މަޑުއްވަރީ ކައުންސިލް ފުޓްސަލް ޗެލެންޖު 2023 ގެ އަންހެން ޑިވިޝަނު ލީގު ބުރުގެ ފަހު މެޗުގައި ރޭ 14-2 ގެ ތަފާތުބޮޑު ނަތީޖާއަކުން ސްޕާޓަންސް ބަލިކޮށް ލީގު ބުރުގެ އެއްވަނަ ޓީމުގެ ގޮތުގައި ސެވަން އެޓޭކާސް މުބާރާތުގެ ފައިނަލްގެ ޖާގައެއް ކަށަވަރުކޮށްފިއެވެ.

ރޭގެ މެޗުގެ ފުރަތަަމަ ހާފުގައި ސެވަން އެޓޭކާސް އިން 8 ލަނޑު ކާމިޔާބުކުރި އިރު، ދެވަަނަ ހާފުގައި އެޓީމުން ވަނީ އިތުރު 5 ލަނޑު ކާމިޔާބުކޮށްފައެވެ. މި މެޗުގައި ސެވަން އެޓޭކާސްގެ ފާތިމަތު މިއުސާ 11 ލަނޑުޖެހިއިރު އެޓީމުގެ އަނެއް ތިން ލަނޑު ކާމިޔާބުކޮށްދިނީ މަރިޔަމް އަރުޝީ، ފާތިމަތު ނުސްރާ އަދި އައިޝަތު ނައުމާއެވެ.

މިމެޗުގައި ސްޕާޓަންސްގެ ލަނޑުތައް ކާމިޔާބުކޮށްދިނީ އައިޝަތު އަހުލާމް އާއި  އާމިނަތު ޝާއިރާ އެވެ. އަދި މި މެޗުގެ މޮޅުކުޅުންތެރިއަކަށް ހޮވުނީ ސެވަން އެޓޭކާސްގެ ފާތިމަތު މިއުސާ އެވެ.

ތިން ޓީމު ބައިވެރިވި މި މުބާރާތުގެ މެޗުތައް ލީގު އުސޫލުން ކުރިއަށް ގެންދިޔަ އިރު، ކޮންމެ ޓީމެއް ވެސް ވަނީ ދެ މެޗު ކުޅެފައެވެ. ކުޅުނު ދެ މެޗުން މޮޅުވެ ހަ ޕޮއިންޓާއެކު ސެވަން އެޓޭކާސް ލީގު ބުރުގެ އެއްވަނަ ހޯދި އިރު ދެވަނަ ލިބުނީ ތިން ޕޮއިންޓާއެކު ޓީމު ރާޅު އަށެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބާއްވާ ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ވޮއިސް އެވެ. މިމުބާރާތުގެ ހުރިހާ މެޗެއް މަޑުއްވަރީ ކައުންސިލްގެ ފޭސްބުކް ޕޭޖުން ލައިވު ކުރުމަށް ހަމަޖެހިފައިވާއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް 28 ވަނަ ދުވަހުގެ ރޭ އެވެ.