ފްރާންސް ލީގުގައި މިރޭ އަމިއްލަ ދަނޑުގައި ލޮރިއަންޓް އަތުން 3-1 ގެ ނަތީޖާއަކުން ބަލިވެ، ލީގު ތާވަލުގެ ކުރީގައި 8 ޕޮއިންޓަށް ލީޑު ފުޅާކުރުމަށް ލިބުނު ފުރުސަތު ޕީއެސްޖީ އިން ނަގާލައިފިއެވެ.

މިރޭގެ މެޗުގައި ފުރަތަަމަ ލަނޑުޖަހައި ކުރިހޯދީ ލޮރިއަންޓް އިންނެވެ. މި ލަނޑު ފުރަތަަމަ ހާފުގެ 15 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރާންސް މިޑްފީލްޑަރު އެންޒޯ އެވެ. މިއީ އެޓީމުގެ ރޮމެއިން ފޭއިވާރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ޕީއެސްޖީއަށް ދިމާވި އެންމެ ބޮޑު މައްސަލައަކީ ފުރަތަަމަ ހާފުގެ 20 ވަނަ މިނެޓުގައި އެޓީމުގެ މޮރޮކޯ ޑިފެންޑަރު އަޝްރަފް ހަކީމީއަށް ދެވަނަ ރީނދޫ ކާޑާއެކު ރަތް ކާޑެއް ދައްކައި ދަނޑުން ފޮނުވާލުމެވެ.  މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

Advertisement

އެއްކުޅުތެރިއަކު މަދުކޮށް ކުޅެމުންދިޔަ ޕީއެސްޖީއަށް ފުރަތަަމަ ހާފުގެ 29 ވަނަ މިނެޓުގައި މެޗުގެ ނަތީޖާ އެއްވަރުކޮށްދިނީ އެޓީމުގެ ކެޕްޓަން ކިލިއަން އެމްބާޕޭ އެވެ. ނަމަވެސް ފުރަތަަމަ ހާފު ނިމުމުގެ ކުރިން ލޮރިއަންޓް އިން ދެވަނަ ފަހަރަށް ލީޑު ނެގި އެވެ.

މިލަނޑު ފުރަތަަމަ ހާފުގެ 39 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެމަރޫން ޑިފެންޑަރު ޑާލިން ޔަންގްވާ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ލޮރިއަންޓް ކުރީގައި އޮވެގެންނެވެ.

ދެވަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި ޕީއެސްޖީ ޓީމުން އެންމެ ހުސް ފުރުސަތެއް ލިބުނީ އެޓީމުގެ ޕޯޗުގަލް މިޑްފިލްޑަރު ޑެނީލޯ ޕެރެއިރާ އަށެވެ. ނަމަވެސް އޭނާ ފޮނުވާލި ހަމަލާ ލޮރިއަންޓްގެ ގޯލު ކީޕަރު ވަނީ ދިފާއުކޮށްފައެވެ.

ދެވަނަ ހާފުގެ 86 ވަނަ މިނެޓުގައި ލޮރިއަންޓް އިން ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މި މެޗުގައި ލޮރިއަންޓް އިން ކާމިޔާބުކުރި ތިން ވަނަ ލަނޑު ދެވަނަ ހާފުގެ 88 ވަނަ މިނެޓުގައި ކާމިޔާބުކޮށްދިނީ އެޓީމުގެ ސެނެގާލް ފޯވާޑް ބަމްބާ ޑިއަންގް އެވެ. މިއާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޕީއެސްޖީ ބަލިވެގެންނެވެ.

މިރޭގެ މެޗުގެ ލިބުނު ތިން ޕޮއިންޓާއެކު އެކު 33 މެޗު ކުޅެގެން 48 ޕޮއިންޓާއެކު ލޮރިއަންޓް މިވަގުތު އޮތީ ލީގު ތާވަލްގެ 10 ވަނައިގައެވެ. އަދި މި މެޗުން ބަލިވި ޕީއެސްޖީ ކުޅުނު 33 މެޗުން އެޓީމަށް 75 ޕޮއިންޓް ލިބިފައިވާއިރު، ދެވަނައިގައި އޮތް މާސޭއަށް 33 މެޗުން ލިބިފައިވަނީ 70 ޕޮއިންޓެވެ.