ސިފައިންގެ ޔުނިފޯމް އަދި އެ މުއައްސަސާގެ ކަރާމަތް އިސްކޮށް ބައެއް ކަންކަމަށް ނޫނެކޭ ބުނުމަކީ ސިފައިންގެ "އެތިކަލް އޮބްލިގޭޝަން" އެއް ކަމަށް އެމްއެންޑީއެފްގެ ކުރީގެ ކެޕްޓަން އަލީ އިޙްސާން ވިދާޅުވެއްޖެއެވެ.

އިހްސާން މިފަދައިން ވިދާޅުވެފައި މިވަނީ ފޯޅަވަހި މައްސަލައިގައި އިޓްލޮސް އިން ނިންމާފައިވާ ގޮތާއި މެދު ގިނަ ދިވެހިން ނުރުހުން ފާޅު ކުރަމުން ދަނިކޮށް ރާއްޖޭގެ ސިފައިންގެ ތެރެއިން އިސް ބޭފުޅުން ކޮޅެއް ރާއްޖެ ޓީވީ އަށް އަރައި ދެއްކެވި ވާހަކަ ތަކަކާއި ގުޅިގެނެވެ.

ރާއްޖެޓީވީގައި ވާހަކަ ދައްކަވަމުން ޗީފް އޮފް ޑިފެންސް ފޯސް މޭޖާ ޖެނެރަލް އަބްދުالله ޝަމާލް ވިދާޅުވީ، މީގެ ކުރިން ރާއްޖޭގެ ޓެރިޓަރީއަކީ ކޮބައިކަން ދިވެހި ސިފައިންނަށް ސާފުވެފައި ނުވާ ކަމަށެވެ. ނަމަވެސް މިދިޔަ ހުކުރު ދުވަހު ރާއްޖެ-މޮރިޝަސް އިމުގެ މައްސަލަ އިޓްލަސްގެ އިން ނިންމުމާއި ގުޅިގެން އެކަން ދިވެހި ސިފައިންނަށް ސާފުވެގެން ހިނގައްޖެ ކަމަށް ވިދާޅުވި އެވެ.

Advertisement

މިފަދައިން ދެކެވުނު ވާހަކަ ތަކާއި ގުޅިގެން ކެޕްޓަން އިހްސާން ވިދާޅުވީ ދިވެހި ރާއްޖޭގެ ދެކުނުން އީއީޒެޑް ނިމެނީ ސ ގަމުން ފެށިގެން 200 މޭލައްކަން ޤާނޫނަކުން ކަނޑައެޅިފައިވާ ކަން ދިވެހި ކިޔަން އިނގޭ ކޮންމެ މީހަކަށް އެނގެން އޮތް އިރު އަސްކަރިއްޔާގެ އެންމެ ސީނިޔަރ އޮފިސަރުންގެ ތެރެއިން 4 އޮފިސަރުން ލައްވައި މިކަން ތިމަންމެންނަށް ނޭނގޭ ކަމަށް ބުނުވުމަކީ ކުރީގެ ސިފައިންގެ އޮފިސަރެއްގެ ހައިސިއްޔަތުން އިންތިހާއަށް ލަދުވެތިވެ ހިތާމަ ކުރާ ކަމެއް ކަމަށެވެ.

"އިޓްލޮސްގެ ނިންމުމާއި އެކު މި ސަރަހައްދު ކުޑަވީ، ކުރިންވެސް މިހާރުވެސް ދިފާޢުކުރަންޖެހޭ ސަރަހައްދު ސިފައިންނަށް ސާފު ވާނެ، އަސްކަރިއްޔާ އާއި އަސްކަރީ ޔުނިފޯމްގެ އަގު ވެއްޓޭ މިބާވަތުގެ ކަންކަން އެެއްވެސް ސަރުކާރަކުން ދިވެހި ސިފައިން ލައްވައި މަޖުބޫރުން ކުރުވައިގެން ނުވާނެ" އިހްސާން ވިދާޅުވެފައި ވެއެވެ.

މި ކަމާއި ގުޅިގެން ކުރައްވާފައިވާ އެހެން ޓްވީޓެއްގައި އިހްސާން ވިދާޅުވެފައި ވަނީ 2019 ވަނަ އަހަރުގެ ޖޫން މަހު މޮރިޝަސް އިން ރާއްޖޭގެ އީއީޒެޑް ކުޑަކުރުމަށް އިޓްލޮސް ގައި ދައުވާ ކުރަން ދެން ރާއްޖޭގެ ދެކުނުގެ އީއީޒެޑް ގައި ފުށުއެރުމެެއް ނެތް ކަމަށެވެ.

އަދި އޭގެ ފަހުން ފުށު އެރުން އޮތް ކަމަށް މޮރިޝަސް އިން ބުނިކަމަށް ވިޔަސް 28 އޭޕްރީލް 2023 އާއި ޖެހެންދެން 200 މޭލު ބެލެހެއްޓުމަށް ދިވެހި ސިފައިންނަށް ޝައްކު ވާން ޖެހޭ އެއްވެސް ސަބަބެެއް ނެތް ކަމަށް އިހްސާން ވިދާޅުވެފައި ވެއެވެ.

"ޔުނިފޯމް އަދި މުއައްސަސާގެ ކަރާމާތް އިސްކޮށް ބައެއް ކަންކަމަށް ނޫނެކޭ ބުނުމަކީ ސިފައިންގެ އެތިކަލް އޮބްލިގޭޝަން އެއް" އިހްސާން ގެ ޓްވީޓް ނިންމާލަމުން ވިދާޅުވެފައިވެއެވެ.