މިއަދު ރައްޔިތުންގެ މަޖިލީހަށް ސަރުކާރުގެ ފަރާތުން މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު ހުށައެޅުއްވި އިންޑިއަސްޓްރިއަލް ރިލޭޝަންސް އާއި ބެހޭ ބިލަކީ މަސައްކަތްތެރިންގެ ދުވަސް ނުވަތަ އާންމުކޮށް ކިޔާ "މޭ ޑޭ" ބޯމަތިވެފައިވާތީ އެ ދުވަހު ރައީސުލްޖުމްޙޫރިއްޔާ ދެއްވަން ގަސްދުކުރައްވާ ޚިތާބުގެ ބޭނުމަށް ހުށައަޅާފައިވާ ބިލެއްކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ މަޖިލީހަށް ހުށައެޅި އެ ބިލާއި ގުޅޭގޮތުން ވާހަކަދައްކަވަމުން ނެވެ.
އޭނާ ވިދާޅުވީ އެ ބިލު ކިޔާލުމުން "މޭ ޑޭ" އާއި ގުޅިގެން ރައީސުލްޖުމްހޫރިއްޔާ ދެއްވާނެ ޚިތާބުގައި މަސައްކަތްތެރިންގެ ހިމާޔަތްކުރުމަށްޓަކައި މަޖިލީހަށް ފޮނުވާފައިވާ ބިލުތަކާއި ގުޅޭގޮތުން ދައްކަވާނެ ރީތި ވާހަތަކެއް ސިފަކުރެވޭ ކަމަށެވެ.
ސަރުކާރުން ރީތި ބިލެއްގެ ގޮތުގއި "އިންޑަސްޓްރިއަލް ރިލޭޝަންސް" އާއި ބެހޭ ބިލު މަޖިލީހަށް ފޮނުވާފައިވާއިރު، މި ބިލުތަކުގެ މަޤްސަދު މިއަދު ހާސިލުވަނީ ކިހާ މިންވަރަކަށްތޯ ބަލާލުން މުހިންމުކަމަށް ވަހީދު ވިދާޅުވި އެވެ. އަދި ސަރުކާރުން އިންޑަސްޓްރީތައް ކުރިއެރުވުމަށް ކުރާ މަސައްކަތްތަކީ ކޮބައިތޯވެސް ބަލާލަން ޖެހޭކަމަށް އޭނާ ވިދާޅުވި އެވެ.
ތަފާސް ހިސާބުތަކުގެ އަލީގައި މިސާލު ނަންގަވަމުން ވަހީދު ވިދާޅުވީ މިއަދު ދިވެހިންގެ އެންމެ ބޮޑު ދެ އިންޑަސްޓްރީގައި ދިވެހިންނަށް ވުރެ ގިނައިން ވަޒީފާތަކުގައި ތިބީ ބިދޭސީން ކަމަށެވެ.
ގަވައިދާއި ޚިލާފަށް ރާއްޖެ ގެންނަ ބިދޭސީންގެ މައްސަލައަކީ ސަރުކާރުން ޚައްލުކޮށްދޭނެ މައްސަލައެއްކަމަށް ބުނެފައިވި ނަމަވެސް މިހާތަނަށް އެކަން ޚައްލުކޮށްދެވިފައި ނުވާކަމަށް ވަހީދު ވިދާޅުވި އެވެ.
"އަޅުގަނޑު ހިތަށް އަރާ އިޚްލާސްތެރިކަމާ އެކީގައި އިންޑަސްޓްރީތަކާ ބެހޭ އަދި މަސައްކަތްތެރިންނާއި ބެހޭ ކަންކަން ބަދަލުކުރުމުގެ ބަދަލުކުރުމުގެ ހެޔޮ ނިޔަތް އޮވެގެން ސިޔާސީ އެ ވިލް އޮވެގެން ހުށައަޅާފައިވާ ބިލެއް ބާއޭ؟ އެހެންކަމަށް ވާނަމަ ރާއްޖޭގައި ޒަމާނުއްސުރެ ހުރި އިންޑަސްޓްރީތައް ކުރިއެރުވުމަށްޓަކައި ކުރި ކަންތައްތަކެއް މިހާތަނަށް އައިރުގައި ފެންނަން އޮންނަން ވާނެ. އޭގެ ބަދަލުގައި މި ފެންނަނީ ރާއްޖޭގެ މަސްވެރިކަމުގެ ސިނާއަތު އިންތިހާއަށް އުވިގެން ދަނީ. ރާއްޖޭގެ ރިސޯޓުތަކުގައި މަސައްކަތް ކުރާ ބިދޭސީންގެ އަދަދު އެ ހުރީ 70% އިން މަތީގައި މިހާރު. މަސްވެރިކަމުގައި މަސައްކަތް ކުރާ ދިވެހިންގެ އަދަދު އެ ދަނީ އިންތިހާއަށް ދަށްވަމުން"
މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު
އޭގެ އިތުރުން އޭނާ ވިދާޅުވީ ވައްކަމާއި ކޮރަޕްޝަނަށް ޒީރޯ ޓޮލެރެންސް ޕޮލިސީއެއް ތަންފީޒު ކުރަން އައި މި ސަރުކާރުގެ ހަތަރު އަހަރަށް ބަލާލާއިރު ކޮރަޕްޝަން އިންޑެކްސް އަހަރަށްވުރެ އަހަރެއް ދަށްވެފައިވާކަން ފެންނަން އޮތް ކަމަށެވެ.
ވަހީދު ވިދާޅުވީ މި ސަރުކާރު އުފެދުނީ ވަރަށް ގިނަ ވައުދުތަކެއް ވެގެން ކަމަށެވެ. އޭގެ ތެރޭގައި ކޮރަޕްޝަން ހުއްޓުވުމާއި ނޫސްވެރިކަމުގެ މިނިވަންކަން ހިމެނޭކަމަށް އޭނާ ވިދާޅުވި އެވެ.
އެހެން ނަމަވެސް ސަރުކާރުން އަމަލުކުރަމުންދާ ގޮތުން ކޮރަޕްޝަން އިންޑެކްސްއާއި، ނޫސްވެރިކަމުގެ މިނިވަންކަން ބަލާ އިންޑެކްސްގައި ވެސް ރާއްޖެ އަހަރަކަށްވުރެ އަހަރެއް ފަހަތަށް ދާއިރު، މި ކުރެވެނީ ހެޔޮ ވެރިކަމެއް ނޫންކަން އެނގޭކަމަށް އޭނާ ވިދާޅުވި އެވެ.
އެގޮތުން މަސައްކަތްތެރިންގެ ހައްގުތައް ހިމާޔަތް ކުރުމަށް ކުރަން ޖެހޭ އެތައް ކަމެއް ހުރިއިރު މޭ ޑޭ އާއި ދިމާކޮށް މަޖިލީހަށް މި ބިލު ހުށައެޅީ މޭ ޑޭގައި ރައީސް ޞާލިހު ދެއްވާ ޚިތާބުގައި ހިމަނުއްވާނެ ވާހަކަތަކެއް ހޯއްދަވާދެއްވުމަށް ކަމަށް ވަހީދު ވަނީ ތަކުރާރުކޮށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
