އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި 1-0 ގެ ނަތީޖާއަކުން އެސްޓަންވިލާ ބަލިކޮށް މެންޗެސްޓާ ޔުނައިޓެޑުން ތިންވަނައިގައި އޮތް ނިއުކާސަލް އާއި ދެމެދުގައިވާ ފަރަގު ދެ ޕޮއިންޓަށް ކުޑަކޮށްފި އެވެ.

ލީގުގައި އެންމެ ފަހުން ކުޅުނު މެޗުގައި ޓޮޓެންހަމް އާއި އެއްވަރުވެ ލީގުގެ ތިންވަނަ މަގާމު ގެއްލިފައިވާ ޔުނައިޓެޑުން މިރޭގެ މެޗަށް ނުކުތީ ބަދަލުތަކަކާއި އެކުގައެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ މެންޗެސްޓާ ޔުނައިޓެޑުންނެވެ. އަދި ފުރަތަަމަ ހާފުގެ 8 ވަނަ މިނެޓުގައި އެޓީމުގެ އިގިރޭސި ފޯވާޑް ރަޝްފޯޑަށް ލަނޑުޖަހާނެ ރަގަޅު ހުސް ފުރުސަތެއް ލިބި ބޭނުން ނުކުރެވުނު އިރު، 12 ވަނަ މިނެޓުގައި ރަޝްފޯޑް ފޮނުވާލި ހަމަލާ އެސްޓަން ވިލާގެ ގޯލްކީޕަރު މަޓީނޭޒް ވަނީ ދިފާއުކޮށްފައެވެ.

ފުރަތަަމަ ހާފުގައި އެސްޓަން ވިލާ ޓީމުން އެންމެ ހުސް ފުރުސަތެއް ލިބުނީ އެޓީމުގެ އެލެކްސް މޮރޭނޯ އަށެވެ. ނަމަވެސް މުޅިން ހުސްކޮށް ހުރެ އޭނާ ފޮނުވާލި ބޯޅަ އެސްޓަން ވިލާގެ ގޯލްކީޕަރު މަޓީނޭޒް ވަނީ ދިފާއުކޮށްފައެވެ.

ފުރަތަަމަ ހާފުގެ 28 ވަނަ މިނެޓުގައި އެސްޓަން ވިލާގެ ޕެނަލްޓީ އޭރިއާ ތެެރެއިން ޔުނައިޓެޑުގެ ބްރެޒިލް މިޑްފީލްޑަރު ކަސަމީރޯއަށް ލިބުނު ހުސް ފުރުސަތުގައި އޭނާ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ ޔުނައިޓުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް އެވެ. މިއީ އެޓީމުގެ އިގިރޭސި ފޯވާޑް ރަޝްފޯޑް ފޮނުވާލި ހަމަލާއެއް އެސްޓަން ވިލާގެ ގޯލްކީޕަރު މަޓީނޭޒް ދިފާއުކޮށް ބޭރަށް ނެރުނު ބޯޅަ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ދެޓީމަށް ވެސް ލަނޑުޖަހާނެ ރަގަޅު ފުރުސަތުތަކެއް ލިބުނެވެ. ނަމަވެސް މި ހާފުގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.

މިރޭގެ މެޗުގެ ލިބުނު ތިން ޕޮއިންޓާއެކު އެކު 32 މެޗުން މެންޗެސްޓާ ޔުނައިޓެޑަށް 63 ޕޮއިންޓް ލިބިފައިވާއިރު، އެއްމެޗު އިތުރަށް ކުޅެގެން ތިންވަނައިގައި އޮތް ނިއުކާސަލް ޔުނައިޓެޑަށް ލިބިފައިވަނީ 65 ޕޮއިންޓެވެ.

މިރޭގެ މެޗުން ބަލިވި އެސްޓަން ވިލާ 34 މެޗު ކުޅެފައިވާއިރު އެޓީމަށް ލިބިފައިވަނީ 54 ޕޮއިންޓާއެކު ލީގު ތާވަލުގެ 7 ވަނަ އެވެ.