މަޑުއްވަރީ ކައުންސިލް ފުޓްސަލް ޗެލެންޖު 2023 ގެ ފުރަތަަމަ ޑިވިޝަނުގެ ގުރޫޕް ބީގައި ރޭ ކުޅެވުނު މެޗު 6-1 ގެ ނަތީޖާއަކުން ބަދަވިއަން ސްޕޯޓްސް ކްލަބް ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ވާލު ސްޕޯޓްސް ކްލަބް މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ. 

ރޭގެ މެޗުގެ ފުރަތަަމަ ހާފުގައި ވާލު ސްޕޯޓްސް ކްލަބުން ތިން ލަނޑު ކާމިޔާބުކުރިއިރު އެޓީމުގެ ފުރަތަަމަ ދެ ލަނޑު ކާމިޔާބުކޮށްދިނީ ރޭގެ މެޗުގައި މޮޅުކުޅުމެއް ދެއްކި ނަޖާހު މުހައްމަދު އެވެ. އަދި އެޓީމުގެ ތިންވަނަ ލަނޑު ކާމިޔާބުކޮށްދިނީ ހުސެއިން އިރުފާހް އެވެ.

ދެވަަނަ ހާފު ކުޅުން ފަށައިގެން ތިންވަނަ މިނެޓުގައި ބަދަވިއަން ސްޕޯޓްސް ކްލަބުގެ ހުސެއިން ރަމީލް ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދިނެވެ. ނަމަވެސް އޭގެ ކުޑައިރުކޮޅެއް ފަހުން ވާލު ސްޕޯޓްސް ކްލަބުގެ އަލީ ރިފާއު ވަނީ ލަނޑެއް ކާމިޔާބުކޮށް އެޓީމަށް ލީގު ފުޅާކޮށްދީފައެވެ. މި މެޗުގައި ވާލުން ކާމިޔާބު ކުރި ފަސް ވަނަ ލަނޑު އަހުމަދު އިރުޝާދު ކާމިޔާބުކޮށްދިން އިރު އެޓީމުގެ ހަވަނަ ލަނޑު މެޗުގެ އެންމެ ފަހު މިނެޓްގައި ކާމިޔާބުކޮށްދިނީ ހަސަން ނަޒީމް އެވެ.

ރޭގެ މެޗުގެ މޭން އޮފް ދަ މެޗަކަށް ހޮވުނީ ވާލު ސްޕޯޓްސް ކްލަބުގެ ފުރަތަަމަ ދެ ލަނޑު ކާމިޔާބުކޮށްދިން ނަޖާހު މުހައްމަދު އެވެ. 

ރޭގެ މެޗުން ލިބުނު ތިން ޕޮއިންޓާއެކު ދެ މެޗުން ހަތަރު ޕޮއިންޓް ހަމަކޮށް ގުރޫޕް ބީގެ އެއްވަނަ ވާލު ސްޕޯޓްސް ކްލަބަށް ލިބުނީ ފައިދާ ފަސް ގޯލާއެކުގައެވެ. މި ގުރޫޕްގެ ދެވަނަ ލިބުނު ސްޕާޓަންސް އަށް ވެސް ދެމެޗުން ހަތަރު ޕޮއިންޓް ލިބިފައިވާއިރު އެޓީމަށް ލިބިފައިވަނީ ފައިދާ ދެ ގޯލެވެ.

ސެމީފައިނަލްގެ ފުރަތަަމަ މެޗުގައި މާދަމާރޭ ނޮދަންސް ނުކުންނާނީ ގުރޫޕް ބީގެ ދެވަނަ ސްޕާޓަންސް އާއި ދެކޮޅަށެވެ. އަދި މާދަމާ ރޭ ކުޅޭ ސެމީގެ ދެވަަނަ މެޗުގައި ޕެންތާސް ސްޕޯޓްސް ކްލަބް ނުކުންނާނީ ގްރޫޕް ބީގެ އެއްވަނަ ވާލު ސްޕޯޓްސް ކްލަބާއި ދެކޮޅަށެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބާއްވާ ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ވޮއިސް އެވެ. މިމުބާރާތުގެ ހުރިހާ މެޗެއް މަޑުއްވަރީ ކައުންސިލްގެ ފޭސްބުކް ޕޭޖުން ލައިވު ކުރުމަށް ހަމަޖެހިފައިވާއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް 28 ވަނަ ދުވަހުގެ ރޭ އެވެ.