ރެފިޔުޖީން ގޮވައިގެން ދަތުރު ކުރަމުންދިޔަ ދެ ބޯއްޓެއް ބަންޑުން ޖަހާލައި އެތައް ބައެއްގެ މަރުވެފައިވާ ހަށިތައް ލީބިޔާގެ އެކި އަވަށްތަކުގެ އައްސޭރިފަށަށް ލައްގަމުން ދާ ކަމަށް އަލްޖަޒީ އިން ބުނެފިއެވެ. 

މި ބޯޓު ތަކުގައި ދަތުރު ކުރި ރެފިޔުޖީންގެ ތެރޭގައި ހިމެނެނީ ޕާކިސްޠާން، ސީރިޔާ، ޓިޔުނީޝިއާ އަދި މިޞްރުގެ ރައްޔިތުންނެވެ. 

މެޑިޓޭރިޔަންގެ ކަނޑުގެ ސަރަހައްދުން ދަތުރުކުރި މި ދެބޯޓު ބަންޑުން ޖަހާލައިގެން މިހާތަނަށް 57 ހަށިގަނޑެއް ލީބިޔާ އަށް ލައްވެފައިވާ ކަމަށް އަލްޖަޒީރާގައި ބުނެފައިވެއެވެ.

ބަންޑުން ޖަހާލި ބޯއްޓުން ސަލާމަތްވި މީހަކު ބުނެފައިވަނީ އޭނާ ދަރުރު ކުރި ބޯޓުން 80 މީހަކު ދަތުރު ފެށިކަމަށެވެ. 

ގަރަބުއްލީ އޭ ކިޔާ ސަރަހައްދަށް ކުޑަ ކުއްޖެއްގެ ހަށިގަނޑު ހިމެނޭހެން 11 ހަށިގަނޑެއް ލައްވެފައިވާކަމަށް ކޯސްޓް ގާޑް އޮފިސަރު ފާތިޙް އަލް ޒަޔާނީ ބުނެފައިވެއެވެ. އަދި ސަބްރަތާ އޭ ކިޔުނު ސަރަހައްދަށް 46 ހަށިގަނޑެއް ލައްގާފައިވާ ކަމަށް ރެޑް ކްރޮސެންޓުން ބުނެފައިވެއެވެ.

އަދި މިގޮތައް ލައްގަމުން އަންނަ ހަށިތައް ކަމާއި ބެހޭ ފަރާތްތަކާއި ހަވާލުކުރެވެމުން ދާކަމަށް ލީބިޔާ އިން ވަނީ ބުނެފައެވެ. އެހީދޭ ޖަމިއްޔާތަކުގެ މަސައްކަތް ތެރިން ބުނެފައިވަނީ ކުރިއަށް އޮތް ތަނުގައި މިގޮތައް ލައްގާ ހަށިތައް އިތުރުވަމުން ދާނެ ކަމަށް ޤަބޫލު ކުރެވޭ ކަމަށެވެ. 

އިންޓާނޭޝަނަލް އޮގަނައިޒޭޝަން ފޯ މައިގްރޭޝަން އިން ބުނެފައިވަނީ މިއަހަރު ފެށުނިއްސުރެ މިމަހުގެ މިހާތަނަށް 441 ރެފިޔުޖީ އަކު މިގޮތަށް ކަނޑުވެގެން މަރުވެފައި ވާކަމަށެވެ.