އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި މެންޗެސްޓާ ޔުނައިޓެޑް ދެ ލަނޑުގެ ލީޑެއްގައި ވަނިކޮށް ފަހަތުން އަރައި ޓޮޓެންހަމް އިން އެއްވަރުކޮށްފި އެވެ.

ޕްރެމިއާ ލީގުގެ ގަދަ ހަތަރަކަށް ވާދަކުރަމުން އަންނަ ޓޮޓެންހަމް ލީގުގައި އެންމެ ފަހުން ކުޅުނު މެޗުގައި، ނިއުކާސަލް ޔުނައިޓެޑް އަތުން ތަފާތުބޮޑު ނަތީޖާއަކުން ބަލިވެފައި އޮތުމުން މިރޭގެ މެޗަށް އެޓީމުން ނުކުތީ ބަދަލުތަކަކާއި އެކުގައެވެ.

މިރޭގެ މެޗުގައި ފުރަތަަމަ ލަނޑުޖަހައި ކުރިހޯދީ މެންޗެސްޓާ ޔުނައިޓެޑުން ނެވެ. ފުރަތަަމަ ހާފުގެ 7 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ އިގިރޭސި ފޯވާޑް ސަންޗޯ އެވެ. މިއީ ރަޝްފޯޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޔުނައިޓެޑުގެ ދެވަަނަ ލަނޑު ފުރަތަަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ ރަޝްފޯޑް އެވެ. މިއީ އެޓީމުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ.

ފުރަތަަމަ ހާފުގައި ޓޮޓެންހަމްގެ ފަރާތުން ވަރަށް އާދައިގެ ކުޅުމެއް ފެނިގެންދިޔަ ނަމަވެސް ދެވަނަ ހާފު އެޓީމުން ފެށީ ވަރަށް ވަރުގަދަކޮށެވެ. މިގޮތުން ދެވަަނަ ހާފުގެ 56 ވަނަ މިނެޓުގައި އެޓީމުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ސްޕެނިޝް ޑިފެންޑަރު ޕެޑްރޯ ޕޮރޯ އެވެ.

ޓޮޓެންހަމްގެ ލަނޑަށްފަހު ޖެހިގެން އައި މިނެޓުގައި ޔުނައިޓެޑުގެ މިޑްފީލްޑަރު ބުރޫނޯ ފެނާންޑޭޒަށް އެޓީމުގެ ލީޑު ފުޅާކޮށްލުމަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މިމެޗުގައި ޓޮޓެންހަމްއަށް ނަތީޖާ އެއްވަރުކޮށްދިން ލަނޑު ފަހުހާފުގެ 79 ވަނަ މިނެޓުގައި ކާމިޔާބުކޮށްދިނީ އެޓީމުގެ ސައުތު ކޮރެއާ ފޯވާޑް  ހިއުންގް-މިން ސޮން އެވެ. މިއީ އެޓީމުގެ ކެޕްޓަން ހެރީ ކޭން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު އެއް ޕޮއިންޓާއެކު 31 މެޗު ކުޅެގެން މެންޗެސްޓާ ޔުނައިޓެޑަށް ލިބިފައިވަނީ 60 ޕޮއިންޓާއެކު ތާވަލުގެ ހަތަރު ވަނަ އެވެ. އަދި މިރޭގެ މެޗުން ލިބުނު އެއް ޕޮއިންޓާއެކު 33 މެޗު ކުޅެގެން ޓޮޓެންހަމްއަށް ލިބިފައިވަނީ 54 ޕޮއިންޓާއެކު ތާވަލްގެ ފަސްވަނަ އެވެ.

މިވަގުތު ލީގު ތާވަލުގެ ތިންވަނައިގައި އޮތީ 32 މެޗުން 62 ޕޮއިންޓް ހޯދާފައިވާ ނިއުކާސަލް ޔުނައިޓެޑެވެ. ނަމަވެސް މިރޭގެ މެޗުން މޮޅުވި ނަމަ ލީގު ތާވަލުގެ ތިންވަނައަށް ކުރިއަށް ޖެހިލުމުގެ ފުރުސަތު މެންޗެސްޓާ ޔުނައިޓެޑް އޮތެވެ.