ސްޕެނިޝް ލަލީގާގައި މިރޭ އަމިއްލަ ދަނޑުގައި އަލްމޭރިއާ އަތުން 4-2 ގެ ނަތީޖާއަކުން މޮޅުވެ، ރެއާލް މެޑްރިޑް އެއްވަނައިގައި އޮތް ބާސެލޯނާ އާއި ދެމެދުގައި އޮތް ފަރަގު 8 ޕޮއިންޓަށް ކުޑަކޮށްފި އެވެ.

ލީގުގައި އެންމެ ފަހުން ކުޅުނު މެޗުގައި 4-2 ގެ ނަތީޖާއަކުން ޖިރޯނާ ބަލިވި މެޗުގައި އަނިޔާގެ ސަބަބުން ނުކުޅެވުނު ރެއާލްގެ ކެޕްޓަން ކަރީމް ބެންޒެމާ ވަނީ މިރޭގެ މެޗުގެ ފުރަތަަމަ އެގާރައިގައި ހިމެނި ކުޅެފައެވެ.

މިރޭގެ މެޗުގެ ފުރަތަަމަ ހާފުގެ ފަސްވަނަ މިނެޓްގައި ރެއާލަށް ލީޑު ނަގައިދިނީ ބެންޒެމާ އެވެ. މިއީ އަރިމަތިން އެޓީމުގެ ބްރެޒިލް ފޯވާޑް ވިނީޝިއަސް ޖޫނިއަރ ހުރަސްކޮށްދިން ބޯޅައެއް ގޯލު އޭރިޔާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ރެއާލް މެޑްރިޑުން ކާމިޔާބުކުރި ދެވަނަ ލަނޑު، ފުރަތަަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ ވެސް ބެންޒެމާ އެވެ. މިއީ އެޓީމުގެ ބުރެޒިލް ފޯވާޑް ރޮޑްރިގޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ރެއާލް މެޑްރިޑްގެ ތިންވަނަ ލަނޑު ފުރަތަމަ ހާފުގެ 42 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ފުރަތަަމަ ހާފު ނިމުމުގެ ކުރިން ބެންޒެމާ ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ. މިއީ މަސްތެރޭގައި ބެންޒެމާ ކާމިޔާބުކުރި ތިންވަނަ ހެޓްރިކެވެ. އަދި މިއީ މިސީޒަނުގައި ލީގުގައި ކުޅުނު 21 މެޗުގައި އޭނާ ކާމިޔާބުކޮށްދިން 17 ވަނަ ލަނޑެވެ.

މިމެޗުގައި އަލްމޭރިއާގެ ފުރަތަަމަ ލަނޑު ފުރަތަަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޒުވާން ޑިފެންޑަރު ލަޒަރޯ އެވެ. މިއީ ރެއާލްގެ ފަހަތަށް ކުޅޭ ކުޅުންތެރިންނަށް ހެދުނު ގޯހެއްގެ ފައިދާ ނަގައި އެޓީމުގެ ބެލްޖިއަމް ފޯވާޑް ރަމަޒާނި ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-1 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

ދެވަަނަ ހާފު ފެށިގެން ދެވަނަ މިނެޓުގައި ރެއާލުގެ ހަތަރު ވަނަ ލަނޑު ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ރޮޑްރިގޯ އެވެ. މިއީ އެޓީމުގެ ސްޕެނިޝް މިޑްފީލްޑަރު ޑެނީ ސެބަލޯސް ތަނަވަސްކޮށްދިން ފުރުސަތެއްގައި ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި އަލްމޭރިއާގެ ދެވަަނަ ލަނޑު ފަހު ހާފުގެ 61 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ މިޑްފީލްޑަރު ލޫކަސް ރޮބަޓޯން އެވެ.

މިރޭގެ މެޗުން ލިބުނު ތިން ޕޮއިންޓާއެކު 32 މެޗުން ރެއާލް މެޑްރިޑަށް 68 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލްގެ ދެވަނައިގައިއެވެ. އަދި މިރޭގެ މެޗުން ބަލިވި އަލްމޭރިއާ އަށް 32 މެޗުން ލިބިފައި ވަނީ 33 ޕޮއިންޓާއެކު ތާވަލްގެ 15 ވަނަ އެވެ.

އެއްވަނައިގައި އޮތް ބާސެލޯނާ މިރޭ ރެއާލް ބެޓިސް އަތުން މޮޅުވެއްޖެ ނަމަ އެ ޓީމަށް އަލުން 11 ޕޮއިންޓުގެ ލީޑެއް ލިބިގެންދާނެއެވެ.