ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވުމަށް ވީ ވަޢުދުތައް، ރިޔާސީ ދައުރު ނިމިގެންދާއިރު ވެސް ނުފުއްދެވޭތީ ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސަޢީދު ފާޑުވިދާޅުވެއްޖެއެވެ.
ސައީދު މިފަދައިން ވިދާޅުވެފައި ވަނީ ލ. ހިތަދޫ އާއި ކުނަހަންދޫ ގުޅުވައިލުމަށް ހަމަޖެހިފައިވާ ކޯޒްވޭގެ މަސައްކަތް އަވަސްކޮށްދިނުމަށް ގޮވާލައި އޭނާ މަޖިލީހަށް ހުށަހެޅި ޤަރާރަށް ބަހުސް ކުރައްވަމުންނެވެ.
އެގޮތުން ސައީދު ވިދާޅުވީ، އެ ކޯޒްވޭގެ މަސައްކަތަކީ ރައީސް ޞާލިހުގެ ރިޔާސީ ވައުދުފުޅެއް ކަމަށާ، އެ މަޝްރޫއު ކޮންމެ އަހަރަކުވެސް ބަޖެޓް ކުރެވޭ ކަމަށެވެ. އަދި އެ މަސައްކަތް އެމްޓީސީސީއާއި ހަވާލުކޮށްގެން ކުރިއަށްދާ ކަމަށްވެސް ޕްލޭނިންގ މިނިސްޓްރީން މީގެ ކުރިން ވިދާޅުވެފައިވާ ކަން ސައީދު ފާހަގަކުރެއްވިއެވެ.
މިއާއެކު ސަޢީދު ވިދާޅުވީ، ޕްލޭނިންގ މިނިސްޓްރީން ކޯޒްވޭގެ މަސައްކަތް ކުރިއަށްދާ ކަމަށް ވިދާޅުވި ނަމަވެސް، ހިތަދޫ އާއި ކުނަހަންދޫ އާއި ވަރަށް ކައިރީގައި އޮންނަ ރަށެއް ކަމުގައިވާ މެންދޫ އަކީ މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ބަޔަކަށް ދޫކޮށްފައިވާ ރަށެއް ކަމުގައިވާތީ ކޯޒްވޭގެ މަސައްކަތް ކުރިއަށް ނުގެންދެވޭނެ ކަމަށް އެ މިނިސްޓްރީން ހިތަދޫ ކައުންސިލަށް އަންގާފައިވާ ކަމަށެވެ. އަދި ކޯޒްވޭގެ މަސައްކަތަކީ ސަރުކާރުގެ ވަޢުދު ތަކުގެ ތެރޭގައި ނުހިމެނޭ ކަމެއް ކަމުގައިވެސް އެގްރިކަލްޗަރ މިނިސްޓްރީން ބުނެފައިވާ ކަމަށް ސަޢީދު ވިދާޅުވިއެވެ.
ސަޢީދު ވިދާޅުވީ، އެގްރިކަލްޗަރ މިނިސްޓްރީއާއި އެކު އެކަމާއި ގުޅިގެން ވާހަކަ ދައްކައި އެ މައްސަލަ ހައްލުކޮށް ކޯޒްވޭގެ މަސައްކަތް ކުރިއަށް ގެންދެވޭނެ ގޮތް ވުމުން، އެ މަސައްކަތުގެ ހުރަހަކަށް ދެން ވެފައިވަނީ އެންވަޔަރަމެންޓް މިނިސްޓްރީ ކަމަށެވެ. އެގޮތުން، ހިތަދޫގައި ކުޅި އޮންނާތީ އެ ކޯޒްވޭގެ މަސައްކަތް ކުރިއަށް ނުގެންދެވޭނެ ކަމަށް ބުނެ އެންވަޔަރަމެންޓް މިނިސްޓްރީން ގެޒެޓްގައި އިއުލާން ކޮށްފައިވާ ކަމަށް އޭނާ ވިދާޅުވި އެވެ. އަދި އެފަދައިން އިއުލާން ކުރުމަށްފަހު އެ މަައްސަލަ ހިތަދޫ ކައުންސިލުން ޖެއްސުމުން އެއީ އިމްލާ ކުށެއް ކަމަް އެ މިނިސްޓްރީން ބުނެފައިވާ ކަމަށާ، އެފަދަ އެތަކެއް މައްސަލަތަކެއްގެ ތެރޭގައި މި ހަތަރު އަހަރުވެސް ގޮސްފައިވާއިރު އަދިވެސް އެ ކޯޒްވޭ އެޅޭގޮތް ނުވާ ކަމަށް ސަޢީދު ވިދާޅުވިއެވެ.
ރައީސުލްޖުމްހޫރިއްޔާ ވަޑައިގެންފައި، މިކަމަށް ވަޢުދު ވެފައި، އެއް އަހަރު ދިޔައީ، ދެ އަހަރު ދިޔައީ، ތިން އަހަރު ދިޔައީ، ހަތަރު އަހަރު ދިޔައީ، ފަސް އަހަރު ހަމަވަނީ، ހަމަ ކޮންމެސް އެއް ސިޓީއެއް, އެ މިނިސްޓްރީއަށް ބަދަލުކޮށްލާ، އެ މިނިސްޓްރީން އަނެއް މިނިސްޓްރީއަށް ބަދަލު ކޮށްލާ. މިހެން ގޮސް ރައްޔިތުން ދެކޮޅަށް ދުއްްވަނީ. ބަޖެޓް ކުރޭ އެބަ.
މި މަސައްކަތް އެކަމަކު ކުރިއަކަށް ނުކަނޑާ. އެހެންވީމާ އަޅުގަނޑު މި ގަރާރު މި ހުށަހެޅި ސަބަބީ، ރައީސުލްޖުމްހޫރިއްޔާ އަށް ދަންނަވާލަން، ހިކިފަސް ތަނަކަށް ފައިޖެހިވަޑައިގަންނަވާއިރަށް ވަޢުދުވާން ނަހައްދަވާށޭ. އެހެން ހަމަ، ނުފުއްދޭނެ ވައުދުތައް ވަމުން ވަމުންގޮސް، މުޅި ރާއްޖޭގައި މި ކަމެއް މި އޮތީ.
މެންބަރު މުހައްމަދު ސަޢީދު
ސަޢީދު ވިދާޅުވީ މި ސަރުކާރުން ކޮންމެ އަހަރަކު އެތައް މިލިއަނެއް ބަޖެޓް ކުރި ނަމަވެސް މަސައްކަތްތައް ކުރިއަށް ނުދާ ކަމަށެވެ. އެހެންކަމުން، އެފަދައިން ކަން ވިޔަ ނުދީ، މަސައްކަތްތައް ކުރިއަށް ގެންދިޔުމަށް ކުރެވެން ހުރި ކަންކަން އެމްޑީޕީގެ މެންބަރުންވެސް ކޮށްދެއްވުމަށް އޭނާ ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
