އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ވެސްޓްހަމް ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރައި 2-1 ގެ ނަތީޖާއަކުން މޮޅުވެ ލިވަޕޫލް އިން ގަދަ ހަތަރެއްގެ އުންމީދު ދަމަހައްޓައިފި އެވެ.

މިރޭގެ މެޗުގައި ފުރަތަަމަ ލަނޑުޖަހައި ކުރިހޯދީ ވެސްޓްހަމް އިންނެވެ. މި ލަނޑު ފުރަތަަމަ ހާފުގެ 12 ވަނަ މިނެޓުގައި އެޓީމަށް ކާމިޔާބު ކޮށްދިނީ ބްރެޒިލްގެ މިޑްފީލްޑަރު ލޫކަސް ޕަކުއެޓާއެވެ. މިއީ އެޓީމުގެ ޖެމެއިކާގެ ފޯވާޑް މިޗެއިލް އެންޓޯނިއޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އޭގެ ހަތަރު މިނެޓު ފަހުން ލިވަޕޫލަށް މެޗުގެ ނަތީޖާ އެއްވަރުކޮށްދިނީ ނެދަލޭންޑްސްގެ ފޯވާޑް ކޯޑީ ގައްޕޯއެވެ. މިއީ އެޓީމުގެ އިގިރޭސި ޑިފެންޑަރު އެލެގްޒެންޑަރ އާނޯލްޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި ފުރަތަަމަ ހާފުގައި މެޗުގެ ލީޑު ނެގުމަށް ލިވަޕޫލުގެ ޕޯޗުގަލް ފޯވާޑް ޑިއެގޯ ޖޯޓާއަށް ވަނީ ވަރަށް ހުސް ދެ ފުރުސަތު ލިބި ބޭނުންކުރެވޭ ގޮތްނުވެފައެވެ.

ދެވަަނަ ހާފުގެ ކުޅުން ފަށައިގެން 10 ވަނަ މިނެޓުގައި ވެސްޓްހަމް އިން ލަނޑެއް ކާމިޔާބުކޮށް ދެވަަނަ ފަހަރަށް މެޗުގެ ލީޑު ހޯދިއެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މި މެޗުން ލިވަޕޫލް މޮޅުވި ލަނޑު ދެވަނަ ހާފުގެ 67 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެމަރޫން ޑިފެންޑަރު ޖޮއެލް މަޓިޕްއެވެ. މިއީ އެޓީމުގެ ސްކޮޓްލޭންޑް ޑިފެންޑަރު އެންޑްރޫ ރޮބަޓްސަން ގޯލު ކުރިމައްޗަށް ހުރަސްކޮށްދިން ކޯނަރު ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން ލިބުނު ތިން ޕޮއިންޓާއެކު އެކު 32 މެޗު ކުޅެގެން ލިވަޕޫލަށް 53 ޕޮއިންޓް ލިބިފައިވާއިރު، ލީގު ތާވަލުގައި އެޓީމު މިވަގުތު އޮތީ 6 ވަނައިގައެވެ. އަދި ހަތަރު ވަނައިގައި އޮތް މެންޗެސްޓާ ޔުނައިޓެޑާއި އެޓީމާއި ދެމެދު އޮތީ ފަސް ޕޮއިންޓުގެ ފަރަގެކެވެ.

މިރޭގެ މެޗުން ބަލިވި ވެސްޓްހަމް 32 މެޗު ކުޅެފައިވާއިރު އެޓީމަށް ލިބިފައިވަނީ 34 ޕޮއިންޓާއެކު ތާވަލްގެ 14 ވަނަ އެވެ.