އިގިރޭސި ޕްރިމިއާ ލީގުގައި މިރޭ ރަށުން ބޭރުގައި 2-1 ގެ ނަތީޖާއަކުން ފުލަމް ބަލިކޮށް މެންޗެސްޓާ ސިޓީ އިން އާސެނަލް ފަހަތަށް ޖައްސާލުމަށްފަހު، ލީގު ތާވަލުގެ އެއްވަނަ މަގާމަށް ކުރިއަށް ޖެހިލައިފި އެވެ.

މިރޭގެ މެޗުގެ ތިން ވަނަ މިނެޓުގައި މެންޗެސްޓާ ސިޓީއަށް ލިބުނު ޕެނަލްޓީއަކުން އެޓީމަށް ލީޑު ހޯދައިދިނީ ހާލަންޑް އެވެ. މިއީ މިސީޒަނުގައި ލީގުގައި ކުޅުނު 30 މެޗުގައި އޭނާ ކާމިޔާބުކޮށްދިން 34 ވަނަ ލަނޑެވެ.

ސިޓީ އިން މެޗުގެ ކުރީކޮޅު ލަނޑެއް ކާމިޔާބުކޮށް މެޗުގެ ލީޑު ނަގާފައި ވަނިކޮށް ފުރަތަމަ ހާފުގެ 15 ވަނަ މިނެޓުގައި ފުލަމް އިން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ ފޯވާޑް ކާލޯސް ވިނީޝިއަސް އެވެ. މިއީ އެޓީމުގެ ވޭލްސްގެ މިޑްފީލްޑަރު ހެރީ ވިލްސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފު ނިމުމުގެ ކުރިން މި މެޗުގައި ދެވަނަ ފަހަރަށް މެންޗެސްޓާ ސިޓީއަށް ލީޑު ހޯދައިދިނީ އެޓީމުގެ އާޖެންޓީނާގެ ޒުވާން ފޯވާޑް ޖޫލިއަން އަލްވަރޭޒް އެވެ. މިއީ އެޓީމުގެ އަލްޖީރިއާ ފޯވާޑް  ރިޔާދު މަހްރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

ދެވަނަ ހާފު ފެށިގެން ދެވަނަ މިނެޓުގައި މެންޗެސްޓާ ސިޓީގެ ހާލަންޑްއަށް ވަނީ އެޓީމުގެ ލީޑު ފުޅާކުރުމަށް ހުސް ފުރުސަތެއް ލިބި ބޭނުން ނުކުރެވިފައެވެ. ފުލަމްގެ ޕެނަލްޓީ އޭރިއާ ތެެރެއިން ހާލަންޑް ފޮނުވި ހަމަލާ އެޓީމުގެ ގޯލްކީޕަރު ބްރެންޑް ލެނޯ ވަނީ ހުޝިޔާރުކަމާއެކު ދިފާއުކޮށްފައެވެ.

އޭގެ ފަސް މިނެޓު ފަހުން ސިޓީގެ އަލްވަރޭޒަށް ވެސް ވަނީ ލަނޑު ޖަހާނެ ރަގަޅު ހުސް ފުރުސަތެއް ލިބި ބޭނުން ކުރެވޭގޮތް ނުވެފައެވެ. އަލްވަރޭޒް ފޮނުވާލި ހަމަލާގެ ހުރަހަކަށް ވީ މިރޭގެ މެޗުގައި މޮޅު ކުޅުމެއް ދެއްކި ފުލަމްގެ ގޯލްކީޕަރު ލެނޯއެވެ.

ދެވަނަ ހާފުގައި ދެޓީމުގެ ފަރާތުން ވާދަކުރި ކުޅުމެއް ފެނިގެންދިޔަ ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން މެންޗެސްޓާ ސިޓީ މޮޅުވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 32 މެޗު ކުޅެގެން ސިޓީއަށް 76 ޕޮއިންޓް ލިބިފައިވާއިރު، އެއް މެޗު އިތުރަށް ކުޅެގެން އާސެނަލްއަށް ލިބިފައިވަނީ 75 ޕޮއިންޓެވެ. އަދި މިރޭގެ މެޗުން ބަލިވި ފުލަމްއަށް 33 މެޗުން ލިބުނު 45 ޕޮއިންޓާއެކު އެޓީމު އޮތީ ލީގު ތާވަލްގެ 10 ވަނައިގައެވެ.