މާލެ ސަރަހައްދުން ދޫކުރާ ގޯތި ލިބޭ މީހުންނަށް ލިޔުން ލިބޭނީ ގޯތި ވެސް ދައްކާފައި ކަމަށް ޕްލޭނިން މިނިސްޓަރު މުހައްމަދު އަސްލަމް ރައްޔިތުންގެ މަޖިލިހުގައި މިއަދު ވިދާޅުވެއްޖެއެވެ.
އަސްލަމް މިފަދައިން ވިދާޅުވީ މަޖިލީހުގެ މިއަދުގެ ޖަލްސާގައި މެދު ހެންވޭރު ދާއިރާގެ މެންބަރު ޢަލީ ޢާޒިމް ކުރެއްވި ސުވާލަކަށް ޖަވާބު ދެއްވަމުންނެވެ.
އެގޮތުން އާޒިމް ވަނީ މާލޭގެ ރައްޔިތުންނަށް ބޯހިޔާވަހިކަމެއް ދޭނެ ކަން ސަރުކާރުން އެކި ފަހަރު މަތިން ބުނެފައިވާ ކަން ފާހަގަކުރައްވައި، މިއަދާ ހަމައަށް އައިއިރު ވެސް އަލިމަގެއް ފެނިފައި ނުވާ ކަމަށް ވިދާޅުވެފައެވެ. އަދި ކުރީގެ ރައީސް އަބްދުالله ޔާމީން އަބްދުލްގައްޔޫމް ގެ ވެރިކަމުގައި ހެދި ގޮތަށް މި ސަރުކާރުގެ ވިސްނުން ވެސް ހުރީ ހަމައެކަނި ލިޔުމެއް ބަހާފައި ގޯތި ދޭންތޯ އާޒިމް ވަނީ ސުވާލު ކުރައްވައިފައެވެ. އަދި މާލޭގެ ރައްޔިތުންނަށް ބޯހިޔާވަހިކަމެއް ނުވަތަ ގޯއްޗެއް ލިބޭނީ ކޮންއިރަކުތޯ އާޒިމް ވަނީ އައްސަވައިފައެވެ.
މިސުވާލުގެ ޖަވާބުގައި މިނިސްޓަރ އަސްލަމް ވިދާޅުވީ މިސަރުކާރުން ވެފައިވާ ވަޢުދާއި އެއްގޮތަށް މިދައުރުގެ ތެރޭގައި މާލޭގެ ރައްޔިތުންނަށް ޚާއްސަ ކުރައްވާފައިވާ ފްލެޓާއި ގޯތި ދެވޭނެކަމުގެ ފުރިހަމަ ޔަގީންކަން އޮތްކަމަށެވެ.
އަދި މި ސަރުކާރުން އިމާރާތްކުރާ 4،000 ސޯޝަލް ހައުސިން ޔުނިޓް ތަކުގެ ބައެއް ފްލެޓުތައް ސީދާ ވަންނަ މިންވަރަށް މި ދައުރުގައި ނުނިންމުނު ނަމަވެސް ބައެއް ފްލެޓުތަކުގެ މަސައްކަތް އެއްކޮށް ނިންމާލެވޭނެ ކަމަށް ވެސް އަސްލަމް ވިދާޅުވިއެވެ.
"މާލޭގެ ރައްޔިތުންގެ ބޯހިޔާވަހިކަމަށް ގޯއްޗާއި ފްލެޓް ހަމަ ދޭނަން. ހަމައެކަނި ލިޔުމެއްނޫން ދޭނީ. ގޯތި ދައްކާފަ އެކަން ކުރަނީ. ފްލެޓްތަކުގެ ތެރޭގައި ބައެއް ފްލެޓްތައް ސީދާ ވަންނަ މިންވަރަށް ނުނިމި ހުރެދާނެ. އެހެން ނަމަވެސް އޭގެ ބޮޑުބައި ނިމިފަ، އަދި އެއްބައި ފްލެޓްތައް ނިމޭނެ އެކީގަ. އަޅުގަނޑު ނެތިން ދަންނަވާކަށް އަޅުގަނޑު އުންމީދުކުރި ހުރިހާއެއްޗެއް 100 ޕަސެންޓް ނިމޭނެކަމަށް. ދެން އޮންގޮއިން މަސައްކަތްތައްވެސް އޭގައި ހުންނާނެ ދައުރު ނިމިގެންދާއިރު."
މިނިސްޓަރު މުހައްމަދު އަސްލަމް
އަސްލަމް ވިދާޅުވި ގޮތުގައި ރައްޔިތުން ތިބީ ގޯއްޗާއި ފްލެޓު ލިބޭނެ ކަމުގެ އުންމީދުގައެވެ. އަދި އެކަން ވަރަށް އަވަހަށް ހަގީގަތަކަށް ވާނެ ކަމަށް ވެސް އޭނާ ވިދާޅުވިއެވެ.
މާލެ ސަރަހައްދުން ދޫކުރުގެ މަސައްކަތުގެ ތެރެއިން މިހާރު ކުރިއަށްދަނީ ގޯއްޗަށް އެދި ކުރިމަތިލާފައިވާ މީހުންގެ ފޯމްތައް އިވެލުއޭޓް ކުރުމުގެ މަސައްކަތް ކަމަށާ އެ މަސައްކަތް އަންނަ ޖޫން މަހުގެ ކުރީކޮޅު ނިންމާލެވޭނެ ކަމަށް މީގެ ކުރިން އޮތް މަޖިލީހުގެ ޖަލްސާ އެއްގައި އަސްލަމް ވަނީ ވިދާޅުވެފައެވެ.
ގޯއްޗާއި ފްލެޓަށް އެދި ފޯމް ހުށައެޅުމަށް ހުޅުވާލި ފުރުޞަތުގައި 35861 ފޯމް ލިބިފައިވާކަމަށް ޕްލޭނިން މިނިސްޓްރީން ބުނެފައިވެއެވެ. މީގެތެރޭގައި ބިންވެރިޔާ ސްކީމަށް 15164 ފޯމު ހުށައަޅާފައިވެއެވެ. އަދި ގެދޮރުވެރިޔާ ސްކީމްގެ ދަށުން 3 ކޮޓަރީގެ އެޕާޓްމަންޓަށް 14489 ފޯމް ހުށައަޅާފައިވެއެވެ. އަދި މިސްކީމްގެ ދަށުން 2 ކޮޓަރީގެ އެޕާޓްމަންޓަށް އެދި 6208 ފޯމް ވަނީ ހުށައަޅާފައެވެ.
ސަރުކާރުން ކުރިއަށްގެންދަވާ ބޯހިޔާވަހިކަމުގެ މަޝްރޫޢުގެ ދަށުން "ބިންވެރިޔާ ސްކީމް" އާއި "ގެދޮރުވެރިޔާ" ސްކީމުގެ ދަށުން ގޯއްޗާއި ފްލެޓް ދޫކުރެއްވުމަށް ހަމަޖައްސަވާފައިވަނީ ހުޅުމާލެއާއި ގުޅީފަޅުންނެވެ. މިޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި، 4000 ފްލެޓް ދޫކުރެއްވުމަށް ހަމަޖެހިފައިވަނީ ހުޅުމާލެއިންނެވެ. އަދި ބާކީ 2000 ގޯތި ދޫކުރުމަށް ނިންމަވާފައިވަނީ ގުޅީފަޅުންނެވެ.
Advertisement
This content is created and paid for by advertisers and does not involve Voice Journalists
