ ދެވަނަ ހާފުގައި ނޮދަންސް ފެނުނީ މާބޮޑަށްވެސް ވަރުގަދަކޮށެވެ. މިހާފުގައި އެޓީމުން އިތުރު ހަތަރު ލަނޑު ކާމިޔާބުކުރި އިރު، އެޓީމުގެ ހަސަން މާއިލް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. މިހާފުގައި އެޓީމުން ކާމިޔާބުކުރި އަނެއް ލަނޑު ކާމިޔާބުކޮށްދިނީ އިސްމާއިލް ރަފްހާން އެވެ.

މި މެޗުގެ މޭން އޮފް ދަ މެޗަކަށް ހޮވުނީ ނޮދަންސް ގެ ހަސަން މާއިލް އެވެ. އަދި މިރޭގެ މެޗުން ލިބުނު ތިން ޕޮއިންޓާއެކު ނޮދާންސް އަށް ތިން މެޗުން 6 ޕޮއިންޓް ލިބިފައިވާއިރު، އެޓީމަށް ގްރޫޕްގެ އެއްވަނަ ލިބެނީ ފައިދާ ފަސް ގޯލާއި އެކުގައެވެ. މި ގުރޫޕްގެ ދެވަނަ ލިބުނީ ޕެންތާސް އަށެވެ. އެޓީމަށް 6 ޕޮއިންޓާއެކު ފައިދާ ހަތަރު ގޯލު ލިބުނުއިރު، ގްރޫޕްގެ ތިންވަނަ ލިބުނު ބީބީ ނިއު ޖެނެރޭޝަން އަށް 6 ޕޮއިންޓާއެކު ލިބިފައިވަނީ ފައިދާ ތިން ގޯލެވެ. އަދި މި ގުރޫޕްގެ ފުލަށް ދިޔައީ ކުޅުނު ތިން މެޗުން ވެސް ބަލިވި އެފްސީ ވަން ރައުންޑް އެވެ.

ސެމީފައިނަލްގެ ފުރަތަަމަ މެޗުގައި މާދަމާ ނޮދަންސް ނުކުންނާނީ ގުރޫޕް ބީގެ ދެވަނަ ސްޕާޓަންސް އާއި ދެކޮޅަށެވެ. އަދި މާދަމާ ރޭ ކުޅޭ ސެމީގެ ދެވަަނަ މެޗުގައި ޕެންތާސް ސްޕޯޓްސް ކްލަބް ނުކުންނާނީ ގްރޫޕް ބީގެ އެއްވަނަ ވާލު ސްޕޯޓްސް ކްލަބާއި ދެކޮޅަށެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބާއްވާ ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ވޮއިސް އެވެ. މިމުބާރާތުގެ ހުރިހާ މެޗެއް މަޑުއްވަރީ ކައުންސިލްގެ ފޭސްބުކް ޕޭޖުން ލައިވު ކުރުމަށް ހަމަޖެހިފައިވާއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް 28 ވަނަ ދުވަހުގެ ރޭ އެވެ.