ސްޕެނިޝް ލަލީގާގައި މިރޭ ރަށުން ބޭރުގައި ރަޔޯ ވަޔެކާނޯ އަތުން 2-1 ގެ ނަތީޖާއަކުން ބަލިވެ، ލީގު ތާވަލުގެ ކުރީގައި 14 ޕޮއިންޓްގެ ލީޑެއް ނެގުމަށް ލިބުނު ފުރުސަތު ބާސެލޯނާ އިން ނަގާލައިފި އެވެ.

މިރޭގެ މެޗުގެ ފުރަތަަމަ ހާފުގެ 19 ވަނަ މިނެޓުގައި ރަޔޯ ވަޔެކާނޯއަށް ލީޑު ނަގައިދިނީ އެޓީމުގެ ސްޕެނިޝް މިޑްފީލްޑަރު އަލްވާރޯ ގާސިއާ އެވެ. މިއީ އެޓީމުގެ  ސާޖިއޯ ކެމެލޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގެ 23 ވަނަ މިނެޓުގައި މެޗުގެ ނަތީޖާ އެއްވަރު ކުރުމަށް ބާސެލޯނާއަށް ވަނީ ވަރަށް ހުސް ފުރުސަތެއް ލިބިފައެވެ. ނަމަވެސް މުޅިން ހުސްކޮށް ހުރެ ލެވަންޑޮވްސްކީ ފޮނުވާލި ހަމަލާ ރަޔޯގެ ކީއްޕަރު ވަނީ ދިފާއުކޮށްފަ އެވެ.

ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔަ ފުރަތަަމަ ހާފުގެ 42 ވަނަ މިނެޓުގައި ބާސެލޯނާ އިން ލަނޑެއް ކާމިޔާބުކުރިއެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ ލެވަންޑޮވްސްކީ ކާމިޔާބުކުރި އެ ލަނޑަކީ އޮފްސައިޑް ލަނޑެއް ކަމަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރަޔޯ ވަޔެކާނޯ ކުރީގައި އޮވެގެންނެވެ.

ދެވަަނަ ހާފު ފެށިގެން 8 ވަނަ މިނެޓުގައި ރަޔޯގެ ޒުވާން މިޑްފިލްޑަރު ފްރާން ގާސިއާ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. އަދި މިހާފުގައި އެޓީމުގެ ލީޑު ފުޅާކުރުމަށް ސާޖިއޯ ކެމެލޯއަށް ވަނަ ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ.

މި މެޗުގައި ބާސެލޯނާ އިން ކާމިޔާބުކުރި ހަމައެކަނި ލަނޑު ދެވަނަ ހާފުގައި 83 ވަނަ މިނެޓުގައި ކާމިޔާބުކޮށްދިނީ ލެވަންޑޮވްސްކީ އެވެ. މިއީ މި ސީޒަނުގައި އޭނާ ލީގުގައި ކާމިޔާބުކުރި 18 ވަނަ ލަނޑެވެ. މިވަގުތު ލަލީގާ ލަނޑު ލިސްޓުގެ ކުރީގައިވެސް އޮތީ ލެވަންޑޮވްސްކީ އެވެ. ދެވަނައިގައި އޮތީ ރެއާލް މެޑްރިޑްގެ ކެޕްޓަން ކަރީމް ބެންޒީމާ އެވެ. ބެންޒީމާ ވަނީ މިސީޒަނުގައި ލީގުގައި 14 ލަނޑު ކާމިޔާބުކޮށްފައެވެ.

މިރޭގެ މެޗުން ބާސެލޯނާ ބަލިވި ނަމަވެސް އަދި ވެސް އެޓީމު އޮތީ ދެވަނައިގައި އޮތް ރެއާލް މެޑްރިޑަށް ވުރެ 11 ޕޮއިންޓް ކުރީގައެވެ. ލީގުގައި ކޮންމެ ޓީމެއް 31 މެޗު ކުޅެފައިވާއިރު ބާކީ އޮތް 7 މެޗުގެ ތެރެއިިން 4 މެޗު ކާމިޔާބުކޮށްގެން މިސީޒަނުގެ ލީގު ޗެމްޕިއަންކަން ކަށަވަރުކުރުމުގެ ފުރުސަތު ބާސެލޯނާއަށް އެބައޮތެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 31 މެޗު ކުޅެގެން ލިބުނު 43 ޕޮއިންޓާއެކު ރަޔޯ ވަޔެކާނޯ މިވަގުތު އޮތް ލީގު ތާވަލުގެ 9 ވަނައިގައެވެ.