އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ޗެލްސީ އާއި ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް ބްރެންޓްފޯޑް އިން ލީގު ތާވަލުގެ 9 ވަނައަށް ކުރިއަށް ޖެހިލައިފިއެވެ.

ޗެލްސީގެ ކޯޗަކަމާއި ލަމްޕާޑް ހަވާލުވި ފަހުން އެޓީމު ކުޅުނު ފަސް ވަނަ މެޗުން ބަލިވިއިރު، މި ފަސް މެޗުގައި އެޓީމަށް ކާމިޔާބު ކުރެވިފައި ވަނީ އެންމެ ލަނޑެކެވެ. އަދި 2023 ވަނަ އަހަރު މިހާތަނަށް ޗެލްސީ އިން 22 މެޗު ކުޅެފައިވާއިރު، އެޓީ މޮޅުވެފައި ވަނީ 4 މެޗުންނެވެ. 6 މެޗު އެއްވަރުވެގެން ނިމުނު އިރު، 12 މެޗުން އެޓީމު ވަނީ ބަލިވެފަ އެވެ.

މިރޭގެ މެޗުގެ ގިނަ ވަގުތު ބޯޅަ ހިފަހައްޓައިގެން މޮޅަށް ކުޅުނީ ޗެލްސީ އިންނެވެ. ނަމަވެސް އެހެން މެޗުތަކެކޭ އެއްގޮތަށް މި މެޗުގައި ވެސް އެޓީމަށް ލިބުނު ފުރުސަތުތަކުގައި ބޭނުންހިފޭ ގޮތެއްނުވިއެވެ. ނަތީޖާއެއްގެ ގޮތުން ފުރަތަމަ ހާފުގެ 37 ވަނަ މިނެޓުގައި ބްރެންޓްފޯޑް އިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މިއީ ޗެލްސީގެ ސްޕެނިޝް ޑިފެންޑަރު ސީޒާ އަޒްޕިލިކުއެޓާ އަތުން ބައިކޮޅަށް ވަން ލަނޑެކެވެ.

ދެވަަނަ ހާފުގައި ވެސް ޗެލްސީ އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް މިހާފުގައި ބްރެންޓްފޯޑްގެ ގޯލާއި އަމާޒުކޮށް ނުރައްކާތެރި ހަމަލާއެއް އެޓީމަށް ފޮނުވާލެވިފައެއް ނުވެއެވެ.

މި މެޗުގައި ބްރެންޓްފޯޑް އިން ކާމިޔާބުކުރި ދެވަނަ ލަނޑު ފަހު ހާފުގެ 78 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ކެމަރޫންގެ ފޯވަޑް ބްރަޔަން އެމްބިއުމްއޯ އެވެ.

މިރޭގެ މެޗުގެ ލިބުނު ތިން ޕޮއިންޓާއެކު 33 މެޗު ކުޅެގެން ބްރެންޓްފޯޑް އަށް 43 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ 9 ވަނައިގައެވެ. އަދި މިރޭގެ މެޗުން ބަލިވި ޗެލްސީ 32 މެޗު ކުޅެފައިވާއިރު އެޓީމަށް ލިބިފައިވަނީ 39 ޕޮއިންޓާއެކު ތާވަލްގެ 11 ވަނަ އެވެ. އެޓީމަށް ލީގުގައި ބާކީ ހަ މެޗު އޮތްއިރު، ތާވަލުގެ 10 ވަނައިގައި އޮތް ފުލަމް އާއި ދެމެދު 6 ޕޮއިންޓްގެ ފަރަގެއް އެބައޮތެވެ.