ދިވެހިރާއްޖެއިން ވަކާލާތުކުރި ގޮތަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) ގައި އޮތް މައްސަލަ ނިމި ދިވެހިރާއްޖޭގެ ދެކެނުގެ އިން ކަނޑައެޅިގެން ދިއުމަކީ ރާއްޖެއަށް ލިބުނު ވަރަށް ބޮޑު ކާމިޔާބީއެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ ކެބިނެޓް މިނިސްޓަރުންނާއެކު ރޭ ރައީސް އޮފީހުގައި ބޭއްވި ޕްރެސް ކޮންފަރެންސްއެއްގައި ވާހަކަދައްކަވަމުން ނެވެ.
ރާއްޖޭގެ ސަރަހައްދާއި ގުޅޭގޮތުން ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ ދިވެހިރާއްޖޭގެ ސަރަހައްދު ވަރަށް ސާފުކޮށް ޤާނޫނު އަސާސީގައި ބަޔާންކޮށްފައި ވާ ކަމަށެވެ.
އެގޮތުން ރާއްޖޭގެ ކޯސްޓަލް އެޖުން ފެށިގެން 12 ނޯޓިކަލް މައިލް ރާއްޖޭގެ ސަރަހައްދުގެ ގޮތުގައި ކަނޑައަޅާފައިވާއިރު، ރާއްޖޭގެ އުތުރާއި އިރު އުތުރާއި ހުޅަނގުގެ ހާއްސަ އިގްތިޞާދީ ސަރަހައްދު ވެސް އޮތީ ކަނޑައަޅާފައިކަމަށް ރައީސް ޞާލިހު ވިދާޅުވި އެވެ.
އެހެން ނަަމަވެސް މިހާތަނަށް ދެކުނުގައި ރާއްޖެއަށް ޚާއްސަ އިޤްތިޞާދީ ސަރަހައްދު އޮތީ ކަނޑަނޭޅި ކަމަށާއި، ދެކުނުގައި 200 ނޯޓިކަލް މޭލް ރާއްޖެއިން މިން އަޅާއިރުގާ މޮރިޝަސްގެ ސަރަހައްދާ ފުށުއަރާ ބައެއް އޮތް ކަމަށާއި އިޓްލޮސްގައި އޮތް މައްސަލަ ނިންމުމާއި ގުޅިގެން އެ ސަރަހައްދާ ބެހޭގޮތުން ބައިނަލްއަގްވާމީ މުއާހަދާތަކާއި ގާނޫނުތަކާ އެގޮތަށް ކަނޑައަޅަން ޖެހޭ ކަނޑައެޅުންތައް އެވަނީ ކަނޑައެޅިފައި ކަމަށާއި، އެއާއެކު ރާއްޖެއަކީ ފުރިހަމައަށް އިން ކަނޑައެޅިފައިވާ ޤައުމަކަށް ވެފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވި އެވެ.
"މިއަދު (ހުކުރު ދުވަހު) އެ ނިިމިގެން ދިޔަ ދިއުމަކީ އަޅުގަނޑު ދަންނަވާނީ ޤާނޫނީ ހަމަތަކާއި މިންތަކުގެ ތެރެއިން ރާއްޖޭގެ އިން ވަކިކުރެވި ފުރިހަމަވެގެން ދިޔަ ދިއުމެއްކަމަށް. ރާއްޖެއަކީ މި ދެންނެވި ގޮތަށް ބައިނަލްއަގްވާމީ ހަމަތަކާއި މިންތަކާއި އެއްގޮތަށް އިން ވަކިކުރެވިފައި އޮތް ފުރިހަމަ ބައުންޑަރީއޮތް ގައުމަކަށް ބަދަލުވެގެން އެ ދިޔައީ"
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު
އެކަން ފާހަގަކުރައްވާ ރައީސް ޞާލިހު ވަނީ އެ މައްސަލައިގައި ދިވެހި ސަރުކާރު ތަމްސީލު ކުރެއްވި ޤާނޫނީ ޓީމަށާއި، އިސްކޮށް ހުންނެވި އެޓާނީ ޖެނެރަލް އިބްރާހިމް ރިއްފަތަށް ވަރަށް ޚާއްސަ ޝުކުރެއް އަދާކުރައްވާފަ އެވެ. އަދި އެބޭފުޅުންގެ މަސައްކަތުން އިޓްލޮސްގައި އޮތް މައްސަލަ ރާއްޖެއިން ވަކާލާތު ކުރި ގޮތަށް ނިމިގެން ދިއުމަކީ ދިވެހިރާއްޖެއާއި ރައްޔިތުންނަށް ލިބިގެންދިޔަ ވަރަށް ބޮޑު ކާމިޔާބީއެއްކަމަށް ރައީސް ޞާލިހު ވިދާޅުވި އެވެ.
"އަޅުގަނޑު ދަންނަވާނީ މީ ދިވެހިރާއްޖެއަށާއި، ދިވެހިރާއްޖޭގެ ރައްޔިތުންނަށާ މި ސަރުކާރަށާއި، އަޅުގަނޑުމެން އެންމެނަށް ލިބުނު ރަނގަޅު ކާމިޔާބީއެއް"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރައީސް ޞާލިހު ވިދާޅުވީ ދެކުނުގެ އިން ކަނޑައެޅުމާއި ގުޅިގެން އެ ސަރަހައްދު ބެލެހެއްޓުމުގެ އެންމެހާ ކަންކަން ކުރަންވީ ގޮތާއި ގުޅިގެން މަޝްވަރާ ފައްޓަވާފައިވާ ކަމަށެވެ. އަދި އެ ސަރަހައްދު ބެލެހެއްޓުމުގެ އެންމެހާ ކަންކަން ރާއްޖެއިން ކުރަމުންދާނެކަމަށް އެމަނިކުފާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
