މަޑުއްވަރީ ކައުންސިލް ފުޓްސަލް ޗެލެންޖު 2023 ގެ ފިރިހެން ޑިވިޝަނުގެ ފައިނަލުގައި ޕެނަލްޓީޖަހައިގެން 5-7 ގެ ނަތީޖާއަކުން ޕެންތާސް ސްޕޯޓްސް ކްލަބް ބަލިކޮށް މުބާރާތުގެ ޗެމްޕިއަންކަން ސްޕާޓަންސް އިން ހޯދައިފި އެވެ.

މިރޭގެ ފައިނަލް މެޗުގައި ފުރަތަަމަ ލަނޑުޖަހައި ކުރިހޯދީ ސްޕާޓަންސް އިންނެވެ. މި ލަނޑު ފުރަތަަމަ ހާފުގެ 7 ވަނަ މިނެޓުގައި އެޓީމަށް ކާމިޔާބުކޮށްދިނީ އަބްދުﷲ މިދުހަތު ފަހުމީ އެވެ. އަދި އޭގެ ފަސް މިނެޓު ފަހުން ޕެންތާސް އަށް މެޗުގެ ނަތީޖާ އެއްވަރުކޮށްދިނީ އެޓީމުގެ ކެޕްޓަން މުހައްމަދު ޖުމާން އެވެ. މިއީ ސްޕާޓަންސްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން އޭނާ ކާމިޔާބުކޮށްދިން ލަނޑެކެވެ.

ކިންގް އޮފް ދަ ޓޯނަމަންޓް މުހައްމަދު ޖުމާން (ޕެންތާސް އެފްސީ)

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފުރަތަމަ ހާފުގައި ދެޓީމަށްވެސް ލަނޑުޖަހާނެ ރަގަޅު ފުރުސަތުތަކެއް ލިބުނު ނަމަވެސް ފުރަތަަމަ ހާފު ކުޅުން ނިމިގެންދިޔައީ ދެޓީމުންކުރެ ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަަނަ ހާފު ފެށިގެން 8 ވަނަ މިނެޓުގައި ދެވަނަ ފަހަރަށް ސްޕާޓަންސް އިން މެޗުގެ ލީޑު ހޯދިއެވެ. މި ލަނޑު ވެސް އެޓީމަށް ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން މިދުހަތެވެ. މިއީ ޕެންތާސްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މުބާރާތުގެ އެންމެ މޮޅު ފަސް ކުޅުންތެރިން 

2-1 ގެ ނަތީޖާއަކުން ސްޕާޓަންސް މޮޅުވާން ދަނިކޮށް މެޗުގެ އިތުރު ވަގުތުގެ ތެރޭގައި ޕެންތާސްއަށް ދެވަަނަ ފަހަރަށް މެޗުގެ ނަތީޖާ އެއްވަރުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ޖުމާން އެވެ. މިއާއެކު 2-2 ގެ ނަތީޖާއަކުން ދެޓީމު އެއްވަރުވެ، ނަތީޖާ ނެރުމަށްޓަކައި ޖެހި ޕެނަލްޓީގައި ސްޕާޓަންސްގެ ފަސް ޕެނަލްޓީ އެޓީމުން ކާމިޔާބުކުރިއިރު، ޕެންތާސްގެ އިބްރާހީމް ޒިހުނީ ފޮނުވާލި ޕެނަލްޓީ ސްޕާޓަންސްގެ ގޯލްކީޕަރު އިބްރާހިމް ސުވާދު ވަނީ ދިފާއުކޮށްފަ އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޕެންތާސް އެފްސީ މުހައްމަދު ޖުމާން އެވެ. މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ލިބުނީ ސްޕާޓަންސްގެ އަބްދުﷲ މިދުހަތު ފަހުމީ އަށެވެ. އަދި މުބާރާތުގެ އެންމެ އުންމީދީ ކުޅުންތެރިއަކަށް ހޮވުނީ ވާލު އެފްސީގެ އަހުމަދު މަހާސިން އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އަހުމަދު ރީޝާން (ޕެންތާސް އެފްސީ), މުހައްމަދު ޖުމާން (ޕެންތާސް އެފްސީ), މުހައްމަދު އައްޒާމް (ޕެންތާސް އެފްސީ)، އިބްރާހީމް އަސްވާދު (ސްޕާޓަންސް), އަބްދުﷲ މިދުހަތު ފަހުމީ (ސްޕާޓަންސް) އެވެ.

މުބާރާތުގެ ފެއާޕްލޭ ޓީމަކަށް ހޮވުނީ ބީބީ ނިއު ޖެނެރޭޝަން އެވެ. އަދި މުބާރާތުގެ އެންމެ ޝަރަފްވެރި މަޤާމް، ކިންގް އޮފް ދަ ޓޯނަމަންޓަށް ހޮވުނީ ޕެންތާސް އެފްސީ ގެ މުހައްމަދު ޖުމާން އެވެ. 

މި މުބާރާތުގެ ރަނަރަޕް ޓީމަށް 10,000 ރުފިޔާ އަދި ޗެމްޕިއަން ޓީމަށް 20,000 ރުފިޔާގެ ފައިސާގެ އިނާމެއް މަޑުއްވަރީ ކައުންސިލްގެ ފަރާތުން ހުށަހަޅާފައިވެއެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބޭއްވި ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކީ ވޮއިސް އެވެ