ފޯޅަވައްސަކީ ރާއްޖޭގެ ބައެއްކަމަށް ދުވަހަކު ވެސް ރާއްޖޭގެ ތާރީޚުގައި ދައުވާކޮށްފައި ނުވާއިރު، އަދި ފޯޅަވަހީގެ ސިޔާދަތު ހޯދުމަށް އެއްވެސް ސަރުކާރަކުން އެދިފައިވެސް ނުވާއިރު، ކުއްލިއަކަށް ފޯޅަވައްސަކީ ރާއްޖޭގެ ބައެއްކަމަށް ބުނަން ފެށުމުން ފޯޅަވަހީގައި ފެނާއި ނަރުދަމާއަޅަން ރައްޔިތުންގެ މަޖިލީހުން ސަރުކާރަށް ނާންގާނެ ބާ އޭ ހިތްޕުޅަށް އަރާވަޑައިގެން ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ފޯޅަވަހި މައްސަލައާއި ގުޅިގެން ކެބިނެޓް މިނިސްޓަރުންނާއި އެއްކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ރޭ ރައީސް އޮފީހުގައި ބޭއްވި ޕްރެސްކޮންފަރެންސް ގައި މިނިސްޓަރު ފައްޔާޒު ވަނީ ފޯޅަވައްސަކީ ރާއްޖޭގެ ސަރަހައްދެއްކަމަށް ބުނެ ވަކާލާތު ކުރާ ފަރާތްތަކަށް ރައްދު ދެއްވާފަ އެވެ.
ފައްޔާޒު ވިދާޅުވީ ޗާގޯސް އަކީ ނުވަތަ ފޯޅަވައްސަކީ ރާއްޖޭގެ ބައެއްކަމަށް ބުނެ ދައުވާކުރަން ފެށީ ހަމަ ކުއްލިއަކަށް ކަމަށެވެ. ރައްޔިތުންގެ މަޖިލީހުގައި ބަޖެޓު މަރުހަލާ ކުރިއަށް ދިޔައިރު، ފޯޅަވައްސާއި ބެހޭގޮތުން މެމްބަރުން ވަރަށް ގިނަ ދައުވާތައް ކުރަމުން ދިޔަކަން މިނިސްޓަރު ފާހަގަކުރެއްވި އެވެ.
ރައްޔިތުންގެ މަޖިލީހުގެ ބައެއް މެމްބަރުން ދައްކަވަމުން ދިޔަ ވާހަކަތަކައް އަޑު އައްސަވަމުން ދިޔައިރު، ކުއްލިއަކަށް ފޯޅަވައްސަކީ ރާއްޖޭގެ ތަނެއްކަމަށް ބުނެ މެމްބަރުން ވަކާލާތު ކުރައްވަމުން ގެންދަވާތީ ފޯޅަވަހީގައި ފެނާ ނަރުދަމާ އަޅަން ބަޖެޓުގައި ހިމަނާ އެ ސަރަހައްދުގައު އުޅޭ މީހުން އިސްލާމްކުރުމަށް މަޖިލީހުން ސަރުކާރަށް ނާންގާނެ ބާ އޭ ހިތްޕުޅަށް އަރާވަޑައިގެން ކަމަށް މިނިސްޓަރު ފައްޔާޒު ވިދާޅުވި އެވެ.
"މި އަހަރުގެ ބަޖެޓު މަރުހަލާގެ ތެރޭގައި ޗާގޯސް އަކީ ކުއްލިއަކަށް ރާއްޖޭގެ ތަނެއްގެ ގޮތަށް (ހަދައިފި). އަޅުގަނޑު އޭރު ހިތަށް އެރި ބަޖެޓު ހަދަމުން ދިޔައިރު ފެނާއި ނަރުދަމާ ޗާގޯސްގައި އެޅުމުގެ ބައެއް މަޖިލީސް ތެރެއިން ނާންނާނެ ބާއޭ.. އެކަން ކުރަން ޖެހޭނެ ތާ އަޅުގަނޑުމެންގެ ތަނެއްކަމުގައި ވެއްޖެއްޔާ ހުރިހާ ރައްޔިތުން އުޅޭ ތަނެއްގައި. ދެން އަނެއްކާ ރައްޔިތުން މުސްލިމް ކުރަންވެސް ޖެހޭނެކަމަށް އަޅުގަނޑު ހިތަށް އެރި. އެކަމަކު އެކަން ކުރައްވާ ވާހަކައެއް ނުދައްކަވާ"
އިކޮނޮމިކް މިނިސްޓަރު ފައްޔާޒު އިސްމާއިލް
ފައްޔާޒު ވިދާޅުވީ ދިވެހިރާއްޖޭގެ ދެކުނުގެ އިން މިހާތަނަށް އޮތީ ކަނޑަނޭޅި ކަމަށެވެ. އެހެންކަމުން ދިވެހިންގެ އަތުން އެއްޗެއް ގެއްލިގެން އުޅެން ނުޖެހޭ ކަމަށާއި، އިޓްލޮސްގައި އޮތް މައްސަލަ ނިމުމުން އެ އިން މިހާރު މި އޮތީ ކަނޑައެޅިފައި ކަމަށް އޭނާ ވިދާޅުވި އެވެ.
ދެކުނުގެ އިން ކަނޑައެޅިފައިވާކަމަށް ބުނެ ދައްކާ ވާހަކަތަކަކީ އޮޅުވާލަން ދައްކާ ވާހަކަތަކެއް ކަމަށާއި، އިޓްލޮސްގައި އޮތް މައްސަލަ ނިމިގެން ދިޔައީ ރާއްޖެއަށް ފައިދާވާ ގޮތަށްކަމަށް ފައްޔާޒު ވިދާޅުވި އެވެ.
އަދި އިން ކަނޑައެޅިގެން ދިއުމާއި ގުޅިގެން އެ ސަރަހައްދުން ދިވެހިންނަށް ލިބެން އޮތް މަންފާތައް ހޯދުމުގެ މަސައްކަތް އިކޮނޮމިކް މިނިސްޓްރީން ކަމާ ގުޅުންހުރި ފަރާތްތަކާއި ގުޅިގެން ކުރައްވަމުން ގެންދަވާނެކަމަށް ފައްޔާޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
